Nige na patay ni Jesus, nakiyuvovug yayya tu pribadu ta appa nga apostolna—da Pedro, Santiago, Juan anna Andres. Ta pangipakannammuna ta pagisenialan na kegga na pagultimuan na aggaw ira, neyavuna i importante nga pakkiavu: “Sinni talaga i matalo anna memmugug nga aripan nga sinunno na yafuna nga manangngal ta kauffunna ira, tapenu iyawana nira i kanadda ta mepangngo nga tiempo?” (Mateo 24:3, 45; Marcos 13:3, 4) Nepasiguradu ni Jesus ta apostolna ira nga bilang “yafu” da, tunnakkanna i mangiyawa nga tulu-tuloy tu espiritual nga kawagan na disipulona ira ta tiempo na panuppalan. Sinni i mabbuu taw nga aripan?

Tadday nga grupo na napili nga tagatuttul ni Jesus. I Manangngal nga Baggi (Governing Body) na Saksi ira ni Jehova i massesserbi nga “aripan.” Yatun nga aripan i mangiyawa tu espiritual nga makang ta mepangngo nga tiempo ta kagittada nga maddayarayaw kani Jehova. Mattiwala kami taw nga matalo nga aripan nga tulu-tuloy nga iyawada nikami i “billay nga kawagan nga kanan ta mepangngo nga tiempo.”—Lucas 12:42.

Tangngallanna i tangakabbalayan na Dios. (1 Timoteo 3:15) Iniddan ni Jesus i aripan tu madammo nga responsabilidad nga manangngal tu trabahu na organisasion ni Jehova ta davvun. Ira i mangasikasu ta material nga pakkukuana, mangiyorollu ta trabahu nga pallayyagayya anna mattuddu nikami gukaban na kongregasion. Iyawa na “matalo anna memmugug nga aripan” i kawagammi ta mepangngo nga tiempo gukaban na publikasion ira nga usammi ta ministerio kunne na gapa ta programa ira ta study anna asemblimi ira.

Matalo i aripan ta kinakurug ta Biblia anna ta responsabilidadna nga mangilaygayya ta mapia nga dumug. Memmugug gapa nga tangngallanna i ngaming nga gannagannug nga netalo sa ni Cristo. (Kingngua 10:42) Bebbendisionan ni Jehova yaw nga aripan. Yari tu bastante i meyawana nga espiritual nga makang anna umara-aru paga i mangalawà ta kinakurug.—Isaias 60:22; 65:13.

• Sinni i sinunno ni Jesus nga mamakang ta espiritual ta disipulona ira?

• Kunnasi nga nabbaling tu matalo anna memmugug i aripan?