Nikamu nga mangaya kani Jehova nga Dios anna ta Uvovugna, i Biblia:

Kinagi ni Jesus: “Kannammuan nu i kurug anna yaw i mamalubbang nikamu.” (Juan 8:32) Nonopammu ngana laman i natageno mu turi ta ollu nga nammuammu i kinakurug ta Biblia! Makapagayayya nga mammuan nga taw ta mundo nga napannu tu kinaladdug, awayya tam mammuan i kinakurug.​—2 Timoteo 3:1.

Kayà ni Jehova nga Dios nga mammuattam i kinakurug. Anna megafu ta iddukattam i totolay, kayà tam ikagi yatun nira. Ngem egga paga i mekiddaw ta passerbi ta Dios. Mawag tu kuattam i adde na mawayya tam tapenu mattolay bilang Cristiano megafu ta kuruga ikakua tam i prinsipio ira ni Jehova. Kinagi ni Jesus i importante nga makua tam tapenu mapakurug i aya tam ta Dios. Kunna: “Nu parulattan nu i bili-bilik-ku, mannanayuk-kamu ta aya ku ta kunna pamarulo ku ta bili-bilin na Yamà anna pannanayuk-ku ta aya na.”​—Juan 15:10.

Kuruga iddeddu ni Jesus i Yamana, anna parulattanna i ngamin nga ipakua nisa na Yamana. Nu parigattam si Jesus ta pattoletam, ayatan ittam ni Jehova anna magayayya ittam. Kagitta na kinagi ni Jesus, “sangoye ta ammu nu ngana ngamin danaw, mapalag kamu nu kuan nu ira.”​—Juan 13:17.

Iddanamammi nga moffunan naka naw nga libru tapenu mattoleka segun ta kinakurug ta Biblia anna mabbalikka tu kofun na Dios. Ipakimallomi nga dumakal i aya mu ta Dios anna mattalupaddiakka “ta aya na Dios . . . mappange ta mannanayun nga inango.”​—Judas 21, NW.