Kilala i Saksi ni Jehova ta pattudduda tu Biblia. Egga ira teokratiko nga eskuela nga massanay ta ngaming-tiempo nga tagalaygayya ta Pappatulan tapenu matuppalda tu mapia i ministerioda.—2 Timoteo 4:5.

Pioneer Service School. Nu tangaragun ngana i regular pioneer, puede yayya me-enrol ta annam-aggaw nga kurso. Makua yaw ta aranni nga Kingdom Hall. Gakkag na yaw nga eskuela tu uffunan i payunir nga mas maddukko kani Jehova. Mabbaling tu mas epektibo ta ngaming nga aspeto na ministeriona anna itulutuloy i matalo nga serbisiu.

School for Kingdom Evangelizers. Dua-vulan yaw nga kurso nga massanay tu ekspiriensiadu ira nga payunir nga sigga-anugu masserbi ta tanakuan nga lugar. Gitta na ikagkagida, “Egga nga taw! Idob ma!” Parigadda i kadakallan nga Ebanghelisador nga nasserbi ta davvun, si Jesu-Cristo. (Isaias 6:8; Juan 7:29) Mawag tu masanay ira ta simple nga pattolay ta arayyu nga lugar. Puede nga neruma i kultura, klima, anna makang ira ta naggafuanadda. Baka mawag paga tu maggigiammu ira tu bagu nga lengguahe. Makoffun i eskuela ta magedad tu 23 adde ta 65 nga babbagitolay, mammaginganay anna natawan tapenu mapeggan ira tu makasta nga espiritualidad. Mammuadda taw nu kunnasi ituppal i asaymentda. Makagigiammu ira gapa tu skill nga makoffun tapenu mas meyusa ira ni Jehova anna na organisasionna.

Watchtower Bible School of Gilead. Ta Hebreo, i termino nga “Gilead” egga koneksionna ta termino nga “Saksi.” Ta nepammegafu na Gilead ta dagun 1943, maturu 8,000 nga nabaling nageskuela taw i nadog nga misionero nga mallayyagayya “ta ngaming nga totolay ta tanga-ravvunan.” (Kingngua 13:47) Talaga makakkasta i resultana. Ta ollu nga dattal na misionero ira ta Peru, awan paga tu kongregasion. Ngem ta maddaggun egga ngana maturu nga 1,000. Ta pinammegafu na passerbi na misionero ira ta Japan, awan paga tu mafulu na Saksi tari. Ngem, ta maddaggun maturu nga 200,000 ngana. Magigiammu tu mapia i Uvovug na Dios ta lima-vulan nga kurso ta Gilead. Maimbita taw nga eskuela i massesserbi bilang special pioneer onu field missionary, massesserbi ta panga nga ofisina (branch office) anna manangngal ta sirkito (circuit overseer). Kuruga masanay ira tapenu mas malladda anna mapatuyag i trabahu nga pangilayyagayya.

• Anni gakkag na Pioneer Service School?

• Sinni i puede nga maggigiammu ta School for Kingdom Evangelizers?