1, 2. Ngatta ayatammu si Jehova nga Dios?

AYATAMMU kari i Dios? Awayyana nga kuruga ayatammu yayya yari tu naddedika ka nisa. Matageno mu nga yayya i kadukkattan nga Kofummu. Ngem nige mu paga inaya si Jehova, inaya naka ngana. Mabibbig ta Biblia: ‘Mangaya ittam, ta i Dios i ollu nga nangaya nittam.’​—1 Juan 4:19.

² Nonopan i ngamin nga kingngua ni Jehova tapenu ipasingan i ayana nittam. Niddanna ittam tu makakkasta nga davvun tapenu paddianan anna ngamin nga kawagattam tapenu magayayya ittam ta pattolay. (Mateo 5:43-48; Nepakannammu 4:11) Pinapposible ni Jehova nga makilala tam yayya tapenu mapeggan ittam tu makasta nga relasion nisa. Kada bibbigattam i Biblia, maggigginna ittam kani Jehova. Kada gapa makimallo ittam, maggigginna yayya nittam. (Salmo 65:2) Igiya anna pasikannanna ittam gukaban na makapangngua nga masanto nga espirituna. (Lucas 11:13) Zinogna paga ta davvun i iddedduna nga Ana tapenu palubbangan ittam ta liwa anna patay.​—Bibbigan i Juan 3:16; Roma 5:8.

3. Kunnasi tam mapattalupaddian i madukko nga relasion kani Jehova?

³ Nonopan i tadday nga madukko nga kofummu  nga nakavulu mu ta tiempo na pagayayya anna ta tiempo na paddaddam. Mawag i appursigi tapenu mapattalupaddian i kunnatun nga meggo nga pakkofun. Kunnatun gapa i pakikkofuttam kani Jehova, i kadukkattan nga Kofuttam. Posible nga mannanayun i pakikkofuttam nisa. Yari tu kagian na Biblia nittam: “Mattalupaddiakkamu ta aya na Dios.” (Judas 21, NW ) Kunnasi tam makua yatun? Kunnaw i tabbag na Biblia: “Nu ayatat-tam i Dios, parulattat-tam gapa i bili-bilin na, ay ari gammabba tu mariga nga tuttulan danaw.”​—1 Juan 5:3.

4, 5. Kunnasi namegafu nga dumakal i aya mu kani Jehova?

⁴ Anni i kayà kagian na Biblia nga “ayatat-tam i Dios”? Tukuyan naw i monag nga aya tam ta Dios. Meraddammammu kari paga nu kunnasi nga namegafu i aya mu kani Jehova?

⁵ Nonopan nu anni i natageno mu turi ta nammuammu nga kayà ni Jehova nga mattoleka tu mannanayun ta napabagu nga mundona. Nagigiammum i ngamin nga kingnguana tapenu mabbalin tu posible yatun, anna nalippawa mu nga nabala-balor i regaluna nittam turi ta zinogna i mismu nga Anana ta davvun. (Mateo 20:28; Juan 8:29; Roma 5:12, 18) Turi ta nammuammu i pangaya ni Jehova nikaw, natukkal i futum, anna namegafum ngana gapa yayya nga ayatan.​—Bibbigan i 1 Juan 4:9, 10.

6. Anni i nelagum ta pangaya ta tadday nga tolay? Megafu ta ayatammu i Dios, anni i kuammu?

⁶ Ngem i pakatageno tu aya ta Dios ay pamegafuanan laman. Angngariganna, nu ayatattam i tadday  nga tolay, ariattam laman kagian nga “Iddukattaka.” Kayà tam gapa yayya nga mapagayayya. Megafu ta ayatammu si Jehova, kayà mu nga mattolay nga makapagayayya nisa. Durante nga dumakal yatun nga aya, magga maddedika anna mappabawtiso ka. Ta pangngua tatun, ipromesam nga passerbian si Jehova adde noka. (Bibbigan i Roma 14:7, 8.) Kunnasim tuppalan yatun nga promesa?

7. Nu ayatattam si Jehova, anni i kuattam? Anni i karuan nga bili-bilinna?

⁷ Megafu ta ayatattam si Jehova, ‘parulattat-tam i bili-bilinna.’ Kunnasi tam kuan yatun? Tuttulattam yayya. Ta Biblia, nagigiammu tam i klase na pattolay nga kayà ni Jehova para nittam. Angngariganna, kagianna nittam nga marake i magillellaw, makkoko onu malladdug, maki-sex ta ari nga atawa, onu maddayaw ta maski sinni onu anni fuera nisa.​—1 Corinto 5:11; 6:18; 10:14; Efeso 4:28; Colosas 3:9.

8, 9. Nu awan tu direkta nga dob na Biblia nu anni i kuattam, kunnasi tam mammuan nu anni i kayà ni Jehova? Mangiyawa tu angngarigan.

⁸ Ngem tapenu mapagayayya si Jehova, kurang i basta panuttul ta bili-bilinna. Arianna ittam niddan tu apaddu nga lista na dorob nga tuttulattam ta kada situasion. Nu mittan, awan tu direkta nga dob ta Biblia nu anni i kuattam. Kunnasi ittam makangngua tu fustu ira nga desision? (Efeso 5:17) Ta Biblia makaleg ittam tu prinsipio ira, onu importante ira nga kinakurug nga mangituddu nittam ta pagimamma ni Jehova ta ganna-gannug. Durante nga bibbigattam i Biblia, mas makilala tam si Jehova bilang tadday nga Persona.  Mammuattam nu kunnasi yayya nga mannono, nelagum ngana i kayàna anna i ikalussona ira.​—Bibbigan i Salmo 97:10, footnote; Proverbio 6:16-19; innan i Endnote 1.

⁹ Angngariganna, kunnasi ittam mappili tu girawattam ta TV onu innattam ta Internet? Ari ittam diktan ni Jehova ta mawag nga kuattam. Ngem makoffun nittam i prinsipiona ira tapenu makapaddesision tu fustu. Aru ta dibersion sangawe ay napannu tu kinavayolente anna sex. Ta Biblia, kagian nittam ni Jehova nga “ikalussona danuri mangaya ta kinavayolente” anna “panunnutan na Dios danuri i maggannug tuange ta manallaw anna makidallaw.” (Salmo 11:5, NW; Hebreo 13:4) Kunnasi makoffun danatun nga prinsipio tapenu makapaddesision ittam tu fustu? Oras tu mammuattam nga ikalussaw ni Jehova i tadday nga gannug onu imammatanna nga imoral yatun, lillitattam nakuan yatun.

10, 11. Ngatta tuttulattam si Jehova?

¹⁰ Ngatta tuttulattam si Jehova? Ari laman tapenu malisiattam i kakastigu onu problema ira nga resulta na marake nga desision. (Galacia 6:7) Tuttulattam si Jehova megafu ta ayatattam yayya. Kagitta na ána nga kayàda nga pagayayyatan i yamada, kayà tam gapa nga pagayayyatan i nelangitan nga Yama tam. Awan ngana tu mas mapia anne ta pakannammu nga magayayya si Jehova nittam!​—Salmo 5:12; Proverbio 12:2; innan i Endnote 2.

¹¹ Tuttulattam si Jehova ari laman nu mabi para nittam onu nu awan ngana tu pappiliattam. Ariattam gapa pilian nu anni ta dorob anna estandartena ira i  kayà tam nga tuttulan. (Deuteronomio 12:32) Lallagu, tuttulattam i ngamin nga dorobna, gitta na salmista nga nakkagi: “Pagayaya ku i mamarulo ta dorob mu, ta danaw ay kuruga ayatak-ku.” (Salmo 119:47; Roma 6:17) Kayà tam parigan si Noe nga kingnguana i ngamin nga nibilin nisa ni Jehova megafu ta ayana kani Jehova. Kagian na Biblia nga “kunnatun mismu i kingngua” ni Noe. (Genesis 6:22) Kayà mu kari nga kunnatun gapa i makagi ni Jehova nikaw?

12. Kunnasi tam mapagayayya si Jehova?

¹² Anni i matageno ni Jehova nu tuttulattam yayya? ‘Mapagayayya tam i futuna.’ (Proverbio 11:20; 27:11) Fugurammu yatun! Mapagayayya tam i Namaratu ta uniberso nu tuttulattam yayya. Ngem arianna ittam fuersan nga kuan yatun. Lallagu, kayàna nga sittam lagapa i maddesision. Kebalinan natun nga sittam lagapa i mappili nu kuattam i mapia onu i marake. Kayà ni Jehova nga paguyuan ittam na aya tam nisa nga maddesision tu fustu tapenu mapeggattam tu kakastan nga pattolay.​—Deuteronomio 30:15, 16, 19, 20; innan i Endnote 3.

13, 14. Ngatta ammu tam nga ari tu kitazziga nga tuttulan i bili-bilin na Dios? Mangiyawa tu angngarigan.

¹³ Kunnasi nu nononopattam nga kitazziga nga tuttulan i bili-bilin ni Jehova onu kuruga istrikto danatun? Manawag i kagian na Biblia: “Ari gammabba tu mariga nga tuttulan danaw.” (1 Juan 5:3) I kebalinan na Griego nga termino nga netransleyt tu “mariga” ay “madammo.” Ta karuan nga teksto, neyusa yaw nga termino tapenu ideskriba i ari mepangngo nga regulasion onu  totolay nga makkontrol anna mamerwisiu ta tanakuan. (Mateo 23:4; Kingngua 20:29, 30) Kunnaw i mabibbig ta New English Translation: “Ari nga mamakadammo nittam i bili-bilinna ira.” Ari nga “madammo” i bili-bilin ni Jehova, yari tu ari mariga nga tuttulan danatun. Kanayun nga rasonable i ikikkiddona nittam.

¹⁴ Angngariganna, imajinan nga dudduffunammu i kofummu nga magali ta bagu nga balay. Nikartonna ngana ngamin i gamitna. Alappaw anna alistu laman nga akkatan i karuan, ngem madammo i karuan anna mawag tu dua nga tolay i mangakka. Ipeyakka kari nikaw na kofummu i madaddammo nga karton nga awan tu kavulu mu? Siempre ari! Ngatta? Megafu ta manakina nga marigatakka. Meyarig si Jehova tatun nga kofun nga ari vuluvuga nga mangipakua nittam tu kitazziga. (Deuteronomio 30:11-14) Malippawa ni Jehova i limitasiottam. “Ammu na i nikaparatu tam; ammu na tu gavu ittam laman.”​—Salmo 103:14.

15. Ngatta makasiguradu ittam nga pammakapianattam i bili-bilin ni Jehova?

¹⁵ Kinagi ni Moises ta nasion na Israel nga i bili-bilin ni Jehova ay ‘kanayun nga pammakapianadda’ anna ‘mattalupaddian ira nga matolay’ nu tuttuladda danatun. (Deuteronomio 5:28-33; 6:24) Kunnatun gapa ta maddaggun. Pammakapianattam i ngamin nga ipakua ni Jehova nittam. (Bibbigan i Isaias 48:17.) Kanayun nga ammu na Yama tam nga si Jehova i kapianan para nittam. (Roma 11:33) Kagian na Biblia nittam: “I Dios ay aya.” (1 Juan 4:8) Kebalinan naw nga aya i mamaguyu kani Jehova ta ngamin nga kakkagian anna kukukuanna.

16. Ngatta matuttul tam lagapa i Dios maski nu imperfekto ittam anna mattolay ittam ta marake nga mundo?

 ¹⁶ Ari tu kanayun nga mabi para nittam nga tuttulan i Dios. Mattolay ittam ta marake nga mundo nga kontroladu na Diablo. Iinfluwensianna i totolay nga kuan i marake. (1 Juan 5:19) Laba-labanattam gapa i imperfekto nga nono anna panageno tam nga mangitubba nittam nga ari tuttulan i Dios. (Roma 7:21-25) Ngem i aya tam kani Jehova i manguffun nittam nga kuan i fustu. Masingi-singanna i appursigi tam nga tuttulan yayya, anna iddanna ittam tu makapangngua nga masanto nga espirituna. (1 Samuel 15:22, 23; Kingngua 5:32) Megafu ta masanto nga espiritu, mapeggan ittam tu kualidad ira nga manguffun nittam tapenu mas mabi tam nga tuttulan yayya.​—Galacia 5:22, 23.

17, 18. (a) Anni i magigiammu tam taw nga libru? (b) Anni i gigiammuattam ta tumunug nga kapitulo?

¹⁷ Taw nga libru, magigiammu tam nu kunnasi i mattolay nga makapagayayya kani Jehova. Magigiammu tam nu kunnasi iyaplika ta pattoletam i prinsipiona ira anna i moral ira nga estandartena. Daddamman nga ari ittam vuluvuga nga fuersan ni Jehova nga tuttulan yayya. Nu piliattam nga tuttulan yayya, makkasta i pattoletam anna mapeggan ittam tu makasta nga mappange. Pinaka-importante, ipasingan na panuttul tam i konag na aya tam ta Dios.​—Innan i Endnote 4.

¹⁸ Tapenu mammuattam nu anni i mapia anna nu anni i marake, niddan ni Jehova i kada tadday nittam tu konsensia. Nu sanayattam i konsensia tam, moffunan ittam natun nga ‘parulattan i bili-bilinna.’ Anni gafu i konsensia, anna kunnasi tam sanayan yatun? Ammuattam.