Ngatta kuruga masaya i totolay ta litratu? Nagatende ira ta tadday nga asemblimi. Kagitta na aripan na Dios ta nappasa nga naggarammammung mamittallu kada dagun, aba-abangammi gapa i pattaraddemi ta dakal nga grupo. (Deuteronomio 16:16) Ta kada dagun egga tallu nga okasiommi: dua nga taggi-tadday aggaw nga asembli sirkito anna tallu-aggaw nga rehional kombension. Kunnasi kami mabenefisiowan taw nga pattaradday?

Paladdanna i Cristiano nga pawwaragimi. Nu kunnasi nga nakapagayayya i Israelita gari ta paddayarayaw kani Jehova ta “asembli ira,” magayayya kami gapa ta pattaraddemi nga maddayarayaw nisa ta espesial nga okasion. (Salmo 26:12, footnote; 111:1) Mangiyawa yaw nga okasion tu oportunidad nga makakilala anna makavulu i Saksi ira ta nadduruma nga kongregasion anna nu karuan maski ta tanakuan nga nasion. Ta tangnga-na-aggaw, makkaravulu kami gapa nga kuman ta pagasembliammi. Yari tu talaga mas makapagayayya yatun ira nga espiritual nga okasion. (Kingngua 2:42) Maekspiriensiami taw i aya nga mamattaradday ta “interu nga pawwaragi” mi ta tangaravvunan.—1 Pedro 2:17.

Manguffun nikami nga mapproggreso ta espiritual. Nabenefisiowan i Israelita ira ta “nalippawada i uvovug” na Katurakan nga neyesplika nira. (Nehemias 8:8, 12) Kunnatun gapa i pattagibalormi ta pangigiya na Biblia nga malawami ta asembli ira. Nebase-biblia i kada tema na programa. Nagigiammumi i uray na Dios gukaban na diskurso ira, simposium anna pangidemostra ta ekspiriensia ira. Mapatuyag kami gapa nu maginnami i ekspiriensia ira na wawwagimi nu kunnasi nga nattulu-tuluy ira nga matalo bilang Cristiano maski nu aru nga zigariga i nappasadda. Ta rehional kombension, egga drama ira nga girawammi nga kagitta lagapa gari ta tiempo na Biblia, anna pakagigiammuammi tu praktikal ira nga leksion. Ta kada asemblimi, mabawtisowan danuri mayà nga mangisimbolo tu dedikasiodda ta Dios.

• Ngatta makapagayayya nga okasion i asembli ira?

• Kunnasika nga mabenefisiowan ta pagatendem ta asembli?