Nu makipaggigiammuka ngana tu Biblia ta tadday nga Saksi ni Jehova, siguru mappreparaka nige kamu maggigiammu. Makasta nu kuammu gapa yatun nige ka umatende ta study tapenu mabenefisiowakka tu mapia. Makakkasta paga i resultana nu regular nga kuammu yatun.

Ammuammu sonu anni anna sitaw ka maggigiammu. Anni i tiempo nga mas makapaffokus ka? Ta umma kari nige ka mamegafu ta trabahum? Onu ta gabi, nu nakakatruk ngana i abbing ira? Mangiskediulka tu tiempo nga maggigiammu maski nu ababba laman. Ariammu ipamavulun i maski anni nga makaistorbo nikaw. Maggigiammuka ta memammo nga lugar. Addappammu i radio, TV anna cellphone tapenu ari ka ma-istorbo. Makimallo nige ka maggigiammu. Makoffun yaw tapenu kattamammu labbi i problema anna kavurungammu ira anna makafokuska ta paggigiammu tu Uvovug na Dios.—Filipos 4:6, 7.

Markammu i material nga magigiammu anna mangipreparaka tu komento. Innammu labbi i pinakatema na topiko nga gigiammuammu. Nonoppammu i tema na artikulo onu kapitulo. Innammu nu anni koneksion na kada subtitulo ta tema anna gigiammuammu i litratu anna pangrepaso nga pakkiavu nga mangipalawang ta importante ira nga punto. Kabalinna, bibbigammu i parafo anna alegammu i tabbag na neyemprinta nga pakkiavu. Bibbigammu i teksto ira. Nonoppammu nu anni koneksionna ta topiko. (Kingngua 17:11) Nu nalegammu i tabbag ta pakkiavu markammu i importante ira nga termino ta parafo nga mangiperaddang nikaw ta tabbag. Ta study, puedem itayag i limam anna makkomento tu ababba.

Nu mappreparaka kada ligguan para ta study, umaru paga i pakannammum ta Biblia.—Mateo 13:51, 52.

• Anni nga iskediul i makasta nga tuttulammu tapenu makaprepara ta study?

• Kunnasika makaprepara tu komento para ta study?