I termino nga “payunir” tukuyanna i maddiskubre tu bagu ira nga teritorio anna mangivuka tu dalan para ta tanakuan ira nga totolay. Makagi nga payunir gapa si Jesus, megafu ta nadog yayya ta davvun tapenu pegafanan i makeyawa-inango nga ministerio anna mangivuka ta dalan na kapalliagan. (Mateo 20:28) Ta maddaggun, parigan na aripanna ira i ehemplona gukaban na pangusada tu aru nga tiempo nga ‘magangngua tu disipulo.’ (Mateo 28:19, 20) Egga gapa ira i massesserbi bilang payunir.

Ngaming-tiempo nga ebanghelisador i payunir. Tagalaygayya na mapia nga dumug i ngaming nga Saksi ni Jehova. Ngem naddesision i karuan nira nga masserbi bilang regular pioneer. Mangus-usa ira tu 70 oras kada vulan nga mallaygayya. Aru i mattrabahu tu part-time tapenu makuada yaw. Pinili gapa na karuan i masserbi bilang special pioneer ta lugar nga aru i pakawagan tu mangilayyagayya ta Pappatulan. Natunno tu 130 oras kada vulan i isakrifisioda ta ministerio onu maturu paga. Kontento i payunir ira ta simple nga pattoleda. Mattiwala ira nga iyawa ni Jehova i talaga nga kawagadda. (Mateo 6:31-33; 1 Timoteo 6:6-8) Puede gapa nga masserbi bilang auxiliary pioneer i ari makapasserbi tu ngaming-tiempo. Mallaygayya ira tu 30 onu 50 oras kada vulan.

Masserbi i payunir megafu ta aya ta Dios anna ta totolay. Kagitta ni Jesus, masingammi gapa i kakkallo nga kondision na totolay ta espiritual. (Marcos 6:34) Ngem egga nikami i pakannammu nga makoffun nira ta maddaggun tapenu mapeggan ira tu makasta nga iddanama. I ayà ta kasittolay i mamaguyu ta payunir nga mangisakrifisio ta tiempo anna sikadda nga manguffun ta totolay ta espiritual. (Mateo 22:39; 1 Tesalonica 2:8) Ta pagangngua taw, mas mapagaram, mas maddukko ta Dios anna mas makapagayayya i tadday nga payunir.—Kingngua 20:35.

• Anni i payunir?

• Ngatta mappayunir tu ngaming-tiempo i karuan?