1-3. (a) Anni i magigiammu tam ta Proverbio 13:20? (b) Ngatta piliattam nakuan tu mapia i kokkofuttam?

NAOBSERBAM kari ngana i tadday nga beybi nga dudulangnganna i maganana? Nigena paga nakapabbida, papariganna i ngamin nga masingan anna maginnana. Durante ta paddakalna, normal ngana laman nga mapariganna i maganana. Ari ngana gafu nga kakkadda-kaddag nga maparigan na adulto ira i appanono anna agguyu-guyu danuri na kanayun nga kavuluda.

² Ta Proverbio 13:20, magigiammu tam: “I makikakkavulu ta masirib ay mabbalin tu masirib.” I termino nga “makikakkavulu,” ari laman tu kayàna kagian nga basta pakikavulu ta tadday nga tolay. Kinagi na tadday nga iskolar na Biblia nga nelagum ta pakikavulu ta tadday nga tolay i pangaya anna pakiddukko nisa. Dakal i influwensia nittam na totolay nga kanayuttam nga kavulu, mas ngana nu madukko ittam nira.

³ Awayyana nga makasta onu marake i influwensia nittam na kokkofuttam. Kunna paga na Proverbio 13:20: “I makillivu-livu ta awan tu ammuna ay marake i pattuppalanna.” Ta Hebreo, i kebalinan na “makillivu-livu” ta tadday nga tolay ay “makikakkavulu” tatun nga tolay, nga gakkag mu nga makikkofun nisa. (Proverbio 22:24; Ukum Ira 14:20) Nu ayatan na  kokkofuttam i Dios, pagarammadda ittam nga mattalupaddian nga matalo nisa. Tapenu makapili ittam tu mapia nga kokkofun, gigiammuattam i klase ira na tolay nga pili-pilian ni Jehova bilang kokkofunna.

4. Ngatta dakal nga pribilehio i mabbalin tu kofun na Dios? Ngatta inagalan ni Jehova tu “kofukku” si Abraham?

⁴ Kayà na Soberano ta Uniberso nga si Jehova nga mabbalin ittam tu kofunna. Daka-dakal nga pribilehio yatun. Pilian tu mapia ni Jehova i kokkofunna. Pilianna danuri mangaya anna mangurug nisa. Daddammammu si Abraham. Sigga-paran yayya nga kuan i maski anni para ta Dios. Namippiga nga pinakurug ni Abraham nga matalo anna minattuppal yayya. Sigga-paran yayya nga isakrifisio maski i anana nga si Isaac. Mangurug si Abraham nga “awayya na Dios nga paginnolayan i natay.” (Hebreo 11:17-19; Genesis 22:1, 2, 9-13) Matalo anna minattuppal si Abraham, yari tu inagalan yayya ni Jehova nga “kofukku.”​—Isaias 41:8; Santiago 2:21-23.

5. Anni i matageno ni Jehova turi ira ta matalo nisa?

⁵ Nabala-balor kani Jehova i kokkofunna. Tagibaloran gapa na kokkofunna i kinamataloda nisa anne ta maski anni. (Bibbigan i 2 Samuel 22:26.) Matalo anna minattuppal ira nisa megafu ta ayatadda yayya. Kagian na Biblia nga ‘i madukko nga pakikofun na Dios ay egga ta matunung,’ turi ira ta mattuppal nisa. (Proverbio 3:32) Iimbitan ni Jehova i kokkofunna nga mabbalin tu espesial nga bisita ta ‘Templona.’ Iimbitanna ira nga maddayaw anna makimallo nisa ta maski anni nga tiempo.​—Salmo 15:1-5.

6. Kunnasi tam mepasingan nga ayatattam si Jesus?

 ⁶ Kinagi ni Jesus: “I sinni laman nga mangaya niakan ay parulattan na i uvovug ku. Ayatan yaya na Yamà.” (Juan 14:23) Tapenu gafu mabbalin tu kofun ni Jehova, mawag tam gapa nga ayatan si Jesus anna kuan i nitudduna nittam. Angngariganna, tuttulattam i dob ni Jesus nga ilayyagayya i mapia nga dumug anna mangngua tu disipulos. (Mateo 28:19, 20; Juan 14:15, 21) Megafu ta ayatattam si Jesus, ‘tuttulattam yayya’ tu mapia. (1 Pedro 2:21) Magayayya si Jehova nu masinganna nga kuattam i adde na mawayya tam tapenu parigan i Anana ta ngamin nga kakkagian anna kukukuattam.

7. Ngatta siguraduattam nakuan nga kokkofun ni Jehova i kokkofuttam?

⁷ I kokkofun ni Jehova ay matalo anna minattuppal, anna ayatadda i Anana. Paparigattam kari gapa si Jehova ta pappili tu kunnatun nga kokkofun? Nu paparigan na kokkofummu si Jesus anna okupadu ira nga tudduan i tanakuan meyannung ta Pappatulan na Dios, moffunaddaka nga mabbalin tu mas mapia nga tolay anna mattalupaddian nga matalo kani Jehova.

8. Anni i magustuammu ta pakkofun ni Ruth anni Noemi?

⁸ Aru nga pakkorofun i mabibbig tam ta Biblia, gitta na pakkofun ni Ruth anna na katuganganna, nga si Noemi. Madduma i nasion anna kultura danaw nga babbay, anna mas bako si Noemi anne kani Ruth. Ngem meggo i pakkofudda megafu ta parehu nga ayatadda si Jehova. Turi ta kayà ni Noemi i manaw ta Moab anna manoli ta Israel, “ari yayya nga pinanawan  ni Ruth.” Kinagina kani Noemi: “I totolem ay mabbalin gapa tu totolè, anna i Dios mu ay Dios ku gapa.” (Ruth 1:14, 16) Masissippo si Ruth kani Noemi. Ta paddattalda ta Israel, nattrabahu tu mapia si Ruth tapenu suportan i kofunna. Iddeddu gapa ni Noemi si Ruth anna tabarangnganna yayya kanayun. Maggigginna gapa nisa si Ruth, yari tu, aru nga bendision i nalawada dua.​—Ruth 3:6.

9. Anni i magustuammu ta pakkofun ni David anni Jonatan?

⁹ Si David anni Jonatan i tadday paga nga ehemplo na mapia nga pakkofun nga parehu nga matalo kani Jehova. Mas kaka tu mattrenta dagun si Jonatan anne kani David anna yayya ngana nakuan i tumunug nga mabbalin tu patul na Israel. (1 Samuel 17:33; 31:2; 2 Samuel 5:4) Ngem tagga ta nakannammuanna nga pinili ni Jehova si David nga mabbalin tu patul, ari yayya nga nappassil onu nakikompetensia. Kingngua lallagu ni Jonatan i ngamin tapenu suportan si David. Angngariganna, turi ta mappeligro si David, zinuffunan yayya ni Jonatan nga ‘pasikannan i pattalona kani Jehova.’ Pinappeligrona paga i inangona para kani David. (1 Samuel 23:16, 17) Matalo gapa nga kofun si David. Nipromesana nga tangngallanna i familia ni Jonatan, anna sinuppalna yatun nga promesa maski nguri ta natay ngana si Jonatan.​—1 Samuel 18:1; 20:15-17, 30-34; 2 Samuel 9:1-7.

10. Anni i magigiammum ta pakkorofun na tallu nga Hebreo nga kabataan?

¹⁰ I tallu nga makkorofun nga kabataan nga Hebreo nga da Sadrac, Mesac, anni Abednego ay nepanaw ta lugarda ta kabbidda. Gafu ta arayyu ira ta familiada, nakka-uffu-uffun ira nga mattalupaddian nga matalo  kani Jehova. Turi ta adulto ngana ira, napurueban i pangurugda tagga ta nimandu nira ni Patul Nabucodonosor nga maddayaw ira ta vulawan nga santu. Nammanaki da Sadrac, Mesac, anni Abednego nga maddayaw ta santu anna kudda ta patul: “Ariammi lagapa nga masserbi ta dios mu ira onu maddayaw ta vulawan nga santu nga nipataddag mu.” Maski nu napurueban i pangurug naw nga tallu nga makkorofun, nattalupaddian ira nga matalo ta Diosda.​—Daniel 1:1-17; 3:12, 16-28.

11. Ngatta ammu tam nga mapia nga makkofun si Pablo anni Timoteo?

¹¹ Turi ta nakilala ni apostol Pablo i kabataan nga si Timoteo, nasinganna nga iddeddu ni Timoteo si Jehova anna talaga ikavurunganna i kongregasion. Yari tu sinanay ni Pablo si Timoteo tapenu duffunan i wawwaragi ta nadduruma nga lugar. (Kingngua 16:1-8; 17:10-14) Kitellappo si Timoteo yari tu nakagi ni Pablo: ‘Kagittami i mattama ta nipasserbimi nga dua megafu ta evanghelio.’ Ammu ni Pablo nga talaga ‘ikavurungan’ ni Timoteo i wawwaragi. Nabbalin ira dua tu mapia nga makkofun durante ta malappo nga passerbida kani Jehova.​—Filipos 2:20-22; 1 Corinto 4:17.

12, 13. (a) Ngatta magimmugug ittam nakuan ta piliattam nga kokkofun maski ta kongregasion? (b) Ngatta nitabarang ni apostol Pablo i 1 Corinto 15:33?

¹² Ta kongregasion, makagigiammu ittam ta wawwaragi tam anna moffunattam i kataggi-tadday nga mattalupaddian nga matalo. (Bibbigan i Roma  1:11, 12.) Ngem maski ta kongregasion, mawag tu magimmugug ittam ta piliattam nga madukko nga kokkofun. Nadduruma i kultura anna naggafuan na wawwaragi tam. Bagu laman ta kongregasion i karuan, ngem i karuan, nabayag ngana nga massesserbi kani Jehova. Mawag i tiempo tapenu malladda i relasion na tadday kani Jehova, nu kunnasi nga mawag i tiempo tapenu malutu i prutas. Yari tu mawag nga makkapasa-pasensia anna makka-aya-aya ittam anna kanayun nga piliattam tu mapia i kokkofuttam.​—Roma 14:1; 15:1; Hebreo 5:12–6:3.

 ¹³ Nu mittan, egga i luttuag nga problema ta kongregasion, yari tu mawag tu mas nga magimmugug ittam. Baka egga i wagi nga magaggangngua tu mekontra ta Biblia. Onu egga i wagi nga minarreklamo nga makadaral ngana ta kongregasion. Ariattam ngana makaddag tatun, megafu ta maski ta ollu nga siglo, nu mittan egga gapa i problema ira ta kongregasion. Kakuruganna, nitabarang ni apostol Pablo ta Cristiano ira gari: “Ari kamu nga makitabag. ‘I marakay nga kakavvulu ay makadaral ta mapia nga kata-katolay.’” (1 Corinto 15:12, 33) Sinabarangngan paga ni Pablo si Timoteo nga magimmugug ta pilianna nga madukko nga kofunna. Kunnatun ittam nakuan gapa.​—Bibbigan i 2 Timoteo 2:20-22.

14. Kunnasi nga afektan na pappili tam tu kokkofun i relasiottam kani Jehova?

¹⁴ Mawag tam nga protektan i relasiottam kani Jehova. Yatun i pinaka-importante nga gannug nga egga nittam. Yatutta lillitattam i makiddukko ta maski sinni nga mamakkafi ta pangurug tam anna makadaral tatun nga relasion. Ariattam ekspektan nga danum i masussu na espongha nga nebabad ta silam; ariattam gapa ekspektan nga malogon para nittam nga kuan i fustu nu i pili-piliattam nga kokkofun ay danuri mangngua tu marake. Magimmugug ittam ta pappili tu madukko nga kokkofuttam.​—1 Corinto 5:6; 2 Tesalonica 3:6, 7, 14.

15. Anni i kuammu tapenu mapeggakka tu mapia nga kokkofun ta kongregasion?

¹⁵ Ta kongregasion, makaleg ka tu totolay nga kurug nga ayatadda si Jehova. Puedem ira nga mabbalin tu madukko nga kokkofun. (Salmo 133:1) Ariammu laman makikkofun ta ka-edad mu onu ta parehum  tu naddakallan. Daddamman nga dakal i nakkakan ni Jonatan kani David, anna abbabbing gapa si Ruth kumpara kani Noemi. Kayà tam tuttulan i tabarang na Biblia: “Vukatan nu ta mapia i giffutuan nu!” (2 Corinto 6:13; bibbigan i 1 Pedro 2:17.) Durante nga mas parigammu si Jehova, mas aru i maya nga mabbalin tu kofummu.

16, 17. Nu egga i nakataki nittam ta kongregasion, anni nakuan i ariattam nga kuan?

¹⁶ Ta familia, nadduruma i personalidad, opinion, anna diskarte na kada miembro natun. Kunnatun gapa ta kongregasion. Mas magayayya i pattolay megafu tatun nga padduruma anna aru i magigiammu tam ta kataggi-tadday. Ngem nu mittan, yatun nga padduruma i rason na ari pakkarantindian ta wawwaragi tam anna na pallussaw tam nira. Puede paga nga mattaki i nono tam onu matakitan ittam. (Proverbio 12:18) Ipamavuluttam kari nga danatun nga problema i mamakkafi ta nono tam anna mangiyarayyu nittam ta kongregasion?

¹⁷ Ari. Maski nu egga i nakataki nittam, ariattam umarayyu ta kongregasion. Ari tu si Jehova i nakataki nittam. Niyawana i inango tam anna i ngamin nga egga nittam. Mepangngo yayya ta aya anna kinamatalo tam. (Nepakannammu 4:11) Regalu naggafu kani Jehova i kongregasion nga manguffun nittam tapenu mapattalupaddiattam nga maladda i pangurug tam. (Hebreo 13:17) Ariattam vuluvuga pammanakitan i regaluna megafu laman ta egga i nakataki nittam.​—Bibbigan i Salmo 119:165.

18. (a) Anni i makoffun nittam tapenu makasundu i wawwaragi tam? (b) Ngatta pakomattam i tanakuan?

 ¹⁸ Ayatattam i wawwaragi tam anna kayà tam nga makasundu tam ira. Ari ekspektan ni Jehova i maski sinni nga tolay nga mabbalin tu perfekto, yatutta kunnatun tam nakuan gapa. (Proverbio 17:9; 1 Pedro 4:8) Makkamali ittam ngamin, ngem uffunan ittam na aya tapenu ‘makkapaka-pakoma ittam.’ (Colosas 3:13) Fugaddan ittam na aya nga padakallan i simple laman nga problema. Kurug nga nu egga nakataki nittam, mariga nga kattaman yatun. Alistu laman i mapporay anna mangipappan tu taki na nono tatun nga tolay. Ngem sittam lagapa i ari nga magayayya. Ngem nu pakomattam i nakataki nittam, memammo i nono tam, egga pattaradday ta kongregasion, anna pinaka-importante, makasta i relasiottam kani Jehova.​—Mateo 6:14, 15; Lucas 17:3, 4; Roma 14:19.

19. Kanni tam nga mawag nga iyemmang i pakikavulu ta tadday ta kongregasion?

¹⁹ Masingan i pakka-aya-aya na familia nu kuan na kada miembro i partena tapenu mapagayayya i kataggi-tadday. Ngem kunnasi nu narrebelde i tadday? Baka namippiga ngana yayya nga zinuffunan na familia, ngem nammanakitanna. Awayyana nga naddesision yayya nga manaw ta balay, onu nikiddaw na ulu na familia nga manaw yayya. Posible nga mesimmu i kunnatun ta kongregasion. Baka pakakuan na tadday i gannug ira nga kalussaw ni Jehova anna makadaral ta kongregasion. Pammanakitanna i uffun anna ipasinganna ta konduktana nga arianna ngana  kayà i mabbalin tu parte na kongregasion. Baka pilianna nga panawan i kongregasion onu posible nga mawag nga madisfellow onu malsa yayya ta kongregasion. Nu mesimmu yatun, manawag nga kagian na Biblia nga ‘ariattam nga mevulu’ nisa. (Bibbigan i 1 Corinto 5:11-13; 2 Juan 9-11) Talaga mariga yaw nu kofuttam yayya onu kafamilia tam. Ngem ta kunnaw nga situasion, mawag nga mas matalo ittam kani Jehova anne ta maski sinni.​—Innan i Endnote 8.

20, 21. (a) Kunnasi nga pangipasingan tu aya i unnug na paddisfellow? (b) Ngatta importante nga piliattam tu mapia i kokkofuttam?

²⁰ Meddu nga probision ni Jehova i paddisfellow. Immuguran natun i kongregasion turi ira ta ari magimporta ta estandarte ira ni Jehova. (1 Corinto 5:7; Hebreo 12:15, 16) Uffunan ittam natun nga ipasingan i aya ta masanto nga ngagan ni Jehova, ta atannang nga estandartena ira, anna kani Jehova mismu. (1 Pedro 1:15, 16) Pangipasingan gapa tu aya ta tadday nga ari ngana nga miembro na kongregasion i paddisfellow. Yaw nga madammo nga disiplina ay awayyana nga makoffun tapenu malippawa na tadday nga marake i kukukuanna anna mamaguyu nisa nga manguli. Aru ta dati nga nadisfellow i nanoli gabbalaman kani Jehova anna meddu nga nalawa uli ta kongregasion.​—Hebreo 12:11.

²¹ Wan, magga egga i efekto nittam na kokkofuttam. Yari tu importante gafu nga piliattam tu mapia i kokkofuttam. Nu ayatattam danuri mangaya kani Jehova, mapalevutan ittam tu totolay nga manguffun nittam nga makapattalupaddian nga matalo nisa adde ta mannanayun.