1, 2. Anni i mawag tam nga malippawa meyannung kani Satanas anna ta demonio ira?

MAKAKKASTA noka i pattolay ta bagu nga mundo ni Jehova. Mattolay ittam gabbalaman noka segun ta ginakkag na Dios nga pattoletam. Ngem ta maddaggun, mattolay ittam ta mundo nga kontroladu ni Satanas anna na demoniona ira. (2 Corinto 4:4) Maski nu ariattam ira masingan, kurug ira anna kuruga makapangngua.

² Taw nga kapitulo, gigiammuattam nu kunnasi ittam mattalupaddian nga madukko kani Jehova anna nu kunnasi tam maprotektan i baggi tam kani Satanas. Ipromesa ni Jehova nga uffunanna ittam. Ngem mawag nga malippawa tam i taktika ira ni Satanas anna na demonio ira tapenu ilogo anna takitan ittam.

3. Anni i kayà nga kuan nittam na Diablo?

³ Ikakkagi ni Satanas nga dayawan na totolay si Jehova megafu ta makasarili ira nga rason anna magimmang ira nga masserbi Nisa nu marriga i situasion. (Bibbigan i Job 2:4, 5.) Nu egga i maya nga makilala si Jehova, masingan yatun ni Satanas anna na demonio ira, yatutta puruebadda nga fugaddan yatun nga tolay. Mapporay ira nu idedika na tadday i baggina kani Jehova anna mappabawtiso. Nikumpara na Biblia  i Diablo ta “mangngana-nganangngar nga leon nga magaleg ta kanan na.” (1 Pedro 5:8) Ikaya ni Satanas nga daralan i relasiottam kani Jehova.​—Salmo 7:1, 2; 2 Timoteo 3:12.

4, 5. (a) Anni i ari nga makua ni Satanas? (b) Anni i kebalinan na ‘kontrannu i Demonio’?

⁴ Ngem ariattam nakuan maganassing kani Satanas anna ta demoniona ira. Niddan ni Jehova tu limitasion i makuada nittam. Nipromesa ni Jehova nga “magaru nga totolay” nga kurug nga Cristiano i mapaliag noka ta “nepallo nga kadara-darum.” (Nepakannammu  7:9, 14) Awan tu maski anni nga makua na Diablo tapenu fugaddan i kesimmu natun, megafu ta protektan ni Jehova i totolena.

⁵ Nu mattalupaddian ittam nga madukko kani Jehova, ari nga madaral ni Satanas i relasiottam Nisa. Ipasiguradu na Uvovug na Dios nittam: “Mattalupaddian nikamu si Jehova adde ta mattalupaddiakkamu sa.” (2 Cronicas 15:2; bibbigan i 1 Corinto 10:13.) Aru nga matalo nga lallaki anna babbay tagga, gitta da Abel, Enoc, Noe, Sara, anni Moises, i nattalupaddian nga madukko kani Jehova yatutta nawayyada nga kontran i Demonio. (Hebreo 11:4-40) Makua tam gapa yatun. Nipromesa na Uvovug na Dios: “Tubangan [onu kontran] nu i Demonio, ay arayyuan nakamu.”​—Santiago 4:7.

6. Kunnasi ittam atakeyan ni Satanas?

⁶ Maski nu ammu ni Satanas nga limitadu i makuana nittam megafu kani Jehova, kuanna i maski anni tapenu pakkafian i relasiottam ta Dios. Ta maddaggun, nadduruma i pangatake na Diablo nittam, anna mangusa yayya tu taktika ira nga rinivu dagun ngana nga usu-usanna. Anni i karuan tatun?

7. Ngatta atakeyan ni Satanas i totolay ni Jehova?

⁷ Nitura ni apostol Juan: “I mundo ay egga ta pammaguray na Demonio.” (1 Juan 5:19) Kontroladu ni Satanas yaw nga marake nga mundo anna kayàna gapa nga kontrolan i totolay ni Jehova. (Mikias 4:1; Juan 15:19; Nepakannammu 12:12, 17) Ammu na Diablo nga baddi ngana laman nga tiempo i navuna para nisa yatutta kuanna i ngamin tapenu marigatan ittam anna mabbalin tu ari matalo ta Dios. Nu mittan, direkta i  pangatake na Diablo, ngem nu karuan gapa ari nga mataga-tageno yatun.

8. Anni i mawag nga ammuan na kada Cristiano?

⁸ Mabibbig tam ta Efeso 6:12: “Arubangat-tam [“labanattam,” NW ] . . . i marakay ira nga espiritu.” Makillaban i kada Cristiano kontra ta Diablo anna ta demonio ira. Mawag nga ammu tam nga kasali taw nga pakillaban ngamin danuri maddedika kani Jehova. Ta turana ta taga-Efeso, mamittallu nga pinagaram ni apostol Pablo i Cristiano ira nga “tumaddag nga matuyag.”​—Efeso 6:11, 13, 14, NW.

9. Anni i purueban nga kuan ni Satanas nittam anna na demonio ira?

⁹ Nadduruma i pangilogo ni Satanas anna na demonio ira. Ari nga megafu ta nalabanattam i tadday nga silu ni Satanas ay arianna ngana ittam melogo ta tanakuan nga siluna. Ala-alegan na Diablo i pakkafiattam ira tapenu mapilina i silu ira nga mangilogo nittam. Ngem ari ittam mappelogo, megafu ta ituddu nittam na Biblia i meyannung ta silu ira na Diablo. (2 Corinto 2:11; innan i Endnote 31.) Tadday taw ay i demonismo.

10. (a) Anni i demonismo? (b) Anni i pagimamma ni Jehova ta demonismo?

¹⁰ Tumukoy i demonismo ta misterioso ira nga gannug nga mangiyaranni ta tadday nga tolay ta demonio, gitta na pallavvun, passalamangka, pattamay, onu pakiyuvovug ta natay. Kagian na Biblia nittam nga “ikalussaw” na Dios i demonismo anna ari ittam puede makiparte tatun anna maddayaw gapa kani Jehova. (Deuteronomio 18:10-12; Nepakannammu 21:8) Mawag nga interamente nga lillitan na Cristiano ira i ngamin nga klase na demonismo.​—Roma 12:9.

11. Anni i parresultan na paginteres ta misterioso ira nga gannug?

 ¹¹ Ammu ni Satanas nga nu interesadu ittam ta misterioso ira nga gannug, mabi laman para nisa nga iyaranni ittam ta demonismo. Daralan na maski anni nga klase na demonismo i relasiottam kani Jehova.

12. Anni i kayà ni Satanas nga nonopattam?

¹² Gulu-guluan ni Satanas i appana-panono na totolay. Sisinu yayya nga mangimula tu padduda adde ta nonopan na totolay nga “marake i mapia anna mapia i marake.” (Isaias 5:20) Ikaya na Diablo nga nonopattam nga ari makoffun i tabarang na Biblia anna mas nga magayayya ittam nu ariattam importan i estandarte ira na Dios.

13. Kunnasi mangimula si Satanas tu padduda?

¹³ I pangimula tu padduda i tadday ta pinaka-efektibo nga taktika ni Satanas. Nabayagna ngana nga usu-usan yatun. Ta hardin na Eden, pinuruebanna nga mangimula tu padduda turi ta niyavuna kani Eva: “Kurug kari nga kinagi na Dios nga ari kamu kuman ta vunga na kada kayu ta hardin?” (Genesis 3:1) Ta kaggawan ni Job, niyavu ni Satanas kani Jehova ta arubang na anghel ira: “Maganassing kari ta Dios si Job nga awan tu rason?” (Job 1:9) Kabalin nga nabawtisowan si Jesus, pinurueban yayya ni Satanas gukaban na pakkagina: “Nu kurug tu sikaw i Ana na Dios, pabbalinam-mu tu pan danoye nga batu.”​—Mateo 4:3.

14. Anni i kukukuan ni Satanas tapenu ari nga nonopan na totolay nga peligroso i demonismo?

¹⁴ Ta maddaggun, tulu-tuloy lagapa nga mangimula i Diablo tu padduda. Palawananna nga ari tu marake i karuan nga klase na demonismo tapenu nonopan  na totolay nga ari nga peligroso yatun. Maski i karuan nga Cristiano ay nabiktima tatun. (2 Corinto 11:3) Anni gafu i puede tam nga kuan tapenu maprotektan i baggi tam? Kunnasi tam masiguradu nga ari ittam melogo ta taktika ira ni Satanas? Gigiammuattam i dua nga pangilogona: dibersion anna papporu.

15. Kunnasi ittam makiparte ta demonismo gukaban na dibersion?

¹⁵ Ta kaggawattam, masingan ta aru nga pelikula, video, pagiraw ta TV, gayam ira ta kompiuter, anna site ira ta Internet i demonio ira, mahika, anna misterioso ira nga pakapangngua. Aru i mannono nga awan tu peligro natun anna ariadda masingan i peligro nga pata-patallungadda i demonio ira ta pattoleda. Awayyana nga makiparte i tadday nga tolay ta demonismo gukaban na horoscope, pagipalag, tarot card, anna bola nga kristal. Itatagu na Diablo i peligro anna palawananna nga misterioso, kappabbaw, anna kappagayayya danatun. Baka manono paga na tadday nga awan tu peligro ta paggiraw ta gannug nga makademonio onu misterioso basta ari yayya aktual nga makiparte ta demonismo. Ngatta peligroso yatun nga appana-panono?​—1 Corinto 10:12.

16. Ngatta mawag nga pammanakitattam i dibersion ira nga meyannung ta misterioso ira nga gannug?

¹⁶ Ari nga mabibbig ni Satanas anna na demonio ira i nono tam. Ngem mammuadda i kayà tam anna i nononopattam megafu ta obserbadda i pili-piliattam para ta baggi tam anna ta familia tam, nelagum ngana i piliattam nga dibersion. Nu pinili tam i pelikula, musika, onu libru ira meyannung ta espiritista, salamangka,  sinallungan na demonio, annamay, vampira, onu karuan paga nga kagitta natun, mammuan ni Satanas anna na demonio ira nga interesadu tam nira. Yatutta mas tentadda ittam nga makiparte ta demonismo.​—Bibbigan i Galacia 6:7.

17. Kunnasi nga samantalan ni Satanas i pakkaraga tam nga mapeggan tu makasta nga gawa-gawayyan?

¹⁷ Puede gapa nga samantalan ni Satanas i pakkaraga tam nga mapeggan tu makasta nga gawa-gawayyan. Aru ta maddaggun i mattaki. Baka pinurueban na tadday i nadduruma nga papporu ngem ari lagapa nammapia. (Marcos 5:25, 26) Puede nga desperadu ngana yayya  nga purueban i maski anni. Ngem bilang Cristiano, mawag tam nga magimmugug ta papporu nga mangusa tu “passalamangka.”​—Isaias 1:13.

18. Anni ira nga papporu i mawag nga lillitan na Cristiano ira?

¹⁸ Ta Israel tagga, egga karuan nga nangusa tu “passalamangka.” Kinagi ni Jehova nira: “Nu ivullagnu i palagnu, ariattakamu nga innan. Maski nu mamippiga kamu maddasal, ari ngà magginna.” (Isaias 1:15) Nonopan ngana laman yatun—ari nga gigginnan ni Jehova i pakimalloda ira! Manaki tam nga kuan i maski anni nga manaral ta relasiottam kani Jehova anna mangifugag nisa nga uffunan ittam, netallugaring nu mataki ittam. (Salmo 41:3) Yatutta mawag nga ammuattam nu konektadu ta demonismo onu misterioso ira nga pakapangngua i papporu nga nononopattam. (Mateo 6:13) Nu konektadu yatun, mawag nga lillitattam!​—Innan i Endnote 32.

19. Kunnasi nga ana-anassingan na Diablo i aru nga totolay?

¹⁹ Maski nu nonopan na karuan nga imahinasion laman i Diablo anna i demonio ira, ammu na karuan nga kurug danatun megafu ta personal ira nga ekspiriensada. Aru i maganassing ta marake ira nga espiritu anna mangurug ta rehiya ira. Ananassingan gapa na karuan i tanakuan gukaban na pangistoria ta marake nga kukukuan na demonio ta totolay. Maruddu nga mappabbaw i totolay ta kunnatun ira nga istoria anna istoriadda gapa yatun ta tanakuan. Danatun nga istoria i mamaganassing ta totolay ta Diablo.

20. Kunnasi tam puede nga mewara i kinaladdug ira ni Satanas?

²⁰ Nonopan yaw—kayà ni Satanas nga maganassing i totolay nisa. (2 Tesalonica 2:9, 10) Laddug yayya anna  ammuna nu kunnasi nga influwensian i nono danuri interesadu ta demonismo tapenu kurugadda i ganna-gannug nga ari kurug. Awayyana nga mangistoria danatun nga totolay meyannung ta pagabboda nga naginna anna nasingadda. Nu mas nga ipaka-pakoli na totolay danatun nga istoria, mas nga mammammungan danatun. Ariattam vuluvuga kagian ta tanakuan i kunnatun ira nga istoria megafu ta gittana tuttudduattam i totolay nga maganassing kani Satanas.​—Juan 8:44; 2 Timoteo 2:16.

21. Imbes nga paggiristorian i demonio ira, anni i awayya tam paguvovugan?

²¹ Nu egga i ekspiriensa na aripan ni Jehova ta demonio ira, arianna nakuan ipakoli yatun tapenu laman mapagayayya i tanakuan. Ari nakuan maganassing i totolay ni Jehova ta maski anni nga makua na Diablo anna na demoniona ira. Lallagu, mawag nga maffokus ittam kani Jesus anna ta pakapangngua nga neyawa ni Jehova nisa. (Hebreo 12:2) Ari nga nangistoria si Jesus ta disipulosna meyannung ta demonio ira. Naffokus yayya ta mensahe na Pappatulan anna ta “makapabbaw ira nga kingngua na Dios.”​—Kingngua 2:11; Lucas 8:1; Roma 1:11, 12.

22. Anni i determinadu nga kuammu?

²² Ariattam kattaman nga gakkag ni Satanas nga daralan i relasiottam kani Jehova. Kuanna i maski anni tapenu mesimmu yatun. Ngem ammu tam i taktika ira na Diablo anna determinadu ittam nga lillitan i ngamin nga klase na demonismo. Ariattam nga “iddan i Demonio ta lugar” tapenu pakkafian i determinasiottam. (Bibbigan i Efeso 4:27.) Wan, nu kontrattam i Diablo, ari ittam melogo ta siluna ira anna protektadu ittam ni Jehova.​—Efeso 6:11, NW.