Nonopammu yaw nga eksena: Maddaggun mammaneho si David ta lugar nga ari ngana tu familiar sa. Base ta karatula ta dalan anna itsura na pallevu, tanakuan ngana nga lugar i dianna. Napansinna nga nawawan ngana yaya. Egga siguru tanakuan nga nakkurbanna.

Nu sikaw si David, anni i kuammu?

Egga ira pappiliammu:

1. Mangiyavu tu direksion.

2. Innan i mapa, onu mangusa tu GPS.

3. Itulu-tuloy laman i pammaneho, baka malegammu i fustu nga dalan.

Siguradu nga ari tu kakastan i opsion C.

Mas makasta i opsion B anne ta ollu. Tutal, awayyana nga egga mapa onu GPS ta interu biahe, nga mangigiya nikaw ta dalan.

Kunnatun gapa i meyuffun nikaw na Biblia!

Yaw nga pinakapopular nga libru ay makoffun

• ta problemam ira ta interu pattolem

• tapenu mas makilalam i baggim anna mabbalikka tu mas mapia nga tolay

• tapenu mapeggakka tu kakastan paga laman nga pattolay

Namegafu ta kabbing tam, aru ngana i pakkiavu tam.

• Ngatta asul i langi?

• Kunnasi naparatu i biti-bitun?

Tapus, namegafu tam makkiavu meyannung ta pallevu tam.

• Ngatta marake i mesissimmu?

• Ngatta matay i tolay?

Kunnasi nu egga balo ta Biblia i tabbag tatun ira nga pakkiavu?

Aru i mangikagi nga puru appe laman nga istoria i Biblia, dadana ngana, onu kuruga mariga matindian. Ngem i Biblia kari i problema, onu i nagigginna na totolay meyannung ta Biblia i talaga problema? Ari tamma tu falso i nammuadda?

Angngariganna, abbo na karuan nga kagian na Biblia nga i Dios kanu i kumokkontrol ta mundo. Ngem kurug kari yatun? Grabe gulu na mundo! Napakaru ziga-riga, taki anna patay, aru i pobre anna kalamidad. Imposible nga i meddu nga Dios i naggafuanna yaw!

Kayàmu kari nga mammuan i tabbag? Baka masorpresa ka ta tabbag na Biblia nu sinni i kumokkontrol ta mundo!

Awayyana tu napansimmu nga nebase ta Biblia i tabarang ira nga malegan taw nga brosiur. Kumbinsidu i Saksi ira ni Jehova nga mapammakatalakkan nga giya i Biblia megafu ta yaw ay “naggafu ta Dios, ay masserbi ta pangituddu ta kurug, pangivuya ta makaliwa, panunung ta ugo.” (2 Timoteo 3:16, 17) Mawag gafu nga gigiammuammu yaw nga nabayag ngana​—ngem moderno—​nga libru!