Inorganisa na Dios tu tadday nga nasion i gaka-gaka na patriarka nga si Abraham. Ninagananna yaw tu “Israel.” Iniddanna ira tu dorob onu bili-bilin nga mawag tu tuttuladda. Nikargu na paga na Dios tannira i kurug nga paddaya-rayaw anna i uvovug na. (Salmo 147:19, 20) Gafu ta Israel, mabendisionan i totolay na ngamin nga nasion.​—Bibbigammu i Genesis 22:18.

Pinili na Dios i Israelita ira nga mabbalin tu saksina. Ipasingan na nesimmu ta Israel nu kunnasi mabendisionan i totolay nu tuttuladda i dorob na Dios. (Deuteronomio 4:6) Yari tu gukaban ira na Israelita, mannammuan na tanakuan i kurug nga Dios.​—Bibbigammu i Isaias 43:10, 12.

Ta pappasa na tiempu, nawawwan na Israel i fabor na Dios. Yari tu tinallianan ni Jehova yatun nga nasion tu Cristiano nga kongregasion. (Mateo 21:43; 23:37, 38) Ta maddagung, i fustu nga Cristiano i mamakurug kani Jehova.​—Bibbigammu i Kingngua 15:14, 17.

Inorganisa ni Jesus i disipulo na ira tapenu mallayya-gayya anna magangngua tu disipulo ira ta ngamin nga nasion. (Mateo 10:7, 11; 24:14; 28:19, 20) Egga ngana ta climax onu kasikannan yaw nga trabahu, ta pagultimuan na maddagun nga sistema na ganna-gannug. Ta historia na totolay, yaw i gafu na paga laman tu minillion nga totolay ta ngamin nga nasion i pinattaradday ni Jehova para ta fustu nga paddaya-rayaw. (Apocalipsis 7:9, 10) Naorganisa ira i fustu nga Cristiano tapenu mapasikan anna moffunang i kataggi-tadday. Ta interu nga mundo, parehu i programa na panudduda nga naggafu ta Biblia.​—Bibbigammu i Hebreo 10:24, 25.

Nguri ta dekada na 1870, naleran uli na baddi nga grupo na estudiante na Biblia i nabinnay nga netagu nga kinakurug tu ituttuddu na Biblia. Ammuda tu inorganisa ni Jesus i kongregasion na Cristiano tapenu mallayya-gayya, yari tu pinegafuanadda i interu-mundo nga kampania na pallayya-gayya. Ta 1931, inusada i ngagan tu Saksi ni Jehova.​—Bibbigammu i Kingngua 1:8; 2:1, 4; 5:42.

Ta ollu nga siglo, nabenefisiowan i Cristiano ira nga kongregasion ta aru nga nasion ta tadday nga nakasentro nga manangngal nga baggi tu nangiyorollu nira. Ibilangda tu si Jesus i Ulu na kongregasion. (Kingngua 16:4, 5) Kagitta na tagga, mabenefisiowan gapa i Saksi ira ni Jehova ta interu mundo ta pangiyorollu na Manangngal nga Baggi onu grupo na ekspiriensadu nga manakam. Ira i mangi-giya ta branch office na Saksi ira ni Jehova ta nadduruma nga nasion. Melavu taw i pangibalittag, pangimprenta anna pangiwara ta publikasion nga meyoyosa ta paddidiamu tu Biblia ta maturu tu 600 nga lengguahe. Yari tu makeyawa tu espiritual nga pammatuyag anna direksion nga naggafu ta Biblia i Manangngal nga Baggi para ta maturu tu 100,000 nga kongregasion ta interu mundo. Ta kada kongregasion, egga i kualipikadu nga lallaki nga masserbi tu elder onu overseer. Tangngallan danaw i karneru ira na Dios gukaban na ayâ.​—Bibbigammu i 1 Pedro 5:2, 3.

Naorganisa i Saksi ira ni Jehova tapenu ilayya-gayyada i makakkasta nga balita anna magangngua tu disipulo. Kagitta na apostoles, mallayya-gayya ira ta babalay. (Kingngua 20:20) Iyembitada i paddidiamu tu Biblia para ta totolay tu napafutuan i ayâda ta kinakurug. Ngem ari laman tu basta tadday tu organisasion i Saksi ira ni Jehova. Kagitta ira na tadday tu familia nga egga i minangngiddu nga Yama na. Yari tu tangngalladda i kataggi-tadday tu gitta na mawwaragi. (2 Tesalonica 1:3) Naorganisa i Saksi ira ni Jehova tapenu kuadda i uray na Dios anna manuffun ta tanakuan. Megafu tatun, i organisasion ni Jehova i pinaka-magayayya tu familia ta utun na davvun.​—Bibbigammu i Salmo 33:12; Kingngua 20:35.