Namegafu paga gari, ikaya ni Jehova nga mattaradday i familia tapenu mapaladda i espiritualidad anna i relasiodda ta kataggitadday. (Deuteronomio 6:6, 7) Yatun i rason nu ngatta kada ligguan egga iskediul na Saksi ni Jehova para ta paddayarayaw na familia. Relaks yaw nga paggigiammu tu espiritual nga gannagannug nga eksakto ta kawagadda. Maski nu tattaddeka, puedem lagapa nga usan i tiempom para kani Jehova. Mappilika tu topiko nga ikayamu gigiammuan.

Tiempo tapenu mas maddukko kani Jehova. “Umaranni kamu ta Dios, tapenu umaranni yayya nikamu.” (Santiago 4:8) Mas makilalatam si Jehova nu magigiammutam i personalidad anna kingnguana ira gukaban na netura nga Uvovugna. I simple nga pangigafu ta paddayarayaw na familia ay i masikang nga pabbibbig tu Biblia. Puedenu nga tuttulan i iskediul ta Study nga Pattolay Anna Ministerio. Puede nga dati ikagim ta miembro na familiam i bersikulo nga bibbigadda. Kabalinna, paguruvovugannu i leksion nga nagigiammunu ta Biblia.

Tiempo tapenu mas maddukko i relasion na familia. Mapaladda na magatawa ira, magana kunne na gapa na anà ira i relasiodda ta kataggitadday nu gigiammuadda i Biblia nga tangafamilian. Mawag tu makapagayayya, memammo nga tiempo yaw na familia tapenu ikakayada nga kuan yaw kada ligguan. Puede nga mappili i magana tu praktikal ira nga topiko ta Passifusifutan anna Awake! onu ta website, jw.org, depende ta edad na anàda. Puedenu nga paguvovugan i problema na anànu ta eskuela anna nu kunnasida nga masolba yatun. Makasta nu girawannu i tadday nga programa ta JW Broadcasting (tv.pr418.com) tapus paguruvovugannu nga familia. Puedenu gapa nga praktisan i makansion ira ta study. Kabalinna, puede kamu gapa mammerienda.

Makoffun yaw nga espesial nga gabi na paddayarayaw na familia tapenu ma-enjoy na kataggitadday i paggigiammu tu Uvovug na Dios. Bendisionan nakamu ni Jehova nu kuannu adde na mawayyanu.—Salmo 1:1-3.

• Ngatta mangiskediul kami tu tiempo para ta paddayarayaw na familia?

• Anni kuan na magana tapenu ma-enjoy ngaming na miembro na familia i paddayarayaw?