Aru nga totolay i makkagi nga ngagan na bagu nga relihion i Saksi ni Jehova. Ngem maturu tu 2,700 dagun ngana nappasa, nagalan tu “saksi” i aripan na tattadday nga kurug nga Dios. (Isaias 43:10-12) Nige na 1931, Estudiante na Biblia i neyagal nikami. Ngem ngatta pinilimi i ngagan nga Saksi ni Jehova?

Ipakilalana i Diosmi. Segun ta orihinal nga manuskrito, rinivu nga mabibbig i ngagan na Dios nga Jehova ta Biblia. Ta aru nga bersion na Biblia, natalianan i ngagan na Dios tu titulu nga Yafu onu Dios. Ngem nepakannammu na kurug nga Dios kani Moises i ngaganna nga Jehova. Kinagi na: “Yaw i ngagakku adde ta mannanayung.” (Exodo 3:15) Megafu taw, neruma yayya ta falsu ira nga dios. Ariammi ipasirang i privilehio nga magalang ta ngagan na Dios.

Iyammammuna i trabahumi. Ta tiempo na ollu ira nga totolay, namegafu kani Abel, aru ngana i nattestigu ta Dios. Ta pappasa na aru nga dagun, nesali gapa ta “dakadakal nga kunam na saksi ira” da Noe, Abraham, Sara, Moises, David anna karuan paga. (Hebreo 11:4–12:1) Kagitta na testigu ta korte nga mangidepensa ta inosente nga tolay, determinadu kami nga mangipakannammu ta kinakurug meyannung ta Dios.

Parigammi ehemplo ni Jesus. Kagian na Biblia nga yayya ay “matalo anna kurug nga saksi.” (Apocalipsis 3:14) Nekagi mismu ni Jesus nga ‘nepakannammuna i ngagan na Dios’ anna kanayung nga ‘tinestiguanna i kinakurug’ meyannung ta Dios. (Juan 17:26; 18:37) I kurug nga aripan ira ni Cristo, mawag nga testiguadda anna ipakannammuda i ngagan ni Jehova. Yaw i determinadu nga kuan na Saksi ira ni Jehova.

• Ngatta natalianan tu Saksi ni Jehova i dati nga Estudiante na Biblia?

• Kanni paga nga egga Saksi ni Jehova ta davvun?

• Sinni i pinakamatalo nga Saksi ni Jehova?