LEKSION 4
Sinni si Jesu-Cristo?
1. Sinni namaratu kani Jesus anna sitaw naggafuanna?
Anni nga kualidad ira ni Jesus i namabbalin sa tu mabi marannian?—MATEO 11:29; MARCOS 10:13-16.
Ari tu kagitta na tolay, naddian si Jesus ta langi nga tadday tu espiritu nga persona nage na neyana ta davvun. (Juan 8:23) Yayya ollu nga pinaratu na Dios anna inuffunanna i Dios ta pamaratu ta ngamin nga karuan paga nga ganna-gannug. Yayya lamang i tattadday nga direkta nga pinaratu ni Jehova yari tu fustu laman nga magalan tu “tattadday” nga Ana na Dios. (Juan 1:14) Nagalan paga yayya tu “i Uvovug” ta nasserbi tu Taga-kagi ta mensahe na Dios.—Bibbigammu i Proverbio 8:22, 23, 30; Colosas 1:15, 16.
2. Ngatta minay si Jesus ta davvun?
Zinog na Dios i Ana na ta davvun gukaban na pangiyalina ta inango ni Jesus ta san na virhen nga Judio nga si Maria. Awan gavu tu tolay nga yama ni Jesus. (Lucas 1:30-35) Minay si Jesus ta davvun (1) tapenu itudduna i kinakurug meyannung ta Dios, (2) tapenu mangipasingan tu ehemplo nu kunnasi tam kuan i uray na Dios maski nu egga ziga-riga anna (3) tapenu iyawana i perfekto nga inango na tu “panavvu.”—Bibbigammu i Mateo 20:28.
3. Ngatta mawag tam i panavvu?
Megitta i panavvu ta balor nga pappaga tapenu melisi ta patay i tadday nga tolay. (Exodo 21:29, 30) Ari tu orihinal nga gakkag na Dios tu matay anna mallakay onu mabbako i totolay. Kunnasi tam makasiguradu ta? Kinagi na Dios ta ollu nga tolay nga si Adan tu matay yayya nu kuanna i kagian na Biblia tu “tagaruli” onu “liwa.” Nu ari nakuan nakaliwa si Adan, arianna matay. (Genesis 2:16, 17; 5:5) Sigun ta Biblia, “siminallung” i patay ta totolay megafu kani Adan. Nepamana ni Adan ta gaka-gaka na i liwa kunne na gapa i balo na—i patay. Mawag tam i panavvu tapenu mapalubbangan ittam ta sentensia na patay nga nepamana ni Adan.—Bibbigammu i Roma 5:12; 6:23.
Sinni i maka-paga ta panavvu tapenu mapalubbangan ittam ta patay? Nu matay ittam, liwa tam lamang i awayya tam nga mapagan. Awan tu imperfekto nga tolay i maka-paga ta liwa-liwa na tanakuan.—Bibbigammu i Salmo 49:7-9.
4. Ngatta natay si Jesus?
Ari tu gitta tam, perfekto si Jesus. Yari tu ari na mawag nga matay gafu ta ni vuluvuga yayya nga nakangngua tu liwa. Lallagu, natay si Jesus megafu ta liwa-liwa na totolay. Nipasingan na Dios i neruma-ruma nga ayâ na ta totolay gukaban na paddogna ta ana na tu matay para nittam. Nipasingan gapa ni Jesus i ayâ na nittam ta pamarulo na ta dob na Yama na. Niyawa na gavu i inango na para ta liwa-liwa tam.—Bibbigammu i Juan 3:16; Roma 5:18, 19.
Girawan i video nga Ngatta Natay si Jesus?
5. Anni i maddagun nga kukukuan ni Jesus?
Nguri ta egga si Jesus ta davvun, inuruna i mataki ira, pinaginnolayna i natay anna inuffunanna i mazziga-riga. Nipasinganna nu anni i kuanna ta mappange para ta ngamin nga minammarulo nga totolay. (Mateo 15:30, 31; Juan 5:28) Kustu natay si Jesus, pinaginnolay yayya na Dios tu espiritu nga persona. (1 Pedro 3:18) Kabalinna, naginnag si Jesus ta ziwanan na Dios adde ta iniddan ni Jehova yayya tu pakapangngua nga mammaguray tu Patul ta interu davvun. (Hebreo 10:12, 13) Maddagun ngana mammaguray si Jesus ta langi tu Patul anna ilayya-gayya na taga-tuttul na i makakkasta nga balita ta interu mundo.—Bibbigammu i Daniel 7:13, 14; Mateo 24:14.
Aranni ngana nga usan ni Jesus i pakapangngua na nga Patul tapenu pagimmanganna ngamin i ziga-riga anna danuri marakay nga totolay. Ngamin nga egga i angngurugda kani Jesus anna mamarulo sa i mattolay ta mappange nga paraiso ta davvun.—Bibbigammu i Salmo 37:9-11.