1. Anni i mawag tam kuan tapenu masiguradu tam nga makapagayayya kani Jehova i paddayaw tam, anna ngatta?

KINAGI ni Jesus: “Danuri i kurug nga maddaya-rayaw ta Yama ay daya-rayawad-da yaya ta Espiritu anna kakurug, ta i kuddanatun i aleran na Yama tu maddaya-rayaw sa.” (Juan 4:23; 6:44) Kada tadday nittam ay ‘ammuattam nakuan nu anni i makapagayayya ta Yafu.’ (Efeso 5:10) Ari tu kanayun nga mabi yatun. Ilologo ittam ni Satanas tapenu kuattam i gannug ira nga kalussaw ni Jehova.​—Nepakannammu 12:9.

2. Iyesplika nu anni i nesimmu aranni ta Vukig Sinai.

² Kunnasi ittam ilologo ni Satanas? Parigatanna ittam nga ammuan nu anni i fustu anna nu anni i mali. Innattam i nesimmu ta nasion na Israel gari turi ta nakkampu ira aranni ta Vukig Sinai. Minune si Moises ta vukig, anna iinnaggan na totolay i panolina ta kampu. Tapus, nofu i pasensiada ta paginnag yari tu nikiddoda kani Aaron nga mamadday tu dios para nira. Namadday yayya tu vulawan nga estatua na uvvun nga baka. Kabalinna, naffiesta i totolay. Nattatala ira ta pallevu na baka anna nakkummag ira tatun. Nangurug ira nga nu makkummag ira tatun, si Jehova i dayarayawadda. Ngem maski ninonoda nga yatun ay “fiesta para kani Jehova,” ari lagapa fustu i kingnguada. Para kani Jehova, idolatria  yatun, yari tu aru nira i natay. (Exodo 32:1-6, 10, 28) Anni i leksion para nittam? Ari mappelogo. ‘Ariattam siggeran i maski anni nga maritta,’ kayàna kagian nga ari ittam makiparte ta maski anni nga annangngua na falsu nga relihion. Ipamavuluttam nakuan nga si Jehova i manuddu nittam nu anni i fustu anna nu anni i mali.​—Isaias 52:11; Ezekiel 44:23; Galacia 5:9.

3, 4. Ngatta makasta nga gigiammuan i naggafuan na aru nga popular nga selebrasion?

³ Ta kegga ni Jesus ta davvun, sinanayna i apostolesna nga mangipasingan tu makasta nga ehemplo na marenu nga paddayaw. Kabalin na patena, tulu-tuloy lagapa nga nituddu na apostolesna i prinsipio ira ni Jehova ta bagu nga disipulos. Ngem ta patay na apostoles, nigafu na falsu ira nga gumattuddu nga itallung i falsu ira nga tuddu anna pagano ira nga kostumbre anna selebrasion ta kongregasion. Sinaliadda paga lagu i agal ta karuan nga pagano nga selebrasion tapenu mallawan tu gittana para ta Cristiano danatun. (2 Tesalonica 2:7, 10; 2 Juan 6, 7) Aru tatun nga selebrasion i popular paga ta maddaggun, anna ipagaramda paga i falsu ira nga tuddu, maski paga lagu i demonismo. *​—Nepakannammu 18:2-4, 23.

⁴ Ta mundo ta maddaggun, importante nga parte na pattolay i selebrasion anna fiesta ofisial ira. Ngem, durante nga mas magigiammum paga i pagimamma ni Jehova ta ganna-gannug, baka egga i mawag tu uliammu ta pagimamma mu ta karuan nga selebrasion. Ari tu alistu yatun, ngem makasiguradu ka nga duffunan  naka ni Jehova. Gigiammuan i naggafuan na karuan nga popular nga selebrasion tapenu malippawa tam nu anni i matageno ni Jehova tatun ira.

5. Anni nga ebidensia i mangipasingan nga ari neyana si Jesus ta Disiembre 25?

⁵ Ta aru nga parte na mundo, meselebra i Krismas ta Disiembre 25, nga nonopan na aru nga tolay nga aggaw na nikeyana ni Jesus. Ari kagian na Biblia nittam nu anni i eksakto nga aggaw onu vulan na nikeyana ni Jesus, ngem iddan ittam natun tu ideya ta tiempo na nikeyanana. Nitura ni Lucas nga tagga ta neyana si Jesus ta Betlehem, “egga i mappastor ira nga maddian ta tana-tana anna manangngal ta aya-ayam da ta gabi.” (Lucas 2:8-11) Ta vulan na Disiembre, malammin ta Betlehem, maguru-uran, anna nu mittan manniebe, yari tu imposible nga mappastor ta lawan na balay nu gabi. Anni i magigiammu tam taw? Neyana si Jesus ta tiempo nga ari tu malammin i klima, ari tu Disiembre. Ipasingan na ebidensia ta Biblia anna ta historia nga neyana yayya ta vulan na Setiembre onu Oktubre.

6, 7. (a) Kunnasi namegafu i aru nga popular nga kostumbre ta Krismas? (b) Anni nakuan i rasottam ta parregalu?

⁶ Kunnasi gafu namegafu i Krismas? Naggafu yatun ta fiesta ira na pagano, gitta na fiesta na Romano nga Saturnalia, selebrasion nga dedikadu kani Saturn, i dios na agrikultura. Kagian na The Encyclopedia Americana: “I Saturnalia ay fiesta na Romano ta nattangngan na Disiembre nga napparigan na aru nga pappaga-pagayayya nga kostumbre na Krismas. Angngariganna, nala taw nga selebrasion i magarbo nga paffiesta, parregalu, anna pangisibo tu kandela ira.”  Kunne na paga, meselebra i birthday ni Mithra nga dios na bilag na Persia ta Disiembre 25.

⁷ Ngem ari nonopan na aru nga tolay nga masselebra tu Krismas ta maddaggun nga naggafu yatun ta pagano nga kostumbre. Para nira, tiempo laman yatun tapenu makkaravvulu i familia, magayayya nga kuman, anna marregalu. Siempre, iddukattam i familia anna kokkofuttam, anna kayà ni Jehova nga mangibillay ittam ta kataggi-tadday. Kagian na 2 Corinto 9:7 nittam nga “ayatan na Dios i sigga-pagayaya nga mangiyawa.”  Manaki ni Jehova nga mangiyawa ittam laman ta tanakuan ta espesial ira nga okasion. Magayayya i totolay ni Jehova nga marregalu anna maggarammammung kavulu i kokkofun anna familiada ta maski anni nga tiempo na dagun, anna awan tu ekspektadda nga katalina. Mangiyawa ira megafu ta ayada ta tanakuan.​—Lucas 14:12-14.

8. Bagu neyana kari si Jesus turi ta niregaluan yayya na astrologo ira? Iyesplika.

⁸ Tapenu suportan i ideya na parregalu ta Krismas, kagian na aru nga totolay nga narregalu i tallu nga patul ta bagu neyana nga si Jesus ta affukutan na ayam. Kurug nga egga i grupo na lallaki nga nabbisita kani Jesus anna narregalu nisa. Ta tiempo na Biblia, gagangay i parregalu ta importante nga tolay. (1 Patul Ira 10:1, 2, 10, 13) Ngem ammum kari nga kagian na Biblia nga danatun nga lallaki ay astrologo nga massalamangka anna ari maddayaw kani Jehova? Kunne na gapa, ariadda binisita si Jesus turi ta bagu nga neyana yayya anna egga ta lutung. Binisitada yayya turi ta egga ngana yayya ta baleda. Posible gapa nga piga vulan nga nabbiahe i astrologo ira naggafu ta Zigattu. Ta pakaddeda ta destinasiodda, i abbing nga si Jesus ay ari ngana nga bagu neyana.​—Mateo 2:1, 2, 11.

9. Sinni ira i nasselebra tu birthday nga mabibbig ta Biblia?

⁹ Makapagayayya i aggaw na keyana na tadday nga tolay. (Salmo 127:3) Ngem ari kayà kagian natun nga mawag tu iselebra tam i birthday ira. Nonopan yaw: Ta Biblia, dua laman i nasselebra tu birthday​—i birthday  na Faraon na Ehipto, anna i birthday ni Patul Herodes Antipas. (Bibbigan i Genesis 40:20-22; Marcos 6:21-29.) Danatun nga mammaguray ay ari nga aripan ni Jehova. Kakuruganna, awan tu mabibbig tam ta Biblia nga egga i aripan ni Jehova nga nasselebra tu birthday.

10. Kunnasi imammatan na ollu-siglo ira nga Cristiano i passelebra tu birthday?

¹⁰ Kagian na The World Book Encyclopedia nga danuri ollu-siglo nga Cristiano ay “nikonsiderada nga pagano nga kostumbre i passelebra ta kaggawan na nikeyana na maski sinni.” Nebase ta falsu ira nga pangurug i kunnatun nga kostumbre. Angngariganna, kurugan na Griego ira gari nga egga i espiritu nga mapprotekta ta kada tolay nga agga-bantay ta aggaw na keyanana. Anna nonopadda nga egga i koneksion natun nga espiritu ta tadday nga dios nga neyana ta parehu nga fetcha na nikeyana natun nga tolay. Fuera paga tatun nga pagano nga pangurug, konektadu paga ta astrolohiya anna horoscope i birthday ira.

11. Anni i pagimamma ni Jehova ta pabbalin tu minangngiyawa?

¹¹ Para ta aru nga totolay, i birthday-da ay espesial nga aggaw tapenu mepasingannan ira tu appresasion anna aya. Ngem mepasingattam i aya tam ta familia anna kokkofuttam ta maski anni nga tiempo ta dagun, imbes tu ta tadday laman nga espesipiko nga aggaw. Kayà ni Jehova nga masippo anna minangngiyawa ittam kanayun. (Bibbigan i Kingngua 20:35.) Dakal i appabalo tam nisa ta nabalor nga regaluna nga inango kagaggaw, ari laman ta birthday tam.​—Salmo 8:3, 4; 36:9.

12. Ngatta mas mapia i aggaw na patetam anne ta aggaw na nikeyana tam?

¹² Kagian na Eclesiastes 7:1: “I mapia nga ngagan  ay mas makasta anne ta de-kalidad nga denu, anna i aggaw na patay ay mas makasta anne ta aggaw na nikeyana.” Kunnasi nga mas mapia i aggaw na patetam anne ta aggaw na nikeyana tam? Turi ta neyana ittam, awan paga tu maski anni nga nakua tam ta pattoletam, makasta onu marake. Ngem nu usattam i inango tam tapenu passerbian si Jehova anna mangngua tu makasta ta tanakuan, magaggangngua ittam tu “mapia nga  ngagan,” onu reputasion, anna meraddamman ittam ni Jehova maski paga matay ittam. (Job 14:14, 15) Ari iselebra na totolay ni Jehova i mismu nga birthday-da onu maski i birthday ni Jesus. Kakuruganna, i okasion laman nga ipeselebra ni Jesus ay i Memorial na patena.​—Lucas 22:17-20; Hebreo 1:3, 4.

13, 14. Sitaw nga konektadu i selebrasion nga Easter?

¹³ Kurugan na aru nga totolay nga iselebrada i paginnolay ni Jesus nu iselebrada i Easter. Ngem i kurug, egga koneksion na Easter kani Eostre, i pagano nga diosa na pallattuag na bilag anna primavera (spring) na Anglo-Saxon ira. Iyesplika na The Dictionary of Mythology nga diosa gapa yayya na paganà. Konektadu tatun i karuan nga kostumbre ta Easter. Angngariganna, i illug ay “popular nga simbolo na bagu nga pattolay anna paginnolay,” segun ta Encyclopædia Britannica. Nabayag ngana gapa nga meyusa ta pagano nga paddayaw i kuneho ira bilang simbolo na paganà. Manawag nga awan tu koneksion na Easter ta paginnolay ni Jesus.

¹⁴ Nu masingan ni Jehova nga ikivu na totolay i kostumbre ira na falsu nga relihion ta paginnolay na Anana, magayayya kari yayya? Siempre ari. (2 Corinto 6:17, 18) Kakuruganna, ari vuluvuga nga nikiddaw ni Jehova nittam nga iselebra i paginnolay ni Jesus.

15. Kunnasi namegafu i Halloween?

¹⁵ I Halloween nga magalan gapa tu All Hallows’ Eve onu i dispera na Inammatay ay konektadu ta manamay, arang, anna banig onu amang ira. Ari nga bagu  yatun nga selebrasion. Ta pinaka-aranni nga full moon ta Nobiembre 1, iselebra tagga na Celt ira na Britain anna Ireland i fiesta na Samhain. Kurugadda nga durante taw nga fiesta, manoli ta davvun i espiritu na natay ira. Mangitunnag tu makan anna menum i totolay ira tapenu ari ira takitan na espiritu ira. Ta maddaggun, nu naka-costume i abbarabbing anna umay ira ta babalay nga makkagi tu “Trick or treat,” ariadda ammu nga paparigadda yatun nga makademonio nga kostumbre.

16, 17. Anni nakuan i nonopattam nu mapplano tu kasal?

¹⁶ Makapagayayya nga okasion i kasal. Nadduruma i passelebra tatun ta interu mundo. Maruddu nga ari nga nonopan na totolay i naggafuan na kostumbre ira ta kasal, yatutta ariadda ammu nga i karuan nga kostumbre ay naggafu ta relihioso nga pangurug na pagano. Ngem siguraduan na Cristiano nga mannobio nga mapplano nga makkasal nga makapagayayya kani Jehova i kasalda. Nu ammuda i naggafuan na kostumbre ira ta kasal, mas makapaddesision ira tu mapia.​—Marcos 10:6-9.

¹⁷ Kurugan na karuan nga ‘suerte’ ta bagu nga magatawa i karuan ta kostumbre ta kasal. (Isaias 65:11) Angngariganna, ta karuan nga lugar, mangiwarsi i totolay tu bagga onu tanakuan paga ta bagu kasal. Kurugadda nga mangiyawa yaw ta magatawa tu ána, pagayayya, apaddu nga pattolay, anna proteksion kontra ta marake. Ngem magimmugug i Cristiano ira tapenu malillitan i anni laman nga kostumbre nga konektadu ta falsu nga relihion.​—Bibbigan i 2 Corinto 6:14-18.

18. Anni paga nga prinsipio ira ta Biblia i meyaplika ta kasal?

¹⁸ Ikaya na Cristiano nga mannobio nga magayayya  anna egga dignidad na kasalda anna ma-enjoy yatun na magatende ira. I bisita ira ta Cristiano nga kasal ay ari nakuan nga maguvovug tu makapataki, bastus, onu awan tu respetoda ta bagu kasal onu ta tanakuan. (Proverbio 26:18, 19; Lucas 6:31; 10:27) Ari nakuan nga masingan ta kasal na Cristiano i “pappara-parayag na tolay” ta pakkukuana. (1 Juan 2:16) Nu planom nga makkasal, siguraduammu nga magayayya ka nu nonopammu i nesimmu ira tatun nga aggaw.​—Innan i Endnote 28.

19, 20. Anni i naggafuan na pat-toast?

¹⁹ I pat-toast ay gagangay nga kostumbre ta kasal anna ta karuan ira nga okasion. Nu mat-toast i tadday nga tolay, mangikagi yayya tu makasta nga gannug durante nga iyatannang na tanakuan i basuda. Anni nakuan i pagimamma na Cristiano ira ta pat-toast?

²⁰ Kinagi na International Handbook on Alcohol and Culture nga posible nga naggafu i pat-toast ta pagano nga kostumbre “nu sitaw metavvung i sagrado nga likido ta dios ira.” Makua yaw bilang “katali na tadday nga kiddaw, onu tadday nga pakimallo nga i ababba nga kebalinanna ay ‘manayun nakuan i pattolem!’ onu ‘kanayukka nakuan nga magawa-gawayyan!’” Ta tiempo gari, iyatannang na totolay i basuda tapenu kiddawan i pamendision na diosda ira. Ngem ari tu kunnatun i pamendision ni Jehova.​—Juan 14:6; 16:23.

21. Anni paga nga selebrasion i mawag nga lillitan na Cristiano ira?

²¹ Nu maddesisiokka nga makiparte onu ari ta maski anni nga selebrasion, nonopan nu anni nga ugali  anna annangngua i ipagaram natun. Angngariganna, nelagum ta karuan nga selebrasion anna fiesta i bastus nga pattala-tala, sossobra nga paginum, anna maski imoralidad. Baka ipagaram gapa natun nga selebrasion ira i pattolay na bakla anna tomboy onu i nasionalismo. Nu makiparte ittam ta kunnatun ira, talaga kari nga ikalussaw tam i ikalussaw ni Jehova?​—Salmo 1:1, 2; 97:10, footnote; 119:37.

22. Anni i makoffun ta tadday nga Cristiano nga maddesision nu makiparte yayya ta tadday nga selebrasion?

²² Mawag tu magimmugug i Cristiano ira tapenu malillitan i maski anni nga selebrasion nga ari makedayaw ta Dios. Nitura ni apostol Pablo: “Nu anni laman i kuan nu, kuman onu uminum, kuan nu ngamin yatun ta keraya-rayaw na Dios.” (1 Corinto 10:31; innan i Endnote 29.) Siempre, ari tu ngamin nga selebrasion ay konektadu ta imoralidad, falsu nga relihion, onu nasionalismo. Nu ari gamma mekontra i tadday nga selebrasion ta prinsipio ira na Biblia, personal ngana nga desisiottam nu makiparte ittam onu ari. Ikaya tam gapa nga ikonsidera nu kunnasi nga mafektan i tanakuan ta desisiottam.

23, 24. Kunnasi tam meyesplika i desisiottam ta ari nga Saksi nga kafamilia tam meyannung ta karuan nga selebrasion?

²³ Posible nga niyemmammu ngana i makiparte ta selebrasion ira nga ari makedayaw kani Jehova. Ngem baka nonopan na kafamiliam nga ari tu Saksi nga pinammanakitammu ngana ira onu ariammu ngana ira kayà nga makavulu. Posible nga nonopadda nga ta okasion laman nga makkaravulu i familia. Nu kunnatun,  anni gafu i kuammu? Aru i puedem nga kuan tapenu mepasiguradum nga ayatammu ira anna importante ira nikaw. (Proverbio 11:25; Eclesiastes 3:12, 13) Awayyam nga imbitan ira nga makikavulu nikaw ta tanakuan ira nga okasion.

²⁴ Nu kayà ammuan na kafamiliam nu ngatta ari ka ngana makiparte ta karuan nga selebrasion, magaleg ka tu informasion ta publikasiottam ira anna ta jw.org nga makoffun nikaw nga mangipakanawag ta pangurug mu. Ariammu ipasingan nga gittana kayà mu makipporfia onu ipilit nga kunnatun gapa nakuan i kurugadda. Uffunammu i familiam nga malippawa nga aru nga gannug i nikonsideram nige mu nga naddesision. Kalmadu ka laman, anna ‘kanayun gapa nakuan nga makapagayayya anna makapagustu i uvovugammu.’​—Colosas 4:6.

25, 26. Kunnasi moffunan na mappagana i ánada nga ayatan i estandarte ira ni Jehova?

²⁵ Importante nga manawag nga malippawa na kada tadday nittam nu ngatta ariattam makiparte ta karuan nga selebrasion. (Hebreo 5:14) I gakkag tam ay tapenu mapagayayya si Jehova. Nu mappagana ittam, mawag nga egga i tiempo tam nga uffunan i ána tam nga malippawa anna ayatan i prinsipio ira na Biblia. Nu mabbalin tu kurug si Jehova nira, ikayada gapa yayya nga mapagayayya.​—Isaias 48:17, 18; 1 Pedro 3:15.

²⁶ Magayayya si Jehova nu masinganna nga kuattam i adde na mawayya tam tapenu marenu anna kurug i paddayaw tam nisa. (Juan 4:23) Ngem aru i mannono nga ari talaga mapammakatalakkan i tolay taw nga ari mapammakatalakkan nga mundo. Fustu kari yatun? Gigiammuattam yatun ta tumunug nga artikulo.