1-3. (a) Anni i matageno na aru nga tolay meyannung ta trabahuda? (b) Anni ira nga pakkiavu i ikonsidera tam taw nga kapitulo?

MALLALLAPPO nga mattrabahu i totolay ta interu mundo tapenu suportan i baggida anna i familiada. Aru i manakida i trabahuda anna maganassing paga lagu i karuan nga tullung ta trabahu kadaggaw. Nu kunnatun i matageno mu, anni i kuammu tapenu mas ma-enjoy mu i trabahum? Kunnasi ka mabbalin tu magayayya ta trabahum?

² Kagian ni Jehova nittam: “Kada tadday nakuan ay kuman anna minum anna magayayya ta ngamin nga malappo nga pattrabahuna. Yatun ay regalu na Dios.” (Eclesiastes 3:13) Pinaratu ittam ni Jehova nga egga i pakawagan anna pakkaraga nga mattrabahu. Ikayana nga magayayya ittam ta kukukuattam.​—Bibbigan i Eclesiastes 2:24; 5:18.

³ Anni gafu i makoffun nittam tapenu magayayya ta trabahu tam? Anni ira nga klase na trabahu i mawag nga lillitan na Cristiano ira? Kunnasi tam nga mabalanse i trabahu tam ta paddayaw kani Jehova? Anna anni i pinaka-importante nga trabahu nga awayya tam kuan?

4, 5. Anni i pagimamma ni Jehova ta trabahu?

⁴ Kakayà ni Jehova i mattrabahu. Mabibbig ta Genesis 1:1: “Ta gafa-gafu pinaro na Dios i langi anna i davvun.”  Kabalin nga pinaratu na Dios i davvun anna i ngamin nga egga tatun, kinagina nga “makakkasta” i pinaratuna. (Genesis 1:31) Magayayya i Namaratu nittam ta kingnguana.​—1 Timoteo 1:11.

⁵ Ari vuluvuga magimmang si Jehova ta pattrabahu. Kinagi ni Jesus: “Awan tu immang na Yamà nga makatara-trabahu.” (Juan 5:17) Maski nu ariattam ammu i ngamin nga kappabbaw nga kukukuan ni Jehova, ammu tam i karuan tatun. Pippilianna i makavulu noka na Anana nga si Jesu-Cristo nga mammaguray bilang parte na Pappatulan. (2 Corinto 5:17) Aktibo gapa nga igiggiya anna tattangngallan ni Jehova i totolay. Megafu ta interu-mundo nga pallayyagayya, minillion ngana i makannammu kani Jehova anna napeggan tu iddanama nga mattolay tu mannanayun ta paraiso nga davvun.​—Juan 6:44; Roma 6:23.

6, 7. Anni nga klase nga trabahador si Jesus?

⁶ Kakayà ni Jesus i mattrabahu gitta na Yamana. Nige yayya minay ta davvun, si Jesus i “malalaki nga trabahador” na Dios nga kavuluna nga namaratu ta ngamin nga gannug ta langi anna ta davvun. (Proverbio 8:22-31; Colosas 1:15-17) Ta kegga ni Jesus ta davvun, nallallappo yayya ta pattrabahu. Mabbing paga laman yayya ngem malalaki ngana nga karpinteru nga mamadday tu muebles anna posible nga mamadday tu balay ira. Kuruga malalaki si Jesus ta trabahuna yatutta nagalan yayya bilang “i karpinteru.”​—Marcos 6:3.

⁷ Ngem i pinaka-importante nga trabahu ni Jesus taw ta davvun ay i pallayyagayya ta mapia nga dumug anna panuddu ta totolay meyannung kani Jehova. Egga i tallu-gaddua dagun ni Jesus tapenu balinan i ministeriona, anna nallallappo yayya nga nallayyagayya mamegafu ta umma adde ta gabi. (Lucas 21:37, 38; Juan  3:2) Nilakag ni Jesus i ginatu nga kilometro na ginavu ira nga dalan tapenu ilayyagayya i mapia nga dumug ta aru nga totolay.—Lucas 8:1.

8, 9. Ngatta magayayya si Jesus ta trabahuna?

⁸ Para kani Jesus, i pagangngua ta trabahu na Dios ay gittana makan. Yatun i mangiyawa nisa tu sikan. Egga ira i aggaw nga ari ngana nga makakan si Jesus megafu ta sobra i lappona. (Juan 4:31-38) Inapprobetsana i kada oportunidad tapenu uffunan i tanakuan nga mammuan i meyannung ta Yamana. Yari tu makagina kani Jehova: “Nipasingak-ku ngana i dayom toye ta utun na davvun, ta netuppal ku ngana i nipakuam niakan.”​—Juan 17:4.

⁹ Manawag nga malallappo nga mattrabahu si Jehova anni Jesus anna magayayya ira ta trabahuda. Kayà tam nga ‘parigan i Dios,’ anna kayà tam nga ‘tuttulan si Cristo.’ (Efeso 5:1; 1 Pedro 2:21) Yari tu mallallappo ittam nga mattrabahu anna kuan i adde na mawayya tam ta maski anni nga kuattam.

10, 11. Anni i makoffun nittam nga mapeggan tu positibo nga pagimamma ta trabahu tam?

¹⁰ Bilang totolay ni Jehova, mallallappo ittam tapenu suportan i baggi tam anna i familia tam. Kayà tam nga magayayya ittam ta trabahu tam, ngem ari tu mabi yatun. Anni gafu i awayya tam nga kuan nu ari ittam magayayya ta trabahu tam?

¹¹ Mabbalin tu positibo. Posible nga ariattam nga moli i lugar onu i karu na trabahu tam, ngem moli tam i pagimamma tam. Makoffun nu alippawatattam i ekspektan ni Jehova nittam. Angngariganna: Ekspektan ni Jehova nga iyawa na ulu na familia i pakawagan na  familiana adde ta mawayyana. Kakuruganna, kagian na Biblia nga i tadday nga arianna meyawa i pakawagan na familiana ay “mas marakay anne paga ta ari nga Cristiano.” (1 Timoteo 5:8) Nu ulu ka na familia, mattrabahu ka tu mapia tapenu meyawa mu i pakawagan na familiam. Maski nu ikaya mu onu manaki mu i trabahum, ammum nga gukaban na pangiyawa mu ta pakawagan na familiam, mapagayayya mu gapa si Jehova.

12. Kunnasi ittam mabbenefisio ta pabbalin tu malappo anna mapammakatalakkan?

¹² Mabbalin tu malappo anna mapammakatalakkan. Makoffun yatun tapenu mas magayayya ka ta trabahum. (Proverbio 12:24; 22:29) Mattalo i boss mu nikaw. Tagibaloran na boss ira i mapammakatalakkan ira nga empleyadu megafu ta ari ira makkoko tu kuartu, materiales, onu tiempo. (Efeso 4:28) Mas importante, ammu ni Jehova nu malappo ka anna mapammakatalakkan. Mapeggakka tu ‘marenu nga konsensia’ megafu ta ammum nga napagayayya mu i Dios nga ayatammu.​—Hebreo 13:18; Colosas 3:22-24.

13. Anni paga i efektona nu mapammakatalakkan ittam ta trabahu?

¹³ Nonopan nga makedayaw kani Jehova i konduktam ta trabahum. Yatun i tadday paga nga rason nu ngatta magayayya ittam ta trabahu tam. (Tito 2:9, 10) Posible paga nga megafu ta makasta nga ehemplom, mapaguyu i tadday ta katrabahum ira nga maggigiammu tu Biblia.​—Bibbigan i Proverbio 27:11; 1 Pedro 2:12.

14-16. Anni i mawag nga ikonsidera tam nu mappili tu trabahu?

¹⁴ Ta Biblia, awan tu lista na trabahu ira nga mawag nga akseptan onu pammanakitan na tadday nga Cristiano. Ngem egga tatun i prinsipio ira nga makoffun nittam  nga makapaddesision tu fustu meyannung ta trabahu. (Proverbio 2:6) Ta uffun na prinsipio ira ta Biblia, iyavu mu ta baggim i tumunug ira nga pakkiavu.

¹⁵ Mekompromisò kari i bilin ni Jehova taw nga trabahu? Nagigiammu tam i annangngua nga ikalussaw ni Jehova, gitta na pakkoko anna palladdug. (Exodo 20:4; Kingngua 15:29; Efeso 4:28; Nepakannammu 21:8) Yatutta magimmugug ittam tapenu malillitan i maski anni nga trabahu nga mekontra ta estandarte ira ni Jehova.​—Bibbigan i 1 Juan 5:3.

 ¹⁶ Supu-suportan kari naw nga trabahu i anangngua nga ikalussaw ni Jehova? Angngariganna, kunnasi nu i neyofer nikaw nga trabahu ay maddispatcha ta tienda nga mallaku tu sigariliu? Awan tu marake ta pallaku. Ngem ammum i pagimamma ni Jehova ta passigariliu. Yatutta maski nu ari tu sikaw i mismu nga massigariliu, ari kari nga tuttudduammu i tanakuan nga ‘parittan i baggida’?​—2 Corinto 7:1.

17. Anni i makoffun nittam nga magangngua tu desision nga mamagayayya ta Dios?

¹⁷ Nu iyaplika tam i makadios ira nga prinsipio, mabbalin ittam tu klase na tolay nga nadeskriba ta Hebreo 5:14 “nga napenam ngana nga maningan ta nadduman na mapia anna marakay.” Iyavu mu ta baggim: ‘Nu akseptakku yaw nga trabahu, mesiddukal kari i tanakuan? Ikiddaw kari naw nga trabahu nga panawakku i atawà anna i ána ku anna umay ta tanakuan nga nasion? Kunnasi ira mafektan tatun?’

18. Ngatta awayyana nga mariga para nittam nga mattalupaddian nga nakafokus ta paddayaw tam?

¹⁸ Awayyana nga mariga nga ipoppollu i paddayaw tam kani Jehova taw ira nga tiempo na “ziga-riga.” (2 Timoteo 3:1) Mariga i magaleg tu trabahu anna mattalupaddian tatun. Mawag nga tangngallattam i familia tam ngem ammu tam nga mawag nga pagolluattam i paddayaw tam. Ariattam ipamavulun nga mabbalin tu kuruga importante i material ira nga gannug ta pattoletam. (1 Timoteo 6:9, 10) Kunnasi tam gafu mapaggiddan nga “pilian i kapianan ta ngamin” anna meyawa gapa i pakawagan na familia tam?​—Filipos 1:10.

19. Kunnasi nga makoffun nittam i pattalo kani Jehova tapenu mabbalin ittam nga balanse ta trabahu tam?

 ¹⁹ Kanayun nga mattalo kani Jehova. (Bibbigan i Proverbio 3:5, 6.) Mattalo ittam nga ammu na Dios i eksakto nga kawagattam anna talaga ikavurunganna ittam. (Salmo 37:25; 1 Pedro 5:7) Kagian na Uvovugna nittam: “Iyarayyu nu i attolay nu ta pangaya ta kuartu, anna makkontento kamu ta anni laman nga egga nikamu. Ta kinagi na Dios, ‘Ariat-taka vuluvuga nga panawan, ni et-taka nga pagurayan.’” (Hebreo 13:5) Manaki ni Jehova nga kanayun nga ikavurungattam i pangiyawa ta pakawagan na familia tam. Mamippiga ngana nga nipasinganna nga meyawana i pakawagan na totolena. (Mateo 6:25-32) Maski nu anni i situasion ta trabahu tam, regular nga gigiammuattam i Uvovug na Dios, ilayyagayya i mapia nga dumug, anna magatende ta study tam ira.​—Mateo 24:14; Hebreo 10:24, 25.

20. Kunnasi tam mapattalupaddian tu simple i pattoletam?

²⁰ Pattalupaddianan nga nakafokus i matam. (Bibbigan i Mateo 6:22, 23.) Kayàna kagian yatun nga pattalupaddianammu nga simple i pattolem tapenu makapaffokus ka ta passerbi kani Jehova. Ammu tam nga ari kinasirib nu mabbalin tu mas importante para nittam i kuartu, makasta nga pattolay, onu i pinakabagu ira nga gadyet anne ta relasiottam ta Dios. Anni gafu i makoffun nittam nga pagolluan i importante ira nga gannug? Kuattam nakuan i adde na mawayya tam tapenu mebita i maggatu. Nu egga i gatu mu, mapplano nu kunnasim mapakarianan onu mapagan ngamin yatun. Nu ari ittam magimmugug, posible nga apan na material ira nga gannug i tiempo anna sikattam tapus baka awan ngana tu tiempo tam nga makimallo, maggigiammu, onu mallayyagayya. Imbes nga pabbalinan tu komplikadu i pattolay megafu ta material ira nga gannug, makontentu  ittam nakuan ta primeru ira nga pakawagattam gitta na “kanan anna passinnut-tam.” (1 Timoteo 6:8) Anna maski nu anni i situasiottam, makasta nu usitakkattam yatun saggi-mittan tapenu masingan nu kunnasi tam paga mas nga makapasserbi kani Jehova.

21. Ngatta mawag tam i maddesision nu anni i nabalor ta pattoletam?

²¹ Mapeggan tu fustu nga prayoridad. Mawag tu masirib i pangusa tam ta tiempo, sikan, anna material ira nga gannug nga egga nittam. Nu ari ittam magimmugug, apan na ari kuruga importante ira nga gannug gitta na edukasion onu kuartu i nabalor nga tiempo tam.  Kinagi ni Jesus: “Asiguran nu . . . nga aleran i meyannung ta Pammaguray.” (Mateo 6:33) Ipasingan na pippiliattam, kukukuattam ta kadaggaw, anna plano tam ira nu anni i nabalor ta futu tam.

22, 23. (a) Anni i pinaka-importante nga trabahu tam bilang Cristiano? (b) Anni i makoffun nittam nga magayayya ta trabahu tam?

²² I pinaka-importante nga trabahu tam ay i passerbi kani Jehova anna i pangilayyagayya ta mapia nga dumug ta tanakuan. (Mateo 24:14; 28:19, 20) Kagitta ni Jesus, kayà tam nga kuan i adde na mawayya tam taw nga trabahu. Nagali i karuan nu sitaw mas dakal i pakawagan ta mallayyagayya. Maggigiammu gapa i karuan tu tanakuan nga lengguahe tapenu makapallayyagayya ira ta totolay nga kunnatun i paguvovugda. Makiyuvovug ka ta totolay nga kunnatun i kingnguada, anna iyavu mu nira i meyannung tatun. Ikagida nikaw nga nabbalin ira tu mas magayayya anna egga kebalinan na pattoleda.​—Bibbigan i Proverbio 10:22.

²³ Ta maddaggun, aru nittam i mangufu tu aru nga oras ta tadday nga trabahu onu ta nadduruma nga trabahu tapenu laman meyawa i primeru nga pakawagan na familia tam. Ammu ni Jehova yatun, anna appresianna i ngamin nga kukukuattam tapenu tangngallan i familia tam. Itulu-tuloy tam gafu nga parigan si Jehova anni Jesus gukaban na malallappo nga pattrabahu maski nu anni nga klase na trabahu i kuattam. Anna daddammattam nakuan nga i pinaka-importante nga trabahu tam ay i passerbi kani Jehova anna i pangilayyagayya ta mapia nga dumug na Pappatulan na Dios. Yaw i makeyawa nittam tu kurug nga pagayayya.