Nonopammu yaw nga eksena: Makikkiggayang si Tim ta kokkofunna turi nakannana tu bola i benta na karrubada yari tu nabakka.

Nu sikaw si Tim, anni i kuammu?

EGGA TALLU NGA PAPPILIAMMU:

1. Makkarela.

2. Paliwatan i tanakuan.

3. Aminan ta karrubanu i nesimmu, anna kagian nga pagammu i nabakkam.

Posible nga mas kayàmu pilian i Opsion A. Ngem aru i makasta nga rason nu ngatta mawag nga aminammu i nakaliwatammu​—nakabakka ka man tu benta onu tanakuan paga.

1. Yaw i fustu nga kuan.

   Kagian na Biblia: “Karagatammi nga mattolay nga mapammakatalakkan ta ngamin nga ganna-gannug.”​—Hebreo 13:18, NW.

2. Mas mapakoma na totolay danuri i mangikagi ta liwi-liwada.

   Kagian na Biblia: “I tadday nga mangililimag ta nakaliwatanna ira ay ari mavviktoria, ngem i sinni laman nga mangikagi anna mangibattang tatun ira ay mepasingannan tu allo.”​—Proverbio 28:13.

3. I pinaka-importante, makapagayaya yatun ta Dios.

   Kagian na Biblia: “Kalussaw ni Jehova i tolay nga minangngilloko, ngem i madukko nga pakikofunna ay egga ta matunung.”​—Proverbio 3:32.

Nilimag ni Karina, nga 20​-anios, ta yamana nga nagafu yaya ta paspas nga pammanehona. Ngem arianna netagu yatun tu mannanayun. “Nappasa i tanga​-ragun,” kunni Karina, “nammuan yatun na yamà. Mas namroblema ngà!”

I leksion? Kunni Karina: “Marrake laman i situasion nu ilimagmu i liwamu. Magga apitammu i resulta na kingnguam!”

Kagian na Biblia: “Sittam ngamin ay maruddu nga makaliwa.” (Santiago 3:2) Anna gitta na nasingattam, seniales na kinapakalinno anna kinamanakam nu aminammu i liwi-liwamu anna nu kuammu yatun insigida.

I tumunug nga dakkua ay maggigiammu ta liwi-liwamu. Kagian ni Vera: “Imammatakku i kada liwa bilang maketuddu nga ekspiriensa anna leksion nga makoffun niakan tapenu mabbalin tu mas mapia nga tolay anna maarubang tu mas makasta i situasion sonu tumunug.” Innattam nu kunnasim nga makua yatun.

Inikkom i bisikleta na yamam tapus nadaralmu. Anni i kuammu?

• Ariammu kagian anna inanamammu tu ari nakuan mapansin na yamam.

• Ikagim ta yamam nu anni talaga i nesimmu.

• Ikagim ta yamam i nesimmu ngem paliwatammu i tanakuan.

Ariammu nakapasa ta test megafu ta ariammu naggigiammu. Anni i kuammu?

• Marrasokka nga mariga i test.

• Aminammu nga liwamu nu ngatta ariammu nakapasa.

• Ikagim nga kalussaw naka na mestru.

 Toliammu i nakagi ira nga eksena, tapus nonopammu nga sikaw i (1) yamam anna (2) mestrum. Anni tamma i makagi nikaw na yamam anna mestrum nu insigida ka nga nakkagi ta kamalim? Anni tamma i makagida nikaw nu nilimagmu i kamalim?

Nonopammu i kamali nga nakuam ta nappasa nga dagun anna tabbagan i tumunug ira nga pakkiavu.

Anni nga kamali i nanonomu? Anni kingnguam?

• Nilimagku.

• Pinaliwaku i tanakuan.

• Insigida nga kinagì.

Nu ariammu inamin i kamalim, anni natagenomu kabalinna?

• Kekkasta​—nalusutakku yatun!

• Nakonsensia​—kinagì ngana laman nakuan i kurug.

Kunnasim nakuan inarubang tu mas makasta i situasion?

Anni i nagigiammum ta kamalim?

Ngatta ari aminan na karuan nga tolay i liwi-liwada?

Anni i makagi na totolay nikaw nu kanayummu nga ililimag i liwi-liwamu, ngem anni i makagida nikaw nu aminammu i liwi-liwamu?​—Lucas 16:10.