LEKSION 13
Ikaya ni Timoteo nga Uffunan i Totolay
I bagitolay nga si Timoteo ikakayana nga uffunan i totolay. Bimmisita yayya ta aru nga lugar tapenu moffunanna i karuan. Megafu taw, kuruga makapagayayya i pattolena. Ikayamu kari nga maginna istoriana?—
Sinudduan na yena anna kako ni Timoteo yayya meyannung kani Jehova
Ziminakal si Timoteo ta siudad na Listra. Turi ta abbing paga yayya, netuddu sa na kakona nga si Loida anna yenana nga si Eunice i meyannung kani Jehova. Turi ta ziminakal ngana yayya, ikayana nga uffunan i totolay nga mammammuda si Jehova.
Turi ta bagitolay ngana si Timoteo, nakkiavutan ni Pablo nu ikayana nga mevulu sa nga mabbiahe ta nadduruma nga lugar tapenu mallayyagayya. Siminabbag yayya: ‘Wan!’ Disididu yayya nga mevulu anna uffunan i totolay.
Nevulu si Timoteo kani Pablo ta Tesalonica nga siudad na Macedonia. Tapenu makadde ira tari, lumakag ira tu ararayyu anna mattakay ira ta dakal nga barangay. Turi ta zimittal ira, inuffunadda i aru nga totolay nga mammammuda si Jehova. Ngem nakaporay i karuan nga totolay anna ikayada ira nga patakitan. Mawag nga manaw da Pablo anna Timoteo tatun anna magali ta tanakuan nga lugar tapenu mallaygayya.
Kuruga makapagayayya pattolay ni Timoteo
Nappasa i piga vulan, zinog ni Pablo si Timoteo nga tolianna i Tesalonica tapenu mammuanna i paddia-paddian na wawwagi tari. Delikadu yatun nga siudad yari tu mawag nga magutu si Timoteo tapenu matolina yatun nga lugar! Ikavurunganna i wawwagi tari yari tu minay lagapa yayya. Egga makakkasta nga balitana nga nanoli kani Pablo. Makakkasta i paddia-paddian na wawwagi tari!
Aru nga dagun nga nakipattrabahu si Timoteo kani Pablo. Namittan netura ni Pablo nga si Timoteo i kakastan nga madog tapenu uffunan i kongregasion ira. Iddeddukanna gare si Jehova kunne na gapa i totolay.
Iddukammu kari i totolay anna ikayamu kari ira nga uffunan tapenu mammammu si Jehova?— Nu kuammu ya, mabbaling tu masaya i pattolem nga kagitta na kingngua ni Timoteo!
