1, 2. Anni i kuattam tapenu mattalupaddian ittam ta aya na Dios?

IKAYA tam ngamin nga mabbalin tu masikan anna magawa-gawayyan. Yatutta kuman ittam tu masustansia, regular nga magehersisio, anna immugurattam i baggi tam. Maski nu mawag i pappursigi tatun, sulit i resulta natun, yatutta ari ittam magimmang. Ngem kawagattam gapa i mabbalin tu masikan anna magawa-gawayyan ta tanakuan nga aspeto.

² Maski nu nammammu tam ngana si Jehova, mawag nga pattalupaddianattam nga maladda i relasiottam nisa. Turi ta pinagaram ni Judas i Cristiano ira nga, “Mattalupaddiakkamu ta aya na Dios,” niyesplikana nu kunnasida makua yatun. Kinagina nira: “Pakaladdannu i kuruga masanto nga pangurugnu.” (Judas 20, 21, NW ) Kunnasi tam gafu mapaladda i pangurug tam?

3-5. (a) Anni i kayà ni Satanas nga nonopammu meyannung ta estandarte ira ni Jehova? (b) Anni i matageno mu meyannung ta dorob anna prinsipio ira ni Jehova?

³ Importante nga kumbinsidu ka mismu nga kapianan i dala-dalan ni Jehova. Kayà ni Satanas nga nonopammu nga mariga i mattolay segun ta estandarte ira na Dios anna mas magayayya ka nu sikaw lagapa i maddesision nu anni i fustu anna nu anni i mali. Tagga paga ta hardin na Eden, kayà ngana ni Satanas nga kurugan  yatun na totolay. (Genesis 3:1-6) Adde ta maddaggun, kunnatun lagapa i kayàna.

⁴ Fustu kari si Satanas? Kuruga istrikto kari i estandarte ira ni Jehova? Ari. Tapenu iyilustra, imajinammu nga lumalakag ka ta makakkasta nga parke. Nasingammu nga egga i parte na parke nga atannang i gibawna. Baka nonopammu, ‘Ngatta gare ta nagibawan paga laman?’ Ngem gavva nga naginnam i mangngana-nganangngar nga leon ta likug na gibaw. Anni ngana i matageno mu tatun nga gibaw? Mappabalo ka megafu ta protektan naka natun tapenu ari ka nga makan na leon! Kagitta natun nga gibaw i prinsipio ira ni Jehova, anna i leon gapa i Demonio. Abisowan ittam na Biblia: “Tangngallan nu i appana-panono nu anna magalerto kamu! Ta i Demonio nga kontra nu ay mallelevu nga kagitta na mangngana-nganangngar nga leon nga magaleg ta kanan na.”​—1 Pedro 5:8.

⁵ Ikaya ni Jehova i kapianan nga pattolay para nittam. Manakina nga melogo ittam ni Satanas. Yatutta nangiyawa yayya tu dorob anna prinsipio ira tapenu mapprotekta anna mamagayayya nittam. (Efeso 6:11) Nitura ni Santiago: “I mamatalatto ta awan tu pakkurangan na nga dob nga mamalubbang ta totolay . . . ay bendisionan na Dios ta anni laman nga kuan na.”​—Santiago 1:25.

6. Kunnasi ittam mabbalin tu kumbinsidu nga kapianan i dala-dalan na Dios?

⁶ Nu tuttulattam i direksion ni Jehova, makkasta i pattoletam anna mas malladda i pakikkofuttam nisa. Angngariganna, mabbenefisio ittam nu kanayun ittam makimallo nisa. (Mateo 6:5-8; 1 Tesalonica 5:17) Magayayya ittam nu tuttulattam i direksionna nga maggarammammung tapenu dayawan yayya, makkapaga-pagaram ittam, anna matalikarag ittam ta pallayyagayya anna panuddu.  (Mateo 28:19, 20; Galacia 6:2; Hebreo 10:24, 25) Nu nonopattam nu kunnasi nga nakoffun danaw tapenu mattalupaddian nga maladda i pangurug tam, mas nga kumbinsidu ittam nga kapianan i dala-dalan ni Jehova.

7, 8. Anni i makoffun nittam tapenu ariattam mavurung ta kapurueba ira ta mappange?

⁷ Baka mavurung ittam nga i kapurueba na pangurug tam ta mappange ay kuruga mariga para nittam. Nu kunnatun i matageno mu, daddamman i kinagi ni Jehova: “Sakan si Jehova nga Dios mu, i manuttuddu nikaw tapenu mabenefisiowakka, i mangigiggiya nikaw ta dalan nga mawag tu lakarammu. Nu magginna ka laman nakuan ta bili-bilikku! Mabbalin i imammo mu tu kagitta na bannag anna i kinatunung mu tu kagitta na pala-palung na bebay.”​—Isaias 48:17, 18.

 ⁸ Nu tuttulattam si Jehova, megitta i imammo tam ta bannag nga ari nga mammaga, anna i kinatunung tam ay kunna pala-palung nga manotoli ta pipi na bebay. Maski nu anni i mesimmu ta pattoletam, makapattalupaddiattam lagapa nga matalo. Ipromesa na Biblia: “Ipammakatalo mu ta YAFU i vuru-vurung mu ira, ay mala mu i pangiyegu na; arian na vuluvuga nga itulu tu i matunung nga tolay ay maffu.”​—Salmo 55:22.

9, 10. Anni i kebalinan na pabbalin tu manakam?

⁹ Nu pakaladdammu i relasiommu kani Jehova, “mapprogreso [ka] ta kinamanakam.” (Hebreo 6:1, NW ) Anni i kebalinan na pabbalin tu manakam?

¹⁰ Ari nga nakadepende ta edad i pabbalin tu manakam nga Cristiano. Tapenu mabbalin tu manakam, mawag nga pabbalinattam si Jehova nga kapianan nga Kofuttam anna parigan i pagimammana ta ganna-gannug. (Juan 4:23) Nitura ni Pablo: “Danuri i mattolay segun ta kata-katolay da nga neravvunan, ay nonopad-da laman i ikaya na baggi da. Ngem danuri i mattolay segun ta Espiritu, ay nonopad-da i ikaya na Espiritu.” (Roma 8:5) Ari nga nakafokus i manakam nga tolay ta pappalapagustu onu ta material ira nga gannug. Lallagu, nakafokus yayya ta passerbi kani Jehova anna masirib i paddesisionna ta pattolay. (Proverbio 27:11; bibbigan i Santiago 1:2, 3.) Ari yayya mappa-influwensia nga magangngua tu mali. Ammu na tadday nga manakam nu anni i fustu anna determinadu yayya nga kuan yatun.

11, 12. (a) Anni i kinagi ni Pablo meyannung ta pakawayya na Cristiano nga “maningan ta nadduman na mapia anna marakay”? (b) Anni i napparehuan na pabbalin tu manakam nga Cristiano ta pabbalin tu atleta?

¹¹ Mawag i pappursigi tapenu mabbalin tu manakam.  Nitura ni apostol Pablo: “I matagga nga kanan ay para ta manakam ngana, nga napenam ngana nga maningan ta nadduman na mapia anna marakay.” (Hebreo 5:14) Ipanono nittam na uvovug nga “napenam” i passanay na tadday nga atleta.

¹² Nu masingattam i malalaki nga atleta nga maggayam, ammu tam nga aru nga tiempo i pinassanayna tapenu mabbalin yayya tu malalaki. Ari yayya neyana nga atleta. Nu meyana i abbing, arianna ammu nu kunnasi usan i lima anna takkina. Ngem ta pappasa na tiempo, magigiammuna nu kunnasi i manammi anna lumakag. Nu massanay yayya, awayyana mabbalin tu atleta. Kunnatun gapa, mawag tam i tiempo anna passanay tapenu mabbalin tu manakam nga Cristiano.

13. Anni i makoffun nittam nga maparigan i appana-panono ni Jehova?

¹³ Taw nga libru, nagigiammu tam nu kunnasi maparigan i appana-panono anna pagimamma ni Jehova ta ganna-gannug. Nagigiammu tam nga tagibaloran anna ayatan i estandarte ira ni Jehova. Nu maddesision, iyavu ta baggi tam: ‘Anni nga dorob onu prinsipio ira ta Biblia i meyaplika taw nga situasion? Kunnasì meyaplika danatun? Anni i kayà ni Jehova nga kuakku?’​—Bibbigan i Proverbio 3:5, 6; Santiago 1:5.

14. Anni i mawag nga kuattam tapenu paladdan i pangurug tam?

¹⁴ Ariattam nakuan magimmang nga paladdan i pangurug tam kani Jehova. Nu kunnasi nga makoffun i pakkakan tu masustansia tapenu massikan i baggi tam, uffunan ittam na paggigiammu meyannung kani Jehova tapenu malladda i pangurug tam. Turi ta naggigiammu ittam tu Biblia, nammuattam i primeru ira nga kinakurug meyannung kani Jehova anna ta dala-dalanna. Ta pappasa na tiempo, mawag tam nga alippawatan i mas  aralam nga ganna-gannug. Yatun i kayà kagian ni Pablo ta pakkagina: “I matagga nga kanan ay para ta manakam ngana.” Nu iyaplika tam i nagigiammu tam, makala ittam tu kinasirib. Kagian na Biblia nittam: “I kinasirib i pinaka-importante nga gannug.”​—Proverbio 4:5-7; 1 Pedro 2:2.

15. Ngatta importante nga kurug i aya tam kani Jehova anna ta wawwaragi tam?

¹⁵ Maski nu masikan anna magawa-gawayyan i tadday nga tolay, mawag tu kanayunna lagapa nga immuguran i baggina tapenu mattalupaddian yayya nga kunnatun. Kunne na gapa, ammu na manakam nga tolay nga mawagna nga mappursigi tapenu mattalupaddian i maladda nga relasionna kani Jehova. Iperaddam nittam ni Pablo: “Usitakkan nu ta mapia i baggi nu, tapenu kannammuan nu nu giminafu kamu ta angngurug.” (2 Corinto 13:5) Ngem ari laman tu maladda nga pangurug i mawag tam. Mawag nga mas dumakal i aya tam kani Jehova anna ta wawwaragi tam. Kinagi ni Pablo: “Maski nu egga niakan ngamin i pakannammu, anna . . . maski nu egga niakan i dakal nga angngurug nga makeyali ta vukig ira, ngem nu awan niakan i aya, awan tu kwentà.”​—1 Corinto 13:1-3.

16. Anni i kayà ni Satanas nga nonopattam?

¹⁶ Kayà ni Satanas nga nonopattam nga ariattam vuluvuga mapagayayya si Jehova. Kayàna nga makkafi i nono tam anna nonopattam nga awan tu solusion na problema tam ira. Manakina nga mattalo ittam ta kapangngurug tam, anna manakina nga magayayya ittam. (Efeso 2:2) Ammu ni Satanas nga makadaral nittam anna ta relasiottam ta Dios i negatibo nga appana-panono. Ngem egga i niyawa ni Jehova tapenu malabanattam i negatibo nga appana-panono. Niddanna ittam tu iddanama.

17. Kunnasi ka-importante i iddanama?

 ¹⁷ Ta 1 Tesalonica 5:8, ikumpara na Biblia i iddanama tam ta helmet nga mapprotekta ta ulu na suddalu ta gerra. Segun tatun, kagitta na helmet i “pagiddanama ta kapaliag.” I pagiddanama ta promesa ira ni Jehova i mapprotekta ta nono tam anna manguffun nittam nga labanan i negatibo ira nga appana-panono.

18, 19. Kunnasi nga napasikan na iddanama si Jesus?

¹⁸ Napasikan si Jesus na iddanamana. Ta ultimu nga gabina ta davvun, neparubang yayya ta matturunug nga mariga nga situasion. Trinaidor yayya na madukko nga kofun. Kinagi na tadday nga arianna yayya kilala. Pinanawan anna sinammangngan yayya na karuan. Pinersigi yayya na mismu nga kalugaranna anna nikiddoda nga maparigatan yayya adde ta matay. Anni i nakoffun nisa tapenu maattamman danatun? “Megafu ta pagayaya nga maginnennag sa, inattamman na anna  arian na nga ninonono i kappasiran nga kapapatay . . . Ay sangoye, agga-itubang ngana yaya ta ziwanan na trono na Dios.”​—Hebreo 12:2.

¹⁹ Ammu ni Jesus nga nu mattalupaddian yayya nga matalo, medayona i Yamana anna mapakurugna nga laddug si Satanas. Namagayayya nisa yatun nga iddanama. Ammuna gapa nga arannina ngana nga makavulu uli i Yamana ta langi. Nakoffun yatun nga iddanama tapenu makapagattam yayya. Gitta ni Jesus, mawag nga maffokus ittam ta iddanama tam. Makoffun yatun nittam tapenu makapagattam maski anni i mesimmu.

20. Anni i makoffun nikaw nga mabbalin tu positibo?

²⁰ Masingi-singan ni Jehova i pangurug anna pagattattammu. (Isaias 30:18; bibbigan i Malakias 3:10.) Ipromesana nga ‘iyawana nikaw i karagatammu.’ (Salmo 37:4) Yatutta pattalupaddianammu nga nakafokus i nono mu ta iddanamam. Kayà ni Satanas nga  mawanakka tu iddanama anna matageno mu nga ari ngana mesimmu i promesa ira ni Jehova. Ngem ari ka mappaffu ta negatibo nga appana-panono! Nu matageno mu nga sisinu nga makkafi i iddanamam, mappoffun kani Jehova. Daddamman i Filipos 4:6, 7: “Arian nu nga kavurungan i anni laman nga gannug. Ngem ta ngamin nga pakimallo nu nga kanayun nga mavulunan ta pabbala-balo, kiddawan nu ta Dios i mawag nu. Ay iyawa na Dios nikamu i imammo na nga ari malippawa na tolay. Yaw i manangngal ta nono anna giffutuan nu.”

21, 22. (a) Anni i gakkag ni Jehova para ta davvun? (b) Anni i determinasiommu nga kuan?

²¹ Kanayun nga monag nga pannonopan i makakkasta nga mappange tam. Aranni ngana i tiempo sonu dayawan na ngamin nga sigga-matolay si Jehova. (Nepakannammu 7:9, 14) Nonopammu ngana laman i pattolay ta napabagu nga mundo. Mas makasta yatun anne ta maski anni nga manono mu! Awan ngana noka si Satanas, i demoniona ira, anna i ngamin nga kinarake. Ariammu ngana noka mattaki onu matay. Lallagu, malukag ka noka kadaggaw nga magawa-gawayyan anna magayayya. Makkaravulu noka nga mattrabahu i ngamin tapenu pabbalinan tu paraiso i davvun. Mapeggan i ngamin tu masingngo nga makan anna memammo nga paddianan. Ari ngana noka nga marake onu vayolente i totolay, lallagu, masippo ira ta kataggi-tadday. Ari mabbayag, magayayya i ngamin nga totolay ta davvun ta “makapabbaw nga kapalubbang na ána na Dios.”​—Roma 8:21.

²² Ikaya ni Jehova nga pabbalinammu yayya nga kapianan nga Kofummu. Kuammu gafu i adde na mawayyam tapenu tuttulan si Jehova anna mas maddukko nisa kadaggaw. Wan, paray nakuan tu sittam ngamin ay mattalupaddian ta aya na Dios tu mannanayun!​—Judas 21, NW.