Regular nga magatende kami ta paggigiammumi maski nu ararayyu lakarammi onu marake panniempo. Maski nu egga problema anna nabannag ta trabahu, ngatta ikaguman na Saksi ira ni Jehova nga makilallang ta kapangngurugda?

Pammakapianammi yatun. Netura ni Pablo ta miembro ira na kongregasion: “Nonopattam nakuan i kataggitadday.” (Hebreo 10:24) Ikaya na kagian yatun nga ammuattam tu mapia i kataggitadday. Pagarammanna ittam na apostol nga ikavurungattam i tanakuan. Nu kilalammi tu mapia i kada miembro na kongregasion, mammuammi nu kunnasida nga nasolba i problemada nga kagitta na problemami. Yari tu moffunadda kami.

Mapeggan kami tu maladda nga pakikofun. Ta paggigiammumi, kagittta na madukko nga kofun i pangibilammi ta kataggitadday, ari tu basta kakilala laman. Egga gapa tiempo nga maggarayam anna mappasia-pasiar kami. Anni i makasta nga efekto na kunnatun nga pakkaravulu? Mas maapresiami i kataggitadday anna yatun i mamaladda paga ta ayàmi. Megafu ta madukko nga pakikofummi, napafutuan nga uffunammi i wawwagimi nu egga problemada. (Proverbio 17:17) Ta pakikavulumi ta ngaming nga miembro na kongregasion, mepasingammi i “pakka-iddu-iddu ta kataggitadday.”—1 Corinto 12:25, 26.

Paray nakuan tu piliammu i kofun nga magaggangngua tu uray na Dios. Makalekka ta kunnatun nga kokkofun ta Saksi ira ni Jehova. Ariammu nakuan ipamavulun nga egga mangigamma ta pakikavulumu nikami.

• Anni makasta nga efekto na pattaraddaymi ta pagigiammu?

• Sonu anni ka makistudy tapenu makilalam i Saksi ira?