Egga kari ngana nangikagi nikaw tu sekreto?— * Egga kagian na Biblia nga espesial nga sekreto nga nagalan tu “i sagrado nga sekreto.” Sagrado yatun ta naggafu ta Dios. Sekreto gafu ta ari paga ammu na totolay. Maski anghel ira ikakayada ammuan i mas aru paga meyannung taw nga sekreto. Sikaw, ikayamu kari gapa nga ammuan?—

Ta ollu nga tiempo, kingngua na Dios i ollu nga lalaki anna babay. Adan anna Eva i ngagadda. Iniddan ira na Dios tu makakkasta nga paddianan nga nagalan tu hardin na Eden. Nu sinuppal da Adan anna Eva i Dios, napabbalidda nakuan tu paraiso i interu davvun kavulu i anada. Nattolay nakuan ira ta Paraiso tu mannanayun. Ngem matandaanammu kari nu anni kingngua da Adan anna Eva?—

Ari nattuppal ta Dios da Adan anna Eva, yari tu awattam ta paraiso. Ngem kinagi na Dios tu pakastanna i interu davvun, anna ngamin ay magayayya anna mattolay tu mannanayun. Kunnasina kuan yaw? Sekreto yaw ta nabayag nga tiempo. Ari paga ammu na totolay.

Ta kegga ni Jesus ta davvun, netudduna ta totolay i aru paga meyannung taw nga sekreto. Nekagina nga meyannung yaw ta Pappatulan na Dios. Netuddu ni Jesus ta totolay nga ipakimalloda nga umay i Pappatulan. Pabbalinanna tu makakkasta nga paraiso i davvun.

Ikakayamu kari ngana ammuan yaw nga sekreto?— Tandaanammu nga danuri laman mattuppal ta Dios i mattolay ta paraiso. Aru estorian na Biblia nga lallaki anna babbay nga nattuppal kani Jehova. Ikayamu kari ira makilala?— Ammuatta nu sinni i karuan nira anna nu kunnasita nga maparigan ira.