Ta ollu nga siglo, nasserbi nga manangngal nga baggi i baddì nga grupo na “apostoles anna mannakam ta Jerusalem,” tapenu magangngua tu importante ira nga desision para ta interu nga kongregasion na napili nga Cristiano. (Kingngua 15:2) Tattadday i desisiodda megafu ta usadda i Katurakan anna mappegiya ira ta espiritu na Dios. (Kingngua 15:25) Kunnatun gapa i kuan na Manangngal nga Baggi ta maddaggun.

Usu-usan na Dios tapenu metuppal i uray na. Egga napafutuan nga interes ta Uvovug na Dios danuri napili nga wawwagi nga masserbi nga Manangngal nga Baggi. Aru ngana i ekspiriensada nga magasikasu tu praktikal anna espiritual nga gannagannug. Kada ligguan nga mammiting ira tapenu mapaguvovugadda i kawagan na wawwagi ta interu mundo. Kagitta na ta ollu nga siglo, meyawa i nebase-Biblia nga instruksion ira gukaban na tura onu na mabbibiahe nga manangngal anna karuan paga. Megafu taw, mapakatadday i pana-panono anna guyu-guyu na totolay na Dios. (Kingngua 16:4, 5) Iyorollu na Manangngal nga Baggi i pangiprepara tu espiritual nga makang. Ipagaramna i pangipollu tu trabahu nga pangilaygayya tu Pappatulan anna iyorolluna paga i pappili tu lallaki nga puede meddan tu responsabilidad.

Mappegiya ta espiritu na Dios. Mappegiya i Manangngal nga Baggi kani Jehova, i Soberano na Uniberso kunne na gapa kani Jesus, i Ulu na kongregasion. (1 Corinto 11:3; Efeso 5:23) Ariadda ibilang i baggida nga lider na totolay na Dios. Kavulu i ngaming paga nga napili ira nga Cristiano, dumaddaddang i Manangngal nga Baggi ta Kordero [si Jesus] maski sitaw angngayanna. (Apocalipsis 14:4) Kuruga appresian na Manangngal nga Baggi nu ipakimallotam ira.

• Sinni ira i manangngal nga baggi ta ollu nga siglo?

• Kunnasi nga mappegiya ta Dios i Manangngal nga Baggi ta maddaggun?