Neprofesiya na Biblia nga kabaling na patay ni Jesus, aru mallattuag nga apostata nga naggafu ta ollu ira nga Cristiano nga manaral ta kinakurug ta Biblia. (Kingngua 20:29, 30) Natuppal yatun nga profesiya. Pinakkivuda i tuddu ira ni Jesus anna i pagano ira nga relihioso nga ideya yari tu nallattuag i falsu nga Cristianismo. (2 Timoteo 4:3, 4) Kunnasi kami vu makasiguradu nga fustu i pakalippawami ta talaga nga ituttuddu ira na Biblia?

Zimittal i tiempo tapenu ilammuyag ni Jehova i kinakurug. Neprofesiyana nga ta ‘tiempo na panuppalan, umaru i fustu nga pakannammu.’ (Daniel 12:4) Ta dekada 1870, napansin na baddi nga grupo na talaga nga magaleg ta kinakurug tu aru nga doktrina na relihion i ari nebase ta Biblia. Yari tu inalegda tu mapia i orihinal nga tuddu ira na Biblia. Inuffunan ira ni Jehova tapenu malegadda i kinakurug.

Ginigiammu tu mapia na matalo ira nga lallaki i Biblia. Pinegafanan na Estudiante na Biblia, i dati nga ngagan na Saksi ni Jehova, i metodo na paggigiammu nga usammi adde ta maddaggun. Gigiammuadda i Biblia topiko por topiko. Nu egga teksto nga ariadda matindian, magaleg ira tu tanakuan nga teksto nga mangiyesplika tatun. Nu makabuu ira tu kongklusion nga mebase ta interu nga tuddu na Biblia, iturada yatun. Megafu ta usadda i Biblia nga mangiyesplika ta naddianna mismu, nannawag uli nira i kinakurug meyannung ta ngagan na Dios, i Pappatulan na Dios, i gakkagna ta sinolayan anna ta davvun, i mesimmu ta natay anna ta iddanama nga paginnolay. Megafu ta pagala-alegda ta kinakurug, ari ngana ira melloko na falsu ira nga tuddu anna tradision.—Juan 8:31, 32.

Turi 1879, nalippawa na Estudiante ira na Biblia tu tiempo ngana nga mepakannammu ta ngaming i kinakurug. Yari tu tatun nga dagun pinegafanadda nga mangipublisa tu magasina nga Passifusifutan Mangipakannammu ta Pappatulan ni Jehova nga mepublisa adde ta maddaggun. Ta maddaggun mepakannammu ta totolay i kinakurug ta Biblia ta 240 nga nasion anna ta 750 nga lengguahe. Talaga nga umara-aru i fustu nga pakannammu!

• Anni nesimmu ta kinakurug ta Biblia kabalin na patay ni Cristo?

• Kunnasi nannawag uli kinakurug ta Biblia?