LEKSION 12
Magutu i Kanakan ni Pablo
Amuatta istoria na tadday nga bagitolay nga namaliag ta angkalna. Si apostol Pablo i angkalna. Ariattam ammu i ngagan na bagitolay, ngem ammutam nga egga kingnguana nga nangipasingan tu magutu yayya. Ikayamu kari nga maginna nu anni kingnguana?—
Nefuku si Pablo ta Jerusalem. Ginafuda gafu ta mallayyagayya yayya meyannung kani Jesus. Nekalussaw na marake nga lallaki si Pablo, yari tu egga marake nga nanonoda nga kuan sa. Kinagida: ‘Kagiattam ta lider na suddalu nga iyangay na suddaluna ira si Pablo ta korte. Mattagu tam ta dalan. Sonu mattalebag si Pablo, patayattam yayya!’
Kinagi na kanakan ni Pablo sa anna ta lider na suddalu i marake nga plano
Naginna na kanakan ni Pablo yaw nga plano. Anni pano kuanna? Minay yayya ta nakefukutan ni Pablo anna kinagina yaw sa. Insigida, kinagi ni Pablo ta kanakanna nga ikagina yaw nga marake nga plano ta lider na suddalu. Para nikaw, mabi kari yaw ta kanakan ni Pablo nga kagian ta lider na suddalu?— Ari, gafu ta ari nga basta-basta marannian i lider. Ngem magutu i kanakan ni Pablo ta kinagina i marake nga plano na totolay ta lider na suddalu.
Ammu na lider i kingnguana. Nanga yayya tu maggi-500 nga suddalu tapenu protektadda si Pablo! Nebilinna nga iyangeda si Pablo ta Cesarea tatun nga gabi. Napalliag kari si Pablo?— Wan, ari nga napatay na marake nga totolay si Pablo! Ari nga natuluy i marake nga planoda.
Anni magigiammum taw nga istoria?— Kayang-kayam nga mabbaling tu magutu kagitta na kanakan ni Pablo. Mawag nga magutu ittam nu kagiattam i meyannung kani Jehova. Magutu ka kari kada kakkagiammu i meyannung kani Jehova?— Nu kuammu yatun, egga mepalliagmu nga inango.
