1, 2. Ngatta magimmugug ittam nakuan ta pappili tu dibersion?

KAGATAMMU ngana nakuan i tadday nga frutas ngem nasingammu nga egga balo i daralna. Anni i kuammu? Ituloy mu lapa kari nga kanan? Itabbo mu? Onu alsammu i daralna tapus kanammu yari awan tu daralna?

² Megitta gapa i dibersion ta kunnatun nga frutas. Kagian na karuan nga makapagayayya yatun, ngem aru tatun i daral megafu ta imoral, vayolente, onu makademonio danatun. Nu mappili ka gafu tu dibersion, kagiammu kari: “Yaw i kayà ku. Sakan lapa i  mappili ta kayà ku nga dibersion”? Onu kagiammu: “Marake i ngamin nga dibersion”? Onu piliammu kari tu mapia i dibersiommu, lillitammu i marake ira anna magenjoy ta makasta ira?

3. Anni nakuan i nonopattam nu mappili ittam tu dibersion?

³ Mawag tam ngamin i dibersion, anna kayà tam i mappili tu mapia. Mawag gafu tu iyavu tam ta baggi tam nu anni i efekto na piliattam ira nga dibersion ta paddayaw tam kani Jehova.

4. Anni i tadday nga prinsipio ta Biblia nga makoffun nittam ta pappili tu dibersion?

⁴ Turi ta nidedika tam i baggi tam kani Jehova, nipromesa tam nga usan i inango tam para nisa. (Bibbigan i Eclesiastes 5:4.) Nipromesa tam nga ‘kuattam i ngamin ta keraya-rayaw na Dios.’ (1 Corinto 10:31) Kayà kagian naw nga dedikadu ittam ta Dios maski paga nu marrelaks onu maddibersion ittam, ari laman nu egga ittam ta study onu ta ministerio.

5. Anni nakuan i klase na paddayaw tam kani Jehova?

⁵ Ngamin nga kuattam ta pattolay ay egga i efektona ta paddayaw tam kani Jehova. Niyesplika yaw ni Pablo turi ta kinagina: ‘Iyawanu ta Dios i bagginu tu kunna matolay nga tavvung, ta passerbi nga masanto anna makapagayayya sa.’ (Roma 12:1) Kinagi ni Jesus: “Ayatam-mu i Yafu nga Dios mu ta interu futum, interu nga ikararuam, interu nga nono mu anna interu nga sikam-mu.” (Marcos 12:30) Kayà tam nga iyawa i kapianan kani Jehova. Ta Israel gari, nu mangitavvung tu ayam i totolay kani Jehova, maekspekta nga mataba anna awan tu taki natun. Nu egga i defekto na  tavvung, ari nga alawatan na Dios yatun. (Levitico 22:18-20) Kunnatun gapa, posible nga ari alawatan ni Jehova i paddayaw tam. Kunnasi?

6, 7. Kunnasi makafekto i dibersiottam ta paddayaw tam kani Jehova?

⁶ Kagian nittam ni Jehova: “Mappakasanto kamu ta sakan ay masanto.” (1 Pedro 1:14-16; 2 Pedro 3:11) Alawatan laman ni Jehova i paddayaw tam nu yaw ay masanto, onu marenu. (Deuteronomio 15:21) Ari nga marenu i paddayaw tam kani Jehova nu kuattam i gannug ira nga ikalussona, gitta na imoral, vayolente, onu konektadu ta demonio. (Roma 6:12-14; 8:13) Mapalussaw tam gapa si Jehova nu kakayà tam i kunnatun ira nga dibersion. Megafu tatun, posible nga ari tu marenu anna ari alawatan ni Jehova i paddayaw tam anna makadaral yatun ta relasiottam nisa.

⁷ Kunnasi ittam gafu makapili tu makasta nga dibersion? Anni ira nga prinsipio i makoffun nittam tapenu mammuan nu anni i mepangngo anna nu anni i ari?

8, 9. Anni ira nga dibersion i lillitattam? Ngatta?

⁸ Nadduruma i klase na dibersion ta maddaggun. Mepangngo i karuan ta Cristiano ira, ngem mas aru tatun i ari mepangngo. Ollu, ammuattam labbi i klase na dibersion nga mawag tam nga lillitan.

⁹ Aru nga pelikula, website, pagiraw ta TV, video game, anna kansion i imoral, vayolente, onu makademonio. Gagangay nga pabbalinadda tu ari nga marake anna kaggalo paga lagu i marake ira nga gannug. Ngem lillitan na Cristiano ira i dibersion nga  ari mangipasingan ta marenu ira nga estandarte ni Jehova. (Kingngua 15:28, 29; 1 Corinto 6:9, 10) Nu lisiattam i kunnatun ira nga dibersion, mepasingattam kani Jehova nga ikalussaw tam i marake.​—Salmo 34:14; Roma 12:9.

10. Anni i posible nga resulta na marake nga pappili tu dibersion?

¹⁰ Ngem nonopan na karuan nga awan tu marake ta dibersion nga vayolente, imoral, onu konektadu ta demonio. Kudda: ‘Anni i marake tatun? Kakku mabba vuluvuga kuan danatun.’ Nu kunnatun i pagimamma tam, illokuattam laman i baggi tam. Kagian na Biblia: “Mas minangngilogo i futu anne ta maski anni paga nga gannug anna desperadu.” (Jeremias 17:9) Nu magayayya ittam ta kunnatun ira nga gannug nga ikalussaw ni Jehova, kunnasi tam makagi nga ikalussaw tam danatun? Kada mas magayayya ittam ta kunnatun ira, mas ngana nga mabbalin tu normal danatun nittam. Ta pappasa na tiempo, makkalyu i konsensia tam anna ari ngana nga mangabiso maski nu marake ngana i kuattam.​—Salmo 119:70; 1 Timoteo 4:1, 2.

11. Kunnasi makoffun nittam i Galacia 6:7 ta pappili tam tu dibersion?

¹¹ Kagian nittam na Uvovug na Dios: “Nu anni laman i nimula na tolay, yatun gabbalaman i gataban na.” (Galacia 6:7) I kurug, nu magayayya ittam ta marake ira nga dibersion, baka duttal i tiempo nga kuattam ngana danatun. Angngariganna, i karuan nga Cristiano ay nafektan na imoral nga dibersion adde ta nakangngua ngana ira tu imoralidad. Ngem duffunan ittam ni Jehova tapenu makapappili ittam tu makasta nga dibersion.

12. Anni i makoffun nittam tapenu makapappili ittam tu makasta nga dibersion?

¹² Egga ira i dibersion nga manawag nga manaki ni Jehova, anna mawag nga lillitattam danatun. Ngem kunnasi danuri dibersion nga ari kuruga manawag nu mepangngo danatun? Ari ittam iddan ni Jehova tu lista na regulasion ira nu anni i puede onu ari puede nga girawan, ginnan, onu bibbigan. Lallagu, kayàna nga usattam i konsensia tam nga sinanay na Biblia. (Bibbigan i Galacia 6:5.) Niddan ittam ni Jehova tu prinsipio ira onu importante ira nga kinakurug nga manguffun nittam nu kunnasi imammatan i ganna-gannug. Danatun i manguffun ta passanay ta konsensia tam. Uffunan ittam danatun nga mammuan i “ikaya na Yafu” nga Jehova tapenu i piliattam ira ay mamagayayya nisa.​—Efeso 5:17.

13. Ngatta nadduruma nga dibersion i pilian na kada Cristiano? Ngem anni i importante ta ngamin nga Cristiano?

¹³ Maruddu nga madduruma nga dibersion i pilian na kada Cristiano. Ngatta? Megafu ta nadduruma i kayà tam. I kayà na tadday ay baka manaki gapa na tanakuan. Maski kunna, tapenu makapappili tu mapia, mawag tu mappegiya i ngamin nga Cristiano ta prinsipio ira na Biblia. (Filipos 1:9) Yatun i makoffun nittam tapenu makapappili ittam tu dibersion nga alawatan na Dios.​—Salmo 119:11, 129; 1 Pedro 2:16.

14. (a) Anni i importante nga ikonsidera tam meyannung ta pangusa tam ta tiempo? (b) Anni i nitabarang ni Pablo ta Cristiano ira?

¹⁴ Tadday paga nga ikonsidera tam i karu na  tiempo nga ufutattam ta dibersion. Ipasingan naw nu kunnasi ka-importante nittam i dibersion. Bilang Cristiano, i passerbi tam kani Jehova i pinaka-importante ta pattoletam. (Bibbigan i Mateo 6:33.) Ngem baka ariattam mataga-tageno nga mofu ngana i oras tam ta paddibersion. Nitabarang ni Pablo ta Cristiano ira: “Nu kunnatun, sifutannu tu mapia nu i agguyu-guyunu ay kagitta na masirib, ari tu kagitta na ulapa ira, nga usannu ta pinakamapia i tiemponu.” (Efeso 5:15, 16, NW ) Yari tu limitattam nakuan i karu na tiempo nga ufutattam ta dibersion anna siguraduattam nakuan nga pagolluattam i passerbi ta Dios.​—Filipos 1:10.

15. Kunnasi tam maprotektan i baggi tam ta dibersion nga makadaral ta relasiottam kani Jehova?

 ¹⁵ Manawag nga lillitattam nakuan i dibersion ira nga manaki ni Jehova. Ngem kunnasi gapa danuri dibersion nga ariattam siguradu? Mawag tam paga kari i magimmugug? Nonopan yaw. Nu mune ka ta vukig, lumakag ka kari ta aranni ta gatag natun? Ari. Nu tagibalorammu i inango mu, umarayyu ka ta peligro. Kunnatun gapa ta pappili tam tu dibersion. Kagian na Biblia nittam: “Iyarayyum i takkim ira ta marake.” (Proverbio 4:25-27) Yari tu ariattam laman nga lillitan i dibersion ira nga siguradu ittam nga marake, nu ari, arayyuattam maski i dibersion ira nga posible nga ari nga makasta para nittam, anna makadaral ta relasiottam kani Jehova.

16. (a) Anni i karuan nga gannug nga ikalussaw ni Jehova? (b) Kunnasi tam mepasingan nga ikalussaw tam i ikalussaw ni Jehova?

¹⁶ Nitura na salmista: “Ikalussaw nu i marakay, sikamu nga magiddu ta YAFU.” (Salmo 97:10, footnote) Ituddu nittam na Biblia i pagimamma anna mataga-tageno ni Jehova. Nonopan nu kunnasi makoffun nikaw i nagigiammum tapenu maparigammu i pagimamma ni Jehova. Angngariganna, nammuattam nga ikalussaw ni Jehova “i minalladdug nga zila, anna limi-lima nga mangivuvvu ta inosente nga daga, futu nga mapplano tu makaperwisiu, anna takki ira nga mappabibibi ta pangngua tu marake.” (Proverbio 6:16-19) Nagigiammu tam nga mawag tu ibita tam i “paggannug, . . . paddaya-rayaw ta sinan-dios,  pagana-anitu, . . . pakkapassa-passil, pappata-patu, . . . pamassil, pagillellaw, ari nga mepangngo nga pappaga-pagayaya, tuange ta karuan paga nga kuddanaw.” (Galacia 5:19-21) Nasingammu kari nu kunnasi makoffun nikaw danaw nga prinsipio na Biblia ta pappili tu dibersion? Kayà tam tuttulan i estandarte ira ni Jehova ta ngamin nga aspeto na pattoletam, maski egga i kavulu tam onu awan. (2 Corinto 3:18) Kakuruganna, maruddu nga masingan ta pili-piliattam ira durante nga magitetadday ittam nu anni i kurug nga kata-katoletam.​—Salmo 11:4; 16:8.

17. Nige mappili tu dibersion, anni ira i mawag nga iyavu tam ta baggi tam?

¹⁷ Nu mappili ittam gafu tu dibersion, iyavu ta baggi tam: ‘Kunnasi makafekto yaw ta relasiokku kani Jehova? Anni i efekto naw ta konsensià?’ Gigiammuattam i karuan nga prinsipio nga makoffun nittam ta pappili tu dibersion.

18, 19. (a) Anni i tabarang ni Pablo ta Cristiano ira? (b) Anni ira nga prinsipio i makoffun ta pappili tam tu dibersion?

¹⁸ Nu mappili ittam tu dibersion, pili-piliattam nu anni i patallungattam ta nono tam. Nitura ni Pablo: “Pannuan nu i ginnonopan nu ta gannug ira nga mapia anna mepangngo nga madayaw: ganna-gannug ira nga kurug, mekakua, matunung, marenu anna makemmemmi.” (Filipos 4:8) Nu pannuattam i nono tam tu kunnatun ira nga makasta nga gannug, makagi tam yaw: “Makayaya paray nikaw i uvovug anna appana-panono ku. Sikaw i mangiyegu anna manavvu niakan, AFU!”​—Salmo 19:14.

¹⁹ Iyavu mu ta baggim: “Anni i pata-patallungakku  ta nono ku? Kabalikku maggiraw tu pelikula onu TV, marenu paga kari i nono ku? Memammo ngà kari anna ariakku kari makonsensia? (Efeso 5:5; 1 Timoteo 1:5, 19) Makayà kari i makimallo kani Jehova? Onu mappasiran ngà? Vayolente onu imoral kari i nabattang ta nono ku gafu ta ginirò? (Mateo 12:33; Marcos 7:20-23) ‘Tuttuttulakku kari i annangngua na totolay toye ta utun na davvun’ megafu ta dibersion nga piliakku?” (Roma 12:2) Makoffun nittam i tabbag tam tatun ira nga masingan nu anni i mawag tam tapenu mapattalupaddian nga matuyag i relasiottam kani Jehova. Kayà tam ipakimallo i gitta na nipakimallo na salmista: “Iyarayyum i matà ta gannug ira nga awan tu kwenta da.” *​—Salmo 119:37.

20, 21. Ngatta mawag tam ikonsidera i panageno na tanakuan nu mappili ittam tu dibersion?

²⁰ Yaw paga i importante nga prinsipio nga daddamman: ‘Awayya tam nga kuan i anni laman nga ikaya tam, ngem ari tu ngamin i gannug ay mamakaladda ta pavvurulun. Ari tu i pammakapian na baggi tam laman i nonopattam, nu ari i pammakapian na ikattoletam.’ (1 Corinto 10:23, 24) Ari tu megafu ta egga i lallaguretam nga kuan i tadday nga gannug ay mawag tu kuattam ngana yatun. Mawag tu nonopattam tu mapia nu anni i efekto na desisiottam ira ta wawwaragi tam.

²¹ Nadduruma i konsensia na kada tadday. Angngariganna,  baka ipamavulun na konsensiam nga girawan i tadday nga programa ta telebision. Tapus nammuammu nga ari ipamavulun na konsensia na tanakuan nga wawwaragi nga girawan yatun. Anni i kuammu? Maski paga puedem girawan yatun, baka ariammu ngana laman nga girawan. Ngatta? Megafu ta ariammu kayà nga ‘makaliwa ta wagim ta angngurug’​—onu mas grabe paga, ‘makaliwa ta Cristo.’ (1 Corinto 8:12) Manaki tam mangngua tu maski anni nga kesiddukallan na kapangngurug tam.​—Roma 14:1; 15:1; 1 Corinto 10:32.

22. Kunnasi tam mepasingan nga rasonable ittam ta pappili ira na kapangngurug tam?

²² Kunnasi gapa nu ari ipamavulun na konsensiam nga girawan, bibbigan, onu kuan i gannug nga ipamavulun na tanakuan? Megafu ta aya anna respetom ta wagim, ariammu ipilit nisa i kayà mu. Ammu na drayber nga nu maski paspas onu mabayag i pammaneho na karuan kumpara nisa, malalaki lagapa ira nga drayber. Kunnatun gapa, baka parehu nga tuttuttulannu na kapangngurug mu i prinsipio ira na Biblia ngem madduma kamu tu opinion nu anni i mepangngo nga dibersion.​—Eclesiastes 7:16; Filipos 4:5, NW.

23. Anni i makoffun nittam tapenu makapili tu makasta nga dibersion?

²³ Anni gafu i makoffun nittam ta pappili tu makasta nga dibersion? Nu usattam i konsensia tam nga sinanay na prinsipio ira na Biblia anna sigga-nono ittam ta wawwaragi tam, makasta i mapili tam. Anna magayayya ittam megafu ta ‘kukukuattam i ngamin ta keraya-rayaw na Dios.’