Tura na Manangngal nga Baggi
“Gumattuddu kamu” nakuan. (Heb. 5:12) Fugurammu! Imbitan ittam ni Jehova—i kapianan nga Gumattuddu ta uniberso—nga tudduan i tanakuan meyannung nisa! Nabalor nga pribilehio anna madammo nga responsibilidad i anni laman nga annungan nga mangituddu ta kinakurug meyannung kani Jehova—ta familia, ta kongregasion, onu ta ministerio. Kunnasi tam metuppal yaw?
Mabibbig i tabbag ta nitura ni apostol Pablo kani Timoteo: “Tangngawam-mu i kebibbig na Masanto nga Tura ta pagamma-ammungan na mangurug ira; ay mallayyagayya anna mattuddu ka gapa.” Kinagi paga ni Pablo: “Nu kunnaw i kuam-mu, mapaliag ka kunne na ta magginna ira nikaw.” (1 Tim. 4:13, 16) Makepaliag-inango i mensahem. Importante gafu nga mappursigi ka nga pakastan i pabbibbig anna pattuddum. Nadisenio yaw nga brosiur tapenu makuam yatun. Ikonsidera i karuan nga parte naw.
Tadday nga teksto ta kada pahina—awayyana tu prinsipio na Biblia nga konektadu ta leksion onu angngarigan nga aplikasion na leksion
Si Jehova i “Katannangan nga Instruktor.” (Isa. 30:20) Moffunan naka naw nga brosiur nga mapakasta i abilidad mu ta pabbibbig anna pattuddu, ngem ariammu vuluvuga kattaman nga si Jehova i Paggafuan na mensahe tam anna yayya i mangiyaranni ta totolay. (Juan 6:44) Kanayummu gafu ipakimallo i masanto nga espiritu. Usammu kanayun i Uvovug na Dios. Idirekta i atension kani Jehova, ari nga ta baggim. Ikagumammu nga imula ta giffutuan na maggigginna ira i monag nga pangaya ta Dios.
Nembitakka nga ituddu i pinaka-importante nga mensahe nga neyawa ta totolay. Makkomfiansa kami nga metuppal mu yaw durante nga mattalo ka ta ‘sikan nga iyawa na Dios.’—1 Ped. 4:11.
I kakavvulu mu nga gumattuddu,
Manangngal nga Baggi na Saksi ira ni Jehova
