Awan tu masuelduan nga klero ta organisasiommi. Kagitta gari ta pinamegafu na Cristiano nga kongregasion, i kualipikadu ira nga mangiyorollu ‘ipastoradda i kongregasion na Dios.’ (Kingngua 20:28) Lallaki nga manakam ta espiritual i elder ira. Iyorollu anna ipastoradda i kongregasion nga ‘ari tu mafeffersa, nu ari sigga-anugu; ari nga megafu ta benefisio nu ari megafu ta ikakayada i masserbi.’ (1 Pedro 5:1-3) Anni kuadda para nikami?

Tangngallan anna bantayaddakami. Megafu ta ammu na elder nga netalò nira yaw nga importante nga responsabilidad, mangigiya anna manguffun ira tapenu maprotektan i kongregasion ta espiritual. Ariadda mappatapatul, yari tu makapagayayya i kada miembro na kongregasion. (2 Corinto 1:24) Nu kunnasi nga malappo nga tangngallan na pastor i kada tadday ta karneruna, makkaragà i elder ira nga ammuan i kada miembro na kongregasion.—Proverbio 27:23.

Tudduaddakami nu kunnasi nga kuan i uray na Dios. Kada ligguan, iyorollu na elder ira i study ta kongregasion tapenu mapaladda i pangurugmi. (Kingngua 15:32) Iyorolluda gapa i pallayyagayya nga aktibidad. Malappo nga makipattrabahu ira nikami anna sanayadda kami ta ngaming nga aspeto na ministerio.

Pasikannadda i kataggitadday nikami. Bisitaddakami na elder ira ta balemi tapenu mapaladda i relasiommi ta Dios. Makiyuvovug ira gapa nikami ta Kingdom Hall tapenu uffunan anna bannabannayadda kami gukaban na teksto ira ta Biblia.—Santiago 5:14, 15.

Fuera paga ta responsabilidad ta kongregasion, aru nga elder i egga gapa sekular nga trabahu anna responsabilidad ta familia nga makawag tu tiempo anna atensiodda. Yari tu, mawag laman tu merespetu yaw ira nga kuruga malappo nga wawwagi.—1 Tesalonica 5:12, 13.

• Anni i responsabilidad na elder ira ta kongregasion?

• Kunnasi nga mepasingan na elder ira i personal nga interes ta kataggitadday nikami?