LEKSION 2
Ikaya ni Rebeka nga Mapasaya si Jehova
Iddeddukan ni Rebeka si Jehova. Isaac i ngagan na atawana. Iddedukan gapa ni Isaac si Jehova. Kunnasi nga nakilala ni Rebeka si Isaac? Anni kingnguana tapenu mapasaya si Jehova? Ammuatta i meyannung kani Rebeka.
Si Abraham anna Sara i magana ni Isaac. Maddiang ira ta Canaan, lugar na totolay nga ari maddayarayaw kani Jehova. Ngem ikaya ni Abraham nga mangatawa si Isaac tu babay nga maddayarayaw kani Jehova. Yari tu zinogna si Eliezer nga aripanna tapenu iyaleganna tu atawa si Isaac ta Haran. Tari nga maddiang i parientes ira ni Abraham.
Manotoli si Rebeka ta vuvung tapenu mapenum i kamelio ira
Nabbiahe si Eliezer kavulu i aripan ira ni Abraham. Ararayyu i inangngayadda. Nangivulu ira tu mafulu nga kamelio nga nangikargadda tu makan anna regalu. Kunnasi nga mammuan ni Eliezer nu sinni pilianna para kani Isaac? Ta pakadde ni Eliezer anna i aripan ira ta Haran, nagimmang ira ta vuvung, gafu ta ammu ni Eliezer nga umay ngana tari i totolay tapenu mattagag tu danum. Nakimallo yayya kani Jehova: ‘Nu makkiddaw nga tu danum ta tadday nga maginganay anna nu penumanna anna i kamelio ira, mammuakku nga yaw i babay nga napilim.’
Tapus minay bigla si Rebeka ta vuvung. Kagian na Biblia nga guguapa yayya. Nakkiddaw si Eliezer sa tu menum nga danum. Kinagi ni Rebeka: ‘Wan. Iddattaka tu danum. Umay nga mattagag para nikaw anna para ta kameliom.’ Fugurammu! Napakaru nga danum i menum na mapangal ira nga kamelio. Manotoli si Rebeka ta vuvung. Masingammu kari ta litratu nu kunnasi kariga na kingnguana?— Maggi ari mangurug si Eliezar nu kunnasi nga sinabbag ni Jehova i pakimallona.
Iniddan ni Eliezer si Rebeka tu napakaru nga makakkasta nga regalu. Inimbita ni Rebeka si Eliezer anna i aripan ira ta baleda. Kinagi ni Eliezer nu ngatta zinog yayya ni Abraham tari anna nu kunnasi nga sinabbag ni Jehova i pakimallona. Masaya i familia ni Rebeka nga meyatawa yayya kani Isaac.
Nevulu si Rebeka kani Eliezer ta Canaan anna neyatawa kani Isaac
Ngem ikaya kari ni Rebeka nga meyatawa kani Isaac?— Ammu ni Rebeka nga si Jehova i nangidog kani Eliezer ta diadda. Turi ta pinakkiavutan na familia ni Rebeka yayya nu ikayana mevulu ta Canaan tapenu meyatawa kani Isaac, kinagina: ‘Wan, ikayaku i umay.’ Insigida nga nevulu yayya kani Eliezer. Turi ta egga ngana ira ta Canaan, neyatawa yayya kani Isaac.
Binendisionan ni Jehova si Rebeka gafu ta nattuppal yayya. Ta pappasa na aru nga dagun, neyana si Jesus ta mismu nga familia ni Rebeka! Nu kagittam si Rebeka nga pinasayana si Jehova, mabendisionakka gapa.
