Masingammu kari abbing ta litratu?— Ana yayya na lalaki nga mangngagan Jefte. Ari tu kinagi na Biblia i ngagan na abbing, ngem ammutam nga pinasayana i yamana kunne na gapa si Jehova. Ammuatta i meyannung ta abbing anna kani Jefte nga yamana.

Masippo si Jefte, anna kanayun nga tudduanna i anana meyannung kani Jehova. Masikan anna malalaki nga lider yayya. Yari tu pinili yayya na Israelita tu liderda nga makigerra ta kalabadda ira.

Nakimallo si Jefte nga uffunan yayya na Dios tapenu mangaffu. Nepromesa ni Jefte kani Jehova nga nu mangaffu ira, iyawana sa i ollu nga tolay nga mallawan ta baleda nga manafung sa ta pallabbena. Maddiang anna mattrabahu yaw  nga tolay ta tabernakulo na Dios ta interu nga pattolena. I tabernakulo i lugar nga angngayan na totolay turi tapenu maddayarayaw ta Dios. Siempre, nangaffu si Jefte ta laban! Ammum kari nu sinni nanafung sa ta pallabena ta baleda?—

Wan, i ana ni Jefte! I tattadday nga maginganay nga anana. Meyarayyu ngana kani Jefte i tattaday nga anana. Kaddaddam yaw para sa. Ngem tandaanammu, ari kari tu nappromesa yayya? Insigida nga kinagi na anana: ‘Ammo, nappromesaka kani Jehova, mawag nga tuppalammu ya.’

Maraddam gapa i ana ni Jefte. Nu egga ngana yayya ta tabernakulo, ari ngana puede nga makiatawa anna makkaana. Ngem ikakayana nga tuppalan i nepromesa na yamana, anna ikakayana gapa nga mapasaya si Jehova. Mas importante yatun sa anne ta makiatawa anna makkaana yayya. Yari tu nanaw yayya ta baleda anna naddiang ta tabernakulo ta interu nga pattolena.

Para nikaw, napasayana kari i yamana anna si Jehova ta kingnguana?— Wan! Nu minattuppalka anna nu iddukammu si Jehova, maparigammu gapa i ana ni Jefte. Siguradu nga mapasayam i maganamu anna si Jehova.