Mabbalo ta tiempom nga naggigiammu taw nga brosiur tapenu makilalam i Saksi ira ni Jehova, mammuammu i aktibidadmi anna kunnasi pagandar na organisasiommi. Paray nakuan tu nakoffun nikaw yaw tapenu makilala nakami bilang totolay nga magaggangngua tu uray ni Jehova ta maddaggun. Pagarammaddaka nga itulu-tuloymu nga mangà tu pakannammu meyannung ta Dios. Ikagim ta kafamiliam anna parientesmu anna kokkofummu i meyannung ta magiggigiammum. Regular nga makivuluka nikami ta Nacristianuan nga studymi.—Hebreo 10:23-25.

Maekspiriensam mismu nga nu umaru i magigiammum meyannung kani Jehova, mas nga masingammu i kadakal na ayana nikaw. Yaw i mamaguyu nikaw nga kuan i ngaming nga mawayyam tapenu mepasingan i ayamu nisa. (1 Juan 4:8-10, 19) Ngem kunnasim nga mepasingan yatun ta inaggaw nga pattolem? Ngatta ta pakabenefisiowammu i panuppalmu ta moral nga estandarte? Anna anni i makoffun nikaw nga makipattaradday nikami nga magangngua ta uray na Dios? Magayayya i mattuddu nikaw tu Biblia nga mangiyesplika ta tabbag tapenu sikaw anna i familiam ay ‘makapattalupaddiang ta aya na Dios, . . . nga inanamannu i mannanayung nga inango.’—Judas 21.

Pagarammaddaka nga itulu-tuloymu i mapprogreso ta dalan na kinakurug gukaban na paggigiammu ta tumunug nga publikasion “Mattalupaddian ta Ayâ na Dios.”