Kanayun kari nga mabi mattuppal ta maganamu?— Mariga nu karuan. Ammum kari nu sinni nattuppalan ni Jesus?— Parehu nga nattuppal kani Jehova kunne na gapa ta maganana. Moffunakka na ehemplona tapenu mabbalikka gapa nga minattuppal ta maganamu maski nu mariga kuan yatun. Gigiammuatta paga i meyannung kani Jesus.

Nige neyana ni Jesus ta davvun, dati nga kavuluna ta langi i Yamana, si Jehova. Ngem egga gapa magana ni Jesus ta davvun. Jose anna Maria i ngagadda. Ammum kari nu kunnasi nga nabbaling tu maganana ira?—

Nepay ni Jehova ta san ni Maria i inango ni Jesus tapenu meyana anna mattolay yayya ta davvun. Milagro yatun! Ziminakal si Jesus ta san ni Maria kagitta na paddakal na tanakuan ira nga abbing ta san na yenada. Nappasa i siam nga vulan, neyana ni Maria si Jesus. Yari tu nabbaling da Jose anna Maria tu magana ni Jesus ta davvun.

Turi ta 12-anyos si Jesus, egga kingnguana nga mangipasingan nu kunnasi pangidduna ta Yamana, si Jehova. Nesimmu yaw turi ta minay si Jesus anna i familiana ta Jerusalem para ta Paskua. Selebrasion yaw na Israelita nga mangipanono nira nu kunnasi nga pinalliag ira ni Jehova ta Ehipto. Turi ta lubbe ngana ira ta baleda, ari nasingan da Jose anna Maria si Jesus. Ammum kari nu sitaw dianna?—

Nabbibi nga nanoli da Jose anna Maria ta Jerusalem tapenu alegadda nu sitaw dianna. Fermi vurudda ta ariadda malegan si Jesus. Kabalin na tallu nga aggaw, nalegadda yayya ta templo! Ammum kari nu ngatta egga si Jesus ta templo?— Megafu ta aru mammuanna tari meyannung kani Jehova. Iddeddukanna si Jehova anna ikayana nga magigiammu nu kunnasi nga mapasaya i yamana. Maski turi ta ziminakal ngana si Jesus, kanayun nga nattuppal kani Jehova. Nattuppal yayya maski ari tu mabi sa anna maski nu mazzigariga yayya. Sinuppal na kari gapa da Jose anna Maria?— Wan, kinagi na Biblia nga kingnguana yatun.

Anni magigiammum ta ehemplo ni Jesus?— Kanayun nga mattuppalka ta maganamu maski nu mariga nu karuan. Kuammu kari yatun?—