Nonopammu yaw nga eksena: Kada magispehu si Julia, kitattaba nga babay i masinganna. “Makkabbal ngà nakuan,” kagianna ta baggina​—maski kaga-kagian na magana anna kokkofunna nga “malapi” yaya.

Nabì paga, desperadu ngana si Julia nga mappakabbal maski “piga kilo laman.” Arianna laman kuman tu piga nga aggaw . . .

Nu natagenomu i kagitta na natageno ni Julia, anni i kuammu?

Ari gapa tu marake nga nonopammu i itsuram. Kakuruganna, kagian na Biblia nga makasta i itsura na piga nga babbay anna lallaki, gitta da Sara, Rachel, Abigail, Jose, anna David. Kagian na Biblia nga “kitagguapa” i babay nga mangngagan tu Abisag.​—1 Patul Ira 1:4.

Ngem aru nga tinedyer i kuruga agga-nonoda i itsurada. Awayyana nga marresulta yatun ta delikadu ira nga problema. Nonopammu:

• Ta tadday nga paggigiammu, 58 porsiento na babbay i makkagi nga overweight ira, ngem kakuruganna, 17 porsiento laman nira i talaga kunnatun.

• Ta tanakuan gapa nga paggigiammu, 45 porsiento na babbay nga talaga underweight i makkagi nga sobra i dammoda!

• Megafu ta desperadu ira nga mappakabbal, nattaki i karuan nga tinedyer tu anorexia​—delikadu nga taki megafu ta arianna kumu-kuman na tadday.

 Nu egga sintomas na anorexia nikaw onu tanakuan paga nga taki ta pakkakan, mappoffukka. Kagian ta maganamu onu ta tanakuan nga mapammakatalakkan nga adulto. Kagian na Biblia: “I kurug nga kofun ay mangaya ta ngamin nga tiempo, anna wagi nga meyana ta tiempo na ziga.”​—Proverbio 17:17.

I kurug, magustuan onu ari na totolay i tadday depende ta kata-katolena. Innan i ana ni Patul David nga si Absalom. Kagian na Biblia:

“Awan ngana tu lalaki nga kuruga medaya-rayaw megafu ta kaguapo na itsurana. . . . Awan tu mevuya sa.”​—2 Samuel 14:25.

Ngem kuruga minappakatannang, ambisioso, anna traidor yaw nga kabataan nga lalaki! Yatutta ari tu makasta i imahe ni Absalom ta Biblia; mabibbig nga awan tu pasiranna, ari tu matalo, anna awayyana nga mamatay megafu ta lussaw.

Yari tu itabarang nittam na Biblia:

“Sinnungannu i bagginu tu bagu nga personalidad.”​—Colosas 3:10, NW.

“I kasta nu ay mawag tu ari nga maggafu ta pappakappia ta vu, pangiyusa ta ala-alahas anna mangina ira nga sinnun, nu ari ta mapia nga affutu-futuan.”​—1 Pedro 3:3, 4.

Ari gapa marake nga kayàmu nakuan tu makasta i itsuram, ngem mas importante tatun i personalidadmu. Ta ultimona, mas magustuan na tanakuan i mapia ira nga kualidad anne ta makasta nga forma na baggi! “Mabi ka mapansin nu guapa ka,” kagian na babay nga si Phylicia, “ngem i kata-katolem anna i makasta ira nga kualidadmu i ari vuluvuga makattamman na totolay nikaw.”

Kanayukka kari madismaya ta itsuram?

Nanonomu kari ngana nga mapparetoke onu sobra nga mad-diet tapenu makkasta i itsuram?

Nu posible, anni i kayàmu ulian ta itsuram? (Lipakkammu i ngamin nga tabbagmu.)

• KATANNANG

• DAMMO

• VU

• FORMA NA BAGGI

• MUKA

• KOLOR NA TABBI

Nu wan i tabbagmu ta ollu anna mekadua nga pakkiavu anna nilipakkammu i tallu onu mas aru paga ta mekatallu, nonopammu yaw: Dakal i tiansa nga ari gapa tu kunnari ka-negatibo i paningan na tanakuan ira nikaw gitta na paningammu ta baggim. Mabi laman nga mabbalin tu ari nga rasonable i pagimammamu anna kuruga mavurungakka ta itsuram.​—1 Samuel 16:7.