Tapenu makuami i ngaming nga mawayyami nga mepakannammu i “mapia nga dumug” ta “kada nasion, tribu, paguvovug anna totolay,” mangimprenta kami tu literatura ta ma-750 nga lengguahe. (Apocalipsis 14:6) Kunnasimi nga metuppal yaw? Egga ira tagatura ta nadduruma nga nasion kunne na gapa i grupo na matalo ira nga tagabalittag—ngaming ay Saksi ni Jehova.

Metura ta Inglis i material. Tangngallan na Manangngal nga Baggi i aktibidad ta Writing Department ta hedkuartermi ta U.S.A. Yaw nga departamento i mangi-unnug tu trabahu na tagatura ira nga egga ta hedkuarter anna ta karuan tu panga nga ofisina. Megafu ta egga ira tagatura ta nadduruma nga nasion, metura ta publikasiommi i topiko ira nga paginteresan na totolay maski anni nasion onu kulturada.

Mepatulug i material ta tagabalittag. Ma-edit anna maapruban i netura nga material. Kabalinna, mepatulug gukaban na kompiuter ta grupo na tagabalittag ta interu davvun. I-translate, i-check anna i-proofread da i material. Ikagumadda nga pilian i “fustu nga uvovug na kinakurug” nga makala tu fustu nga kebalinan na Inglis.—Eclesiastes 12:10.

Paalistuan na kompiuter i proseso. Ari tu matalianan na kompiuter i tagatura anna tagabalittag. Ngem mapa-alistu i trabahu gukaban na programa ira na kompiuter, elektroniko nga diksiunario anna materiales para ta pangusito. Naddisenio i Saksi ira ni Jehova tu Multilanguage Electronic Publishing System (MEPS). Taw nga metallung i material nga nebalittag ta minagatu nga lengguahe pati i artworkna. Kabalinna, meprepara yatun para ta keyimprentana.

Ngatta ikagumammi nga kuan ngaming yaw, maski ta lengguahe nga piga rivu laman nga totolay i mangusa? Megafu ta uray ni Jehova nga “ngaming nga klase na totolay ay mepalliag anna kaddetadda nga kannammuan i fustu nga pakannammu ta kinakurug.”—1 Timoteo 2:3, 4.

• Kunnasi nga metura i publikasiommi ira?

• Ngatta ibalittagmi i literaturami ira ta aru nga lengguahe?