Innammu i abbing ta litratu. Magitetadday anna maganassing yayya, ari kari? Natagenomu kari ngana yatun?— Matageno na ngamin i kunnatun nu karuan. Egga estorian na Biblia nga kokkofun ni Jehova nga nakatageno gapa tu magitetadday anna maganassing ira. Tadday nira si Elias. Gigiammuatta nu sinni yayya.

Nabayag ngana nga maddiang si Elias ta Israel nige paga nga neyana si Jesus. Si Acab i patul na Israel turi. Ari yayya nga maddayarayaw ta kurug nga Dios nga si Jehova. Maski gapa i atawana nga si Jezebel. Si Baal, ari kurug nga dios, i diosda nga magatawa. Yatun i gafuna nga i totolay na Israel maddayarayaw ngana ira gapa kani Baal. Marake nga reyna si Jezebel. Ikayana nga patayan i ngamin nga maddayarayaw kani Jehova, maski si Elias! Ammum kari nu anni kingngua ni Elias?—

 Nattammang yayya! Minay ta ararayyu, ta disierto anna nattagu ta kueba. Ammum kari nu ngatta kingnguana yatun?— Wan, naganassing yayya. Ngem ari nakuan maganassing si Elias. Ngatta? Gafu ta ammuna nga uffunan yayya ni Jehova. Nepasingan ngana ni Jehova i pakapangnguana kani Elias. Namittan, sinabbag ni Jehova i pakimallo ni Elias gukaban na afi nga naggafu ta langi. Yari tu ikayana nga uffunan si Elias!

Turi ta egga si Elias ta kueba, nakiyuvovug si Jehova sa. Nakkiavu sa: ‘Anni kukukuammu taw?’ Siminabbag si Elias: ‘Sakan ngana laman i navuna nga maddayarayaw nikaw. Tattadde ngana, maganassing nga gafu ta patayadda gapa.’ I abbo ni Elias natay ngana ngamin i maddayarayaw kani Jehova. Ngem kinagi ni Jehova kani Elias: ‘Ari tu kurug yatun. Egga paga 7,000 nga maddayarayaw niakan. Pasikannammu i nonomu. Aru paga ipakua nikaw!’ Para nikaw nagayayya kari si Elias nga nakaginna tatun?—

Anni magigiammum ta nesimmu kani Elias?— Ariammu nakuan maganassing. Ari ka nga tattadday. Egga kokkofummu nga mangaya kani Jehova anna mangaya nikaw. Makapangngua si Jehova anna kanayun nga uffunannaka! Masaya ka kari nga mammuan nga ari ka talaga tattadday?—