PAKKIAVU 9
Fustu Kari nga Kurugakku i Ebolusion?
ANNI I KUAMMU?
Nonopammu yaw nga eksena: Magulu-guluan si Alex. Nabayag ngana yaya nga mangurug ta Dios anna ta pamaratu. Ngem taw nga aggaw, kuruga kumbinsidu i mestruna ta biology ta pakkagina nga kurug i ebolusion anna nebase yatun ta mapattalakkan nga research ta siensia. Arianna gapa kayà ni Alex nga mabbalin yaya tu gitta na ignorante. ‘Tutal,’ kagianna ta baggina, ‘nu napakurug na sientista ira nga fustu i ebolusion, sinni ngà tapenu kuestionan ira?’
Nu sikaw si Alex, mangurug ka ngana kari ta ebolusion megafu laman ta kagian na libru nga fustu yatun?
MAGIMMANG ANNA MANNONO!
Parehu nga makagi insigida na totolay ta makka-abbag nga isyu nu anni i kurugadda maski nu ariadda talaga ammu nu ngatta kurugadda yatun.
-
Mangurug i karuan ta pamaratu megafu laman ta yatun i nituddu nira na relihiodda.
-
Mangurug i karuan ta ebolusion megafu laman ta yatun i netuddu nira ta eskuela.
ANNAM NGA PAKKIAVU NGA MAPANNONOPAN
Kagian na Biblia: “Kurug tu tolay i namataddag ta kada balay, ngem i Dios i nangngua ta ngamin nga ganna-gannug.” (Hebreo 3:4) Rasonable kari nga kurugan yatun?
KUDDA: Resulta na big bang i ngamin nga gannug ta uniberso.
1. Sinni onu anni i naggafuan na big bang?
2. Anni i mas lohikal—awan tu naggafuan na ngamin onu egga i namaratu ta ngamin?
KUDDA: Naggafu ta aya-ayam i totolay.
3. Nu naggafu ta aya-ayam i totolay—gitta na ta ayong—ngatta gafu kekkadakal i neruman na abilidad na uto na totolay ta ayong ira?
4. Ngatta kuruga komplikadu maski i “pinakasimple” nga klase na pinaratu?
KUDDA: Napakurug ngana i ebolusion.
5. I tolay kari nga nakkagi taw i mismu nga naggigiammu ta ebidensia ira?
6. Piga i mangurug ta ebolusion megafu laman ta nekagi nira nga mangurug tatun i ngamin nga edukadu nga tolay?
“Nu lumalakag ka ta kakayuan tapus nakasingakka tu makasta nga balay, nonopammu kari: ‘Kekkastana! Sassakto siguru i nikedanna na kayu ira yari tu napadday yaw nga balay.’ Magga ari! Ari tu rasonable yatun. Yatutta ngatta kurugattam nga basta laman limittuag i ngamin nga egga ta uniberso?”—Julia.
“Nu egga nakkagi nikaw nga nassabug i planta nga pagimprentan anna napparassi i tinta ta pader anna bobida tapus egga naformana yatun tu uvovug ira na kumpleto nga diksionario. Kurugammu kari?”—Gwen.
NGATTA MANGURUG KA TA DIOS?
Pagarammannaka na Biblia nga usan i ‘pakapangnguam nga marrason.’ (Roma 12:1, NW) Kayàna kagian, i pangurugmu ta Dios ay ari laman nakuan tu nebase ta
-
EMOSION (Para niakan, egga paga mas makapangngua)
-
INFLUWENSIA NA TANAKUAN (Ziminakal ngà ta relihioso nga lugar)
-
PAMIPILIT (Nituddu na maganaku nga egga i Dios—awan tu makuà)
Egga lallagu nakuan i maladda nga rason para ta kuru-kurugammu.
“Nu gigginnakku ta klase i mestrumi nga mangiyesplika nu anni i keyusan na kada parte na baggi tam, ariakku vuluvuga madduda nga egga i Dios. Egga papel na kada parte na baggi, adde turi ta kabadditan nga detalye, anna ariattam paga lagu matageno i pattrabahuna yatun ira. Kappabbaw talaga i baggi na tolay!”—Teresa.
“Nu makasingan ngà tu atannang nga pataddag, barko, onu kotse, iyavuku ta baggì, ‘Sinni i nagangngua taw?’ Angngariganna, siguradu nga intelihente nga totolay i magangngua tu kotse megafu ta aru nga babaraddi nga parte i mawag tu fustu nga nakakabit tapenu magandar yatun. Anna nu egga nagangngua ta kotse ira, kunnatun tam gapa nga totolay.”—Richard.
“Durante nga umara-aru i magigiammù ta siensia, mabbalin gapa nga mas ari mapattalakkan i ebolusion. . . . Para niakan, kawagammu i mas aru nga ‘pangurug’ nu mangurug ka ta ebolusion anne ta nu mangurug ka ta Namaratu.”—Anthony.
PANNONOPAN
Maski nu piga ngana nga dekada nga marrese-research i sientista ira, awan paga tu para-parehu nga eksplanasiodda meyannung ta ebolusion. Nu ari nga para-parehu i sientista ira—nga ira nakuan i makagi nga eksperto—marake kari nu kuestionammu i teoria?