Ikaya na Dios nga mattolay ittam tu mannanayung nga memammo anna magayayya ta paraiso nga davvun!

Baka mapanonomu, ‘Kunnasi gapa nga mesimmu yatun?’ Kagian na Biblia tu pabbalinan na Pappatulan na Dios nga posible yatun. Ikaya na Dios tu magigiammu na totolay i meyannung tatun nga Pappatulan anna i gakkagna para nittam.—Salmo 37:11, 29; Isaias 9:7.

Ikaya na Dios tu mabenefisiowattam.

Kagitta na minaggiddu nga yama nga kuanna i kapianan para ta anàna, karagatan gapa na nelangitan nga Yama tam tu mannanayung nga magayayya ittam. (Isaias 48:17, 18) Nepromesa na nga “i mamarulo ta uray na Dios ay mattolay adde noka.”—1 Juan 2:17.

Ikaya na Dios nga lumakag ittam ta dala-dalanna.

Kagian na Biblia nga ikaya na Namaratu tu “ituddu nittam i urayna” tapenu “makalakag ittam ta dala-dalanna.” (Isaias 2:2, 3) Inorganisana “i totolay para ta ngaganna” tapenu mepakannammu i ikayana ta interu davvun.—Kingngua 15:14.

Ikaya na Dios tu mattaradday ittam ta paddayarayaw nisa.

I marenu nga paddayarayaw kani Jehova arianna passirinan i totolay. Lallagu, pattaraddayanna ira ta napafutuan nga aya. (Juan 13:35) Ta maddaggun, sinni i manuttuddu ta totolay ta maski anni nga lugar nu kunnasi nga mattaradday nga masserbi ta Dios? Puedem nga ammuan yatun taw nga brosiur.