PAKKIAVU 3
Kunnasi Ngà Makiyuvovug ta Maganaku?
ANNI I KUAMMU?
Nonopammu yaw nga eksena: Gabi na Mierkules. Nabalin ngana ni Geoff, nga 17-anios, i trabahuna ta baleda yari tu puede ngana yaya mar-relaks! Niyetubanna ngana ta paboritona nga itubang tapus naggiraw tu TV.
Sakto ta pagitubanna, zimittal si Papa-na nga mapatu i uluna.
“Geoffrey! Ngatta maggigiraw ka mana tu TV imbes tu uffunammu nakuan i wagim nga magangngua tu asayment-na? Ariammu talaga maggigginna!”
“Hawe tam mangana,” niyananibig ni Geoff, ngem naginna ni Papa-na.
Minaranni si Papa-na. “Anni i kinagim, siko nga abbing?”
“Awan,” kunni Geoff nga agga-dafung i kimana.
Talaga mapporay ngana si Papa-na. “Ariannà tattabbagan tu kunnatun!” kagianna.
Nu sikaw si Geoff, anni nakuan i kingnguam tapenu nafugaddan yaw nga diskusion?
MAGIMMANG ANNA MANNONO!
Kagitta na pammaneho tu takay i pakiyuvovug ta maganamu. Nu egga nakabalandra ta dalan, puedem magaleg tu tanakuan nga ruta.
ANGNGARIGANNA:
“Marigatan ngà makiyuvovug ta yamà,” kagian na kabataan nga si Leah. “Nu mittan, egga kaga-kagiakku sa, tapus kagianna, ‘Pasensia, anni yari kinagim?’”
EGGA TALLU NGA OPSION NI LEAH.
-
Kullekanna i yamana.
Ikulle ni Leah, “Anni mabba, ginnannà gare ngay! Importante yaw!”
-
Iyemmanna i makiyuvovug ta yamana.
Arianna ngana kagian ta yamana i meyannung ta problemana.
-
Maginnag tu mas makasta nga tiempo tapus kagianna uli i problemana.
Makiyuvovug uli tu personal onu mattura si Leah ta yamana meyannung ta problemana.
Para nikaw, anni i irekomendam kani Leah?
NONOPAMMU: Egga tanakuan nga nononopan na yama ni Leah yari tu arianna ammu nga egga problemana. Nu pilian gafu ni Leah i Opsion A, posible nga arianna matindian na yamana nu ngatta makkukkulle yaya. Baka mas lallagu arianna magginna na yama ni Leah ta kagianna, anna ari nga mangipasingan yaw tu respeto anna dayaw ta yamana. (Efeso 6:2) Yatutta ari tu makoffun yaw nga opsion.
Nu kunnasi nga magaleg ka tu tanakuan nga ruta nu egga nakabalandra ta dalan, egga paga solusion tapenu makkasta i relasiommu ta maganamu
Pinakamabi nakuan i Opsion B, ngem ari gapa yatun i kapianan. Ngatta gapa? Tapenu maarubang tu mapia ni Leah i problemana, mawag tu kagianna yatun tapenu ammu na yamana nu anni i mesissimmu ta pattolena anna nu kunnasina yaya uffunan. Awan tu metuppal na ari tu pattattannug.
Ta Opsion C gapa, ari nga ipamavulun ni Leah nga arianna makagi ta yamana i problemana. Puruebanna lallagu kagian uli yatun ta tanakuan nga tiempo. Anna nu pilian ni Leah nga mattura ngana laman ta yamana, puede nga mabanna-bannayan yaya insigida.
Puede nga mekagina tu mapia i kayàna nga kagian nu mattura yaya. Nu mabibbig na yama ni Leah yatun, mammuanna nu anni i kayàna nga kagian sa tapenu mas matindianna nu anni i problemana. Yatutta makoffun parehu kada Leah anna yamana i Opsion C. Maski ta personal onu tura, matuttulna yaw nga opsion i tabarang na Biblia nga “kuan i ganna-gannug ira nga makeyawa ta imammo.”—Roma 14:19.
Anni paga i tanakuan ira nga puede nga kuan ni Leah?
Mannono ka tu awayyana kuan. Tapus, nonopammu gapa i puede nga resultana yatun.
MANAWAG NAKUAN I PATTABBAGMU
Nonopammu nga nu mittan, tanakuan i malippawa na maganamu ta kinagim.
ANGNGARIGANNA:
Iyavu na maganamu nu ngatta bad mood ka. Kagiammu, “Ariakku kayà pabbidan yatun.”
Ngem i maginna na maganamu: “Ariakku kuruga mattalo nikamu. Kagiakku ngana laman ta kokkofukku i problemà.”
Anni tamma nu egga dakal nga problemam tapus kayà naka uffunan na maganamu. Ngem kagiammu: “Ariannu mavurung. Kayà ngana yaw.”
-
Anni i posible nga maginna na maganamu?
-
Anni nakuan i mas makasta nga tabbagmu?
Baka Kaya Mu Gapa i
I MAKAGI NA KARUAN NGA KABATAAN
Kunnasì nga Kibbidan i Magana Ku?
Aru i benefisio nga malawa mu anne ta manono mu.
WHITEBOARD ANIMATION
Kunnasi Ngà Makibbida ta Magana Ku?
Kunnasi ka makibbida ta magana mu nu awan tu ganas mu nga makibbida?
