LEKSION 11
Nattura Ira Meyannung Kani Jesus
Ammum kari nu sinni i lallaki ira ta litratu?— Ira Mateo, Marcos, Lucas, Juan, Pedro, Santiago, Judas, anna si Pablo. Nattolay yaw nga lallaki turi ta tiempo na kegga ni Jesus ta davvun. Ammuatta i aru paga meyannung nira.
Ammammum kari yaw ira nga lallaki?
Tallu nira i apostol nga nakavulu ni Jesus ta pallayyagayya. Ammum kari nu sinni ira?— Ira Mateo, Juan, anna Pedro. I apostol nga da Mateo anna Juan kilalada tu fermi si Jesus. Parehu ira nga nattura tu libru meyannung ta pattolay ni Jesus. Nattura gapa si apostol Juan tu libru nga nengaganan tu Ollu nga Juan, Mekarua nga Juan, anna Mekatallu nga Juan. Nattura si apostol Pedro tu dua nga libru nga egga ta Biblia. Nengaganan yaw tu Ollu nga Pedro anna Mekarua nga Pedro. Ta mekarua nga turana, netura ni Pedro i meyannung ta tiempo turi ta naguvovug si Jehova ta langi. Kinagi ni Jehova meyannung kani Jesus: ‘Yaw i anaku. Iddeddukakku yayya, makapagayayya yayya niakan.’
I tanakuan gapa nga lallaki ta litratu, itudduda nittam i meyannung kani Jesus. Neturada yaw ta libru nga egga ta Biblia. Tadday nira si Marcos. Awayyana nga egga yayya turi ta ginafuda si Jesus. Nasinganna i ngamin nga nesimmu. Si Lucas i tadday paga nira. Doktor yayya anna awayyana nga nabbaling nga Cristiano ta kabalin na patay ni Jesus.
Dua paga nga masingammu ta litratu i nattura tu libru na Biblia. Mas mabbing ira nga wawwagi ni Jesus. Ammum kari ngagadda?— Ira Santiago anna Judas. Turi ta ollu, ariadda nangurug kani Jesus. Kinagida nga makkatok yayya. Panguriananna, nangurug ira kani Jesus anna nabbaling gabbalaman tu Cristiano.
I urian nga masingammu ta litratu nga nattura tu libru na Biblia ay si Pablo. Saulo i ngaganna nige na nga nabbaling tu Cristiano. Ikalussawna i Cristiano anna ziniga-rigatanna ira. Ammum kari nu kunnasi nga nabbaling tu Cristiano si Pablo?— Tadday nga aggaw, mappange si Pablo ta Damasco. Gavva egga ngaral nga naginnana nga naggafu ta langi nga makiyuvovug sa. Ngaral ni Jesus! Nakkiavu kani Pablo: ‘Ngatta ziga-rigatammu danuri mangurug niakan?’ Kabalin natun, nabbabawi si Pablo anna nabbaling tu Cristiano gabbalaman. Netura ni Pablo i 14 nga libru na Biblia, Roma adde ta Hebreo.
Inaggaw nga bibbigattam i Biblia, diba?— Gukaban na pabbibbig tu Biblia, aru magigiammutam meyannung kani Jesus. Ikayamu kari gigiammuan i aru paga meyannung kani Jesus?—
