Hebreo nga ngagan i Bethel, nga i kebalinanna “Balay na Dios.” (Genesis 28:17, 19, footnote) Mekunnay yaw nga ngagan para ta pasilidad ira na Saksi ni Jehova ta interu mundo. Taw nga maorganisa anna masuportan i trabahu nga pallaygayya. Massesserbi i Manangngal nga Baggi ta hedkuarter ta New York State, U.S.A. Tattangngalladda tari i aktibidad na ngaming nga panga nga ofisina (branch office) ta aru nga nasion. Mangaganan tu familia na Bethel i ngaming nga masserbi tatun nga pasilidad. Kagitta na tadday nga familia, makkaravulu ira nga maddian, mattrabahu, kuman anna maggigiammu tu Biblia nga egga pattaraddeda.—Salmo 133:1.

Espesial nga lugar nga pattrabahuan na minassakrifisio nga miembro na familia. Ta kada pasilidad na Bethel, egga ira Cristiano nga lallaki anna babbay nga ngaming-tiempo nga magaggangngua tu uray na Dios anna massesserbi para ta interes na Pappatulan. (Mateo 6:33) Awan tu masuelduan onu mataddanan nira. Ngem, libre i makan anna paddianadda. Egga gapa meyawa nga allowance-da para ta personal nga pakawagadda. Egga espisipiko nga trabahu na kada tadday ta Bethel gitta na ta ofisina, kusina, onu ta akkakanan. Egga gapa ira i mattrabahu ta pagimprentan, mappakarenu ta kuarto, mabbabbal, mammentena, onu tanakuan paga ira nga trabahu.

Okupadu nga lugar nga massuporta tu pangilaygayya ta Pappatulan. Primero nga gakkag na kada Bethel tu mepakannammu i kinakurug ta Biblia ta ngaming nga tolay adde nga posible. Yaw nga brosiur i tadday nga angngariganna. Netura yaw gukaban na pangiyorollu na Manangngal nga Baggi. Mepatulug gukaban na kompiuter ta minagatu nga grupo na tagabalittag ta interu mundo kabalinna meyemprinta gukaban na kuruga alistu nga makina ira nga pagimprentan ta karuan nga pasilidad na Bethel. Kabalinna, mepatulug ta maturu nga 110,000 nga kongregasion. Ta kada proseso, dakal i meuffun na familia na Bethel taw nga pinaka-importante nga trabahu—pangilaygayya ta mapia nga dumug.—Marcos 13:10.

• Sinni ira i masserbi ta Bethel, anna kunnasi nga maasikasu i kawagadda?

• Anni nga importante nga trabahu i suportan na kada Bethel?