LEKSION 3
Nangurug si Rahab Kani Jehova
Nonoppammu nga egga ittam ta siudad na Jerico. Yaw nga siudad ay egga ta Canaan. Lugar yaw na totolay nga ari mangurug kani Jehova. Taw maddiang i tadday nga babay nga mangngagan tu Rahab.
Ta kabbing ni Rahab, naginnana i estoria meyannung kani Moises, nu kunnasina nga ginaddua i Uzzin nga Bebay anna nu kunnasina nelawan i Israelita ta Ehipto. Naginnana gapa i meyannung ta panguffun ni Jehova ta Israelita tapenu mangaffu ira kontra ta kalabadda. Tapus nabalitaanna nga nakkampu i Israelita aranni ta Jerico!
Gafu ta mangurug si Rahab kani Jehova, netaguna i espiya ira
Tadday nga gabi, dua nga Israelita i minay ta siudad na Jerico anna sekreto nga nagobserba. Espiya i agal nira. Minay ira ta balay ni Rahab. Pinatallunna ira. Tatun nga gabi, nammuan na patul na Jerico nga egga espiya ira ta siudad anna egga ira ta balay ni Rahab. Nangidog i patul tu maggáfu nira. Netagu ni Rahab i dua nga espiya ta ato na balena anna kinagina ta totolay na patul nga maggáfu nira: ‘Egga ira taw ganuri, ngem kapapanawda laman ta siudad. Bitannu! Daddanannu baka magáfunu paga ira!’ Ammum kari nu ngatta prinotektan ni Rahab i espiya ira?— Mangurug gare yayya kani Jehova anna ammuna nga iyawa ni Jehova i lugar na Canaan ta Israelita.
Nige nanaw na espiya ira ta balay ni Rahab, nepromesada sa anna ta kafamiliana nga awan tu marake nga mesimmu nira nu madaral i Jerico. Ammum kari nu anni ipakuada kani Rahab?— Kinagi na espiya: ‘Apammu yaw uzzin nga galu, anna ibesimmu ta lawan na bentam. Nu kuammu yatun, mapaliag ngamin nga egga ta unag na balem.’ Sinuppal ngamin ni Rahab i kinagi na espiya nga kuanna. Ammum kari nu anni tumunug nga nesimmu?—
Pinalliag ni Jehova si Rahab anna i kafamiliana
Ta pappasa na aru nga aggaw, awan tu tattannug nga nilevu na Israelita i siudad. Mamittan ta kada aggaw nga kingnguada yatun ta unag na annam nga aggaw. Ngem ta meka-pitu nga aggaw, nilevuda i siudad ta mamippitu. Kabalinna, nakkulle ira tu masikang. Zinabba ni Jehova i pader na siudad. Ngem ari nadabba i balay nga egga uzzin nga galu ta lawan na benta. Masingammu kari ta litratu?— Napalliag si Rahab anna i kafamiliana!
Anni nagigiammum kani Rahab?— Nangurug si Rahab kani Jehova gafu ta makakkasta nga gannagannug nga nagigiammuna sa. Aru gapa i mammuammu nga makakkasta nga gannagannug meyannung kani Jehova. Kagitta ni Rahab mangurugka kari kani Jehova?— Siguradu nga mangurugka gapa!
