Nu egga kalamidad, insigida nga manguffun i Saksi ira ni Jehova ta wawwagida nga nafektan. Yatun i mangipasingan tu napafutuan nga ayami ta kataggitadday. (Juan 13:34, 35; 1 Juan 3:17, 18) Anni ira kuammi tapenu makoffun?

Maddonasion kami. Turi ta egga dakal nga bisin ta Judea, nangipatulug i Cristiano ira ta Antioquia tu finansial nga uffun ta wawwagida ta espiritual. (Kingngua 11:27-30) Kunnatun gapa ta maddaggun. Nu madumugmi nga nafektan tu kalamidad i wawwagimi ta tanakuan nga lugar, mangiyawa kami tu donasion gukaban na lokal nga kongregasion tapenu moffunan ira.—2 Corinto 8:13-15.

Mangiyawa kami tu praktikal nga uffun. Siguraduan na elder ira nga egga ta lugar nga nafektan tu kalamidad nga awan tu nesimmu nga marake ta wawwagi ira. Egga komite na relief nga mangi-unnug ta pangiyawa tu makan, sinnung, marenu nga danum, paddianan anna medisina. Aru nga Saksi i boluntario nga mattrabahu ta relief onu ta pappakappia ta nadaral nga babalay anna Kingdom Hall. Ira lagapa maggastu para ta sarilida. Megafu ta pattaradday ta organisasiommi anna kanayung nga pakipattrabahumi ta kataggitadday, insigida nga manguffun kami nu egga kuruga makawag. Maski nu uffunammi kaparehasmi nga Saksi, uffunammi gapa i karuan ira maski anni relihiodda nu makawag gapa ira.—Galacia 6:10.

Mangiyawa kami tu espiritual anna emosional nga suporta. Kawagan na biktima ira na kalamidad i bannabannay. Ta kunnatun ira nga mesimmu, makala kami tu sikan kani Jehova, “i Dios na ngaming nga pamannabannay.” (2 Corinto 1:3, 4) Magayayya kami nga mangikagi ta biktima ira na kalamidad i promesa na Biblia nga aranni ngana nga alsan na Pappatulan na Dios i ngaming nga trahedia anna paggafuan na pazziga-riga.—Apocalipsis 21:4.

• Ngatta makoffun insigida i Saksi ira nu egga kalamidad?

• Anni espiritual nga bannabannay i puedetam ikagi ta biktima ira na kalamidad?