Masingan i masanto nga ngagan na Dios ta kada Kingdom Hall na Saksi ni Jehova. Yari tu pribilehio anna importante nga parte na sagradu nga paddayarayawmi i pamattalupaddiang taw nga marenu anna presentable. Puede manguffun ngaming.

Mabboluntario kami nga mappakarenu kabaling na study. Kada mabaling i study, magayayya i wawwagi nga pakarennuan i Kingdom Hall. Mittan ta kada ligguan, mapakarennuan tu mapia i interu nga Kingdom Hall. Tadday nga manakam onu ministerial nga aripan i mangorganisa tu pappakarenu. Negagangay tu egga matuttul nga checklist na gannagannug nga makua. Egga ira mabboluntario nga makkageg, mangi-mop, onu mangi-vacuum ta datag, maffuna, mappakappia tu itubang, anna mappakarenu tu toilet. Egga ira gapa mappakarenu ta benta anna bidru, mangitabbo tu basura, onu mappakarenu ta pallevu na Kingdom Hall. Mittan ta kada dagun, egga meyiskediul nga general cleaning. Ivulumi i anami ta pappakarenu tapenu matudduammi nga mangirespeto ta lugar nga paddayarayawammi.—Eclesiastes 5:1.

Manguffukkami ta mawag nga mapakappian. Kada dagun nga ma-inspeksion i unag anna lawan na Kingdom Hall. Regular nga makua yaw tapenu masita i mawag nga mapakappian anna ari dumakal i daral na. Nu kunnatun, mebita i mas dakal nga paggastu. (2 Cronicas 24:13; 34:10) Mawag laman tu marenu anna mamentena tu mapia i lugar nga paddayarayawan ta Dios. Nu manguffukkami taw nga trabahu, mepasingammi i aya kani Jehova anna i pattagibalor ta lugar nga paddayarayawammi. (Salmo 122:1) Makeyawa gapa yaw tu makasta nga impresion ta komunidad.—2 Corinto 6:3.

• Ngatta ariammi pagurayan i lugar nga paddayarayawammi?

• Anni ira i unnug tapenu mattalupaddiang nga marenu i Kingdom Hall?