LEKSION 5
Kanayun nga Kingngua ni Samuel i Fustu
Abbing paga laman si Samuel, naddiang anna nasserbi ngana yayya ta tabernakulo. Yatun i lugar nga angngayan na totolay tapenu maddayarayaw kani Jehova. Ammum kari nu ngatta egga si Samuel ta tabernakulo? Ollu ammuatta labbi si Ana nga yenana.
Nabayag nga tiempo nga ari makkaana si Ana maski nu talaga ikakayana. Yari tu naddasal yayya kani Jehova nga nakimemallo tu uffunna. Nepromesana nga nu makkaana yayya, iyangena i anana ta tabernakulo tapenu maddiang anna masserbi tari. Sinabbag ni Jehova i pakimallo ni Ana. Nakkaana yayya anna nengagananna tu Samuel. Turi ta tallu onu appa ngana dagun ni Samuel, neyangena yayya ta tabernakulo tapenu masserbi ta Dios, kagitta na nepromesana.
Si Eli i katannangan nga pari ta tabernakulo. Egga dua nga anana nga massesserbi nga pari gapa. Tandaanammu, balay nga paddayarayawan ta Dios i tabernakulo yari tu mapia nga gannagannug nakuan i kuan na totolay tari. Ngem marake i kukukuan na dua nga ana ni Eli. Masingisingan yatun ni Samuel. Parigan kari ni Samuel i marake ira nga kukukuan na dua nga ana ni Eli?— Ari. Kanayun nga kingnguana nu anni i fustu, nu anni i netuddu na yenana sa tu kuanna.
Para nikaw, anni mawag nga kuan ni Eli ta dua nga anana?— Mawag nga parusahanna ira. Arianna nakuan ira nga pagurayan nga masserbi ta balay na Dios. Ngem ari nga kingngua ni Eli yatun yari tu napporay si Jehova sa kunne na gapa ta dua nga anana. Naddesision si Jehova nga parusahan ira.
Kinagi ni Samuel kani Eli i mensahe ni Jehova
Tadday nga gabi ta pakkatrug ni Samuel, naginnana tu egga mangangagal sa: ‘Samuel!’ Inalistuanna i minay kani Eli, ngem kinagi ni Eli: ‘Ariattaka inagalan.’ Namiddua nga nesimmu yaw. Ta kapilluna, kinagi ni Eli kani Samuel nga nu maginnana paga uli i ngaral, yaw i ikagina: ‘Fabor bi laman Jehova, maguvovukka; Maggigginna nga.’ Kunnatun gavu i kingngua ni Samuel. Kabalinna, kinagi ni Jehova kani Samuel: ‘Ikagim kani Eli nga parusahakku i familiana gafu ta kinikkingnguada nga marake.’ Para nikaw, mabi kari para kani Samuel nga kagian yatun kani Eli?— Ari. Ngem maski nu maganassing si Samuel, kingnguana i kinagi ni Jehova sa. Nesimmu i kinagi ni Jehova. Natay i dua nga ana ni Eli. Natay gapa maski si Eli.
Makasta nga ehemplo si Samuel para nittam. Kingnguana nu anni i fustu maski nu masingisinganna i marake nga kukukuan na tanakuan nga totolay. Sikaw? Parigammu kari si Samuel? Kanayummu kari kuan nu anni i fustu? Nu kuammu yatun, siguradu nga mapasayam si Jehova anna i maganamu!
