Kanayung nga makagi ta Cristiano nga Griego nga Katurakan da Bernabe anna apostol Pablo. Nasserbi ira nga mabbibiahe nga manangngal (traveling overseer) nga mabbisibisita ta ollu ira nga kongregasion. Ngatta? Megafu ta kuruga siggapanono ira ta espiritual nga pammakapianan na wawwagida. Kinagi ni Pablo nga ikayana i “manoli anna bisitan i wawwagi ira” tapenu komustan ira. Sigga-anugu nga mabbiahe tu minagatu nga kilometro tapenu mapasikanna ira. (Kingngua 15:36) Kunnatun gapa i kuan na mabbibiahe nga manangngal ira ta maddaggun.

Pasikannadda kami. Mabbisibisita i kada manangngal ta sirkito tu 20 onu maturu paga nga kongregasion. Tangaligguan nga maddian ira ta kada kongregasion, mamiddua ta tangaragun. Kuruga mabenefisiowakkami ta ekspiriensada kunne na gapa na attawada nu natawan ngana ira. Karagatadda nga ammuan ngaming—abbing kunne na gapa ta manakam ira. Magayayya nga vulunadda kami ta ministerio anna ta ikonduktami ira nga paggigiammu tu Biblia. Vulunan na manangngal ta sirkito i elder ira nga ma-shepherding. Pasikannaddakami gapa gukaban na makapagaram anna makapatuyag nga palappa ta study anna ta asemblimi ira.—Kingngua 15:35.

Minangngikavurung ira nikami. Kuruga mavurung i manangngal ta sirkito ira ta espiritualidad na kongregasion ira. Mammiting ira kavulu i elder anna ministerial ira tapenu masingan i napproggresowan na kongregasion. Mangiyawa ira tu praktikal nga tabarang ta elder anna ministerial ira nu kunnasi metuppal i responsabilidadda. Uffunadda i payunir ira nu kunnasi metuppal tu mapia i ministerioda. Magayayya ira gapa nga makilala i bagu nabautisowan ira anna masita i papproggresoda ta espiritual. Sigga-anugu yatun nga wawwagi tu ‘makipattrabahu para ta pammakapianattam.’ (2 Corinto 8:23) Mawag tu parigattam i angngurug anna devosiodda ta Dios.—Hebreo 13:7.

• Ngatta mabbisita i manangngal ta sirkito ira ta kongregasion?

• Kunnasika mabenefisiowan ta pabbisitada?