Nu karuan igala-galo onu poryan ittam na totolay nu ipakannammutam nira i meyannung kani Jehova. Megafu ta, baka ikayatam ngana i magimmang ta pangipakannammu ta Dios. Natagenomu kari ngana kunnatun?— Estorian na Biblia i tadday nga bagitolay nga iddukanna si Jehova ngem mammaggi nagimmang ta pangipakannammuna meyannung kani Jehova. Jeremias i ngaganna. Ammuatta i estoriana.

Turi ta bagitolay ngana si Jeremias, kinagi sa ni Jehova nga tabarangnganna i totolay nga iyemmang i marake nga kukukuadda. Kuruga mariga yaw para kani Jeremias gafu ta maganassing yayya. Kinagina kani Jehova: ‘Ariakku ammu nu anni kagiakku. Tadde nga laman nga abbing.’ Ngem kinagi sa ni Jehova: ‘Ariammu maganassing. Uffunattaka.’

 Pinegafanan ni Jeremias nga tabarangngan i totolay nga maparusahang ira nu ariadda manguli. Para nikaw, sinuppal kari na totolay i kinagi ni Jeremias?— Ari. Negala-galo anna napporay gapa i karuan sa. Egga paga maya pumatay sa. Anni pano natageno ni Jeremias?— Naganassing nga nekagina: ‘Ariakku ngana maguvovug meyannung kani Jehova.’ Ngem simmuku ngana kari yayya?— Ari. Iddeddukanna si Jehova yari tu arianna nepamavulung nga magimmang mangipakannammu meyannung kani Jehova. Gafu ta arianna simmuku, pinalliag yayya ni Jehova.

Namittan, egga marake nga totolay i nangitaga kani Jeremias ta aralam nga avvu nga aru fuyona. Awan tu makang anna menumna. Nebattadda si Jeremias ta avvu tapenu matay yayya. Ngem inuffunan yayya ni Jehova nga makalawan ta avvu!

Anni magigiammum ta ehemplo ni Jeremias?— Maski nu egga tiempo nga naganassing yayya, arianna nagimmang nga nangipakannammu meyannung kani Jehova. Nu ipakannammum ta totolay i meyannung kani Jehova, awayyana nga igala-galo onu makaporay ira nikaw. Baka mepasiranang onu maganassikka. Ngem ariammu magimmang nga ipakannammu i meyannung kani Jehova. Nu kunnasi nga inuffunanna si Jeremias kanayun gapa nga uffunannaka.