Mangipublisa anna mangitaneg i organisasiommi tu minagatu nga million nga Biblia anna karuan paga ira nga publikasion nga awang tu paga na. Mangipataddag anna mammentena kami tu Kingdom Hall anna panga nga ofisina ira. Sussuportammi i rinivu nga Bethelite anna misionero anna manguffung kami nu egga trahedia. Yari tu baka mepakkiavumu, ‘Paggafuan na Pondonu?’

Ariammi makkolekta, mappapaga, onu mangà tu pakkafulu. Maski nu dakal i magastumi para ta trabahu nga pagibanghelio, ariammi mas-solicit tu kuartu ta totolay. Maturu nga minagatu nga dagun ngana i nappasa, kinagi na mekarua nga isyu na magazina nga Passifusifutan tu mangurug kami nga sussuportan nakami ni Jehova yari tu “ariammi vuluvuga makilimus onu makkiddaw tu uffun ta totolay”—ariammi talaga nga kingngua yatun!—Mateo 10:8.

Masuportan i aktibidadmi gukaban na boluntario ira nga donasion. Aru nga totolay i mangappresia ta trabahumi nga pattuddu tu Biblia anna maddonasion ira para tatun. Magayayya mismu i Saksi ira nga mangiyawa tu tiempo, sikan, kuartu anna tanakuan paga nga egga nira tapenu makua i uray na Dios ta interu davvun. (1 Cronicas 29:9) Ta Kingdom Hall, ta asembli anna ta kombensiommi ira, egga i kahon para ta ngaming nga mayà maddonasion. Onu awayyana gapa maddona gukaban na website-mi nga jw.org. Naggafu i aru nga donasion ta ari mariku nga totolay, kagitta na pobre nga balu nga kuruga inapresia ni Jesus nga nangipay tu dua sinsiliu nga baddi i balorna ta kahon na pagipappanan tu kuartu na templo. (Lucas 21:1-4) Yari tu maski sinni, puede tu regular nga “mangisina” tapenu makeyawa “sigun ta nadisidi na futuna.”—1 Corinto 16:2; 2 Corinto 9:7.

Kumbinsido kami nga tulu-tuluy nga paguywan ni Jehova i futu danuri maya nga ‘mangidayaw nisa gukaban na mabalor nga gannagannugda’ ta passuporta ta trabahu na Pappatulan tapenu metuppal i urayna.—Proverbio 3:9.

• Anni neruman na organisasiommi ta tanakuan ira nga relihion?

• Anni keyusan na boluntario ira nga donasion?