Naggafu kani Jehova i kekkasta nga balita. Gafu ta minaggayayya nga Dios yayya, ikayana gapa tu magayayya ira familia. (1 Timoteo 1:11) Pinamegafuananna i unnug na pagatawa. Importante tu legal i kasal na babay anna lalaki nige da mattadday tapenu egga i seguridadda metallugaring ta ána da. Mawag tu tuppalan na maki-atawa ira i regulasion na gobiernu meyannung ta pangirehistru ta kasal.​—Bibbigammu i Lucas 2:1, 4, 5.

Kunnasi i pagimamma na Dios nu magatawa i tadday nga lalaki anna babay? Ikaya na Dios tu permanente i pagatawa. Mawag tu tuppalan na maki-atawa ira i regulasion na gobiernu meyannung ta pangirehistru ta kasal. (Lucas 2:1, 4, 5) Ikaya ni Jehova tu matalo ira ta kataggi-tadday. (Hebreo 13:4) Ikalussaw na Dios i diborsio. (Malakias 2:16) Ngem ipamavulunna tu legal nga makisina anna makiatawa uli i tadday nga Cristiano nu nakigannug onu nakirelasion ta tanakuan i atawana.​—Bibbigammu i Mateo 19:3-6, 9.

Pinaratu ni Jehova i lalaki anna babay tapenu makkinna-uffun ira ta pagatawa da. (Genesis 2:18) I yama i ulu na familia. Mawag gavu tu mattrabahu yayya tapenu meyawana i kawagan ira na familia na ta material. Responsibilidad na paga nga tudduan i familia meyannung ta Dios. Mawag tu ayatanna i atawa na nga babay anna massakrifisiu para nisa. Mawag tu ipasingadda dua i ayâ anna respetu ta kataggi-tadday. Parehu ira nga imperfekto yari tu mawag gavu tu makkinnapakoma ira. Yatung i sikreto tapenu makapagayayya i famillia.​—Bibbigammu i Efeso 4:31, 32; 5:22-25, 33; 1 Pedro 3:7.

Nu marigatan kamu ngana ta situasionnu nga magatawa, mawag tu ipasingannu parehu i ayâ. (1 Corinto 13:4, 5) Ari tu irekomenda na Uvovug na Dios nga massina i magatawa tapenu masolba ira problema nga gagangay laman nu maki-atawa ka.​—Bibbigammu i 1 Corinto 7:10-13.

Ikaya ni Jehova tu magayayya kamu. Kagian na Dios nikamu i kakastan nga tabarang nu kunnasi nu ma-enjoy i kinamaginganay onu kinabagitolay nu. Ikaya na paga tu matudduan kamu ta kina-uto na magana nu anna ta nappasa ira nga ekspiriensa da. (Colosas 3:20) Ikaya na paga ni Jehova tu ma-enjoy nu i masserbi ta Namaratu nikamu anna ta Ana na.​—Bibbigammu i Eclesiastes 11:9–12:1; Mateo 19:13-15; 21:15, 16.

Mawag tu mattrabahu kamu tu mapia tapenu meyawanu i kawagan na ána nu kagitta na makang, paddianang anna sinnung. (1 Timoteo 5:8) Mawag paga tu tudduannu ira nga iddukadda i Dios anna maddidiamu meyannung nisa. Yatun i kurug nga makeyawa tu pagayayya ta ána nu. (Efeso 6:4) Dakal i efekto na ta giffutuan na ána nu i pangipasingannu tu ayâ ta Dios. Nu ibasem ta Biblia i ituddunu nira, positibo i resulta na ta ginnonopadda.​—Bibbigammu i Deuteronomio 6:4-7; Proverbio 22:6.

Mabenefisiowan i abbarabbing nu komendarannu anna nu pasikannannu i nono da. Mawag da paga i tabarang anna disiplina. Nu nasanaynu ána nu ta kunnatun, maprotektang ira nga ari tu magangngua tu marakay nga gannug. Masiguradunu paga tu magayayya ira. (Proverbio 22:15) Ngem ari tu mepanggo tu ziga-rigatannu tu fermi i ána nu kada disiplinannu ira.​—Bibbigammu i Colosas 3:21.

Mangipublisa i Saksi ira ni Jehova tu aru nga libru nga nadisenio tu manuffung ta magana anna ána. Nebase ta Biblia danaw nga pabbibbiran.​—Bibbigammu i Salmo 19:7, 11.