Kagian na Biblia nga egga dua grupo na lallaki nga mangasikasu ta kada kongregasion—“i manangngal ira anna ministerial ira nga aripan.” (Filipos 1:1) Ta maddaggun, egga gapa ira elder anna ministerial nga massesserbi ta kada kongregasion. Anni ira kuan na ministerial nga aripan para nikami?

Uffunadda i elder ira. Naespirituan i appanapanonoda, mapattalakkan anna malappo i ministerial ira. Mabbing i karuan nira anna egga gapa manakam. Asikasuadda i importante ira nga rutina anna pisikal nga trabahu ta kongregasion. Megafu taw, makafokus i elder ira ta responsabilidadda nga pattuddu anna pangipastor.

Mangiyawa ira tu praktikal nga uffun. Natunno nga attendant i karuan nga ministerial nga mamaddulo ta magatende ira ta study. I tanakuan nira ay mangasikaso ta sound equipment, pangiwara ta literatura ira, panangngal ta pondo (accounts) na kongregasion anna pangitunno tu teritoria nga pallaygayyan na miembro ira na kongregasion. Manguffun ira gapa ta pammentena ta Kingdom Hall. Nu karuan, kiddawan gapa na elder nga uffunadda i lakay anna bako ngana ira. Napafutuan nga ituppal na ministerial i anni laman nga mepakua nira yari tu merespetu ira.—1 Timoteo 3:13.

Mangipasingan ira tu makasta nga ehemplo bilang Cristiano nga lallaki. Napili i ministerial ira nga aripan megafu ta mapia nga Cristiano nga kualidadda. Mapasikadda i angngurugmi gukaban na parteda ta study. Megafu ta makasta nga ehemploda ta ministerio, mabbalikkami tu mas matalikarag ta trabahu nga pallaygayya. Megafu ta minakkikoopera ira ta elder ira, egga pagayayya anna pattaradday. (Efeso 4:16) Duttal i tiempo nga puededa ngana gapa masserbi nga elder.

• Anni i kualidad na ministerial ira nga aripan?

• Kunnasi nga manguffun i ministerial ira tapenu naunnug i kongregasion?