NERUMA I TOTOLAY TA ARU NGA GANNUG​—MAKATURA, MAKAPINTA, MAKAPADDAY, ANNA MANONO TAM I IMPORTANTE IRA NGA PAKKIAVU TA PATTOLAY: Ngatta egga uniberso? Naggafuattam? Anni gakkag na pattolay? Anni mappange tam?

Lillitan na karuan danatun nga pakkiavu megafu ta nonopadda nga mariga tabbagan danatun. Kagian na tanakuan nga awan tu kwenta danatun nga pakkiavu megafu ta resulta na ebolusion i inango. “Awan tu dios, awan tu gakkag,” kunni William Provine nga profesor na history anna biology. Kunna paga: “Awan tu estandarte na ugo anna fustu, awan tu gakkag na pattolay.”

Ngem para ta karuan, mariga yatun nga akseptan. Para nira, igigiya na eksakto, elegante, anna nadisenio tu mapia nga dorob i uniberso. Mappabbaw ira ta makakkasta nga disenio na naparatu ira, nga paparigan paga lagu danatun na totolay. Maobserbada gapa kadaggaw nga egga intelihente nga diseniador ta komplikadu ira nga naparatu.

Inuli na karuan nga ebolusionista i pangurugda megafu tatun nga rason. Innan i dua nga angngarigan.

NEUROSURGEON DR. ALEXEI MARNOV. “Ateismo anna ebolusion i itudduda ta nagiskuelakku,” kunna. “Sinni laman nga mangurug ta Dios ay mekwenta nga ignorante.” Ngem ta 1990, nanguli i pangurugna.

“Kanayukku nga alippawatan i lohikal nga rason ta ganna-gannug,” kunna, “kasali i uto na tolay. Yaw nga makapabbaw nga parte na baggi ay fustu laman nga magalan tu i pinakakomplikadu nga gannug ta uniberso. Ngem nadisenio laman kari i uto tapenu mapeggan tu pakannammu anna abilidad i tolay tapus matay gabbalaman? Ari nga rasonable yaw. Yari tu nanono ku: ‘Ngatta egga ittam? Anni gakkag na pattolay?’ Kabalikku ninono tu mapia, makagì nga egga i Namaratu.”

Ta pagaleg ni Alexei ta gakkag na pattolay, ginigiammuna i Biblia. Naggigiammu gapa tu Biblia i doktor anna ateista nga atawana​—tapenu laman pakurugan nga mali yayya! Ngem sangawe, parehu ngana ira mangurug ta Dios anna malippawada ngana i gakkagna para ta totolay gittana nepakanawag ta Biblia.

PLASMA SCIENTIST DR. HUABI YIN. Ginigiammu ni Huabi Yin i physics, anna ta aru nga dagun, nar-research yayya meyannung ta bilag.

“Sikami nga sientista, kada gigiammuammi i gagangay nga mesissimmu,” kunni Huabi, “kanayukkami makasingan tu atannang nga estandarte na unnug, nga resulta na eksakto ira nga dorob. ‘Naggafuan danaw nga dorob?’ nanono ku. ‘Nu maski i simple nga afi ta pallutu ay mawag tu makontrol tu mapia, sinni gafu gapa i responsable ta dorob ira nga makkontrol ta bilag?’ Nammuakku gabbalaman nga i ollu nga nakagi ta Biblia i pinakalohikal nga tabbag: ‘Ta gafa-gafu pinaro na Dios i langi anna i davvun.’”​—Genesis 1:1.

Siempre, tabbagan gapa na siensia i aru ta pakkiavu nga “kunnasi” gittana: Kunnasi maffunsina i selula ira na uto? Kunnasi mappatu anna mannawag i bilag? Ngem gittana nadiskubre da Alexei anni Huabi, tabbagan na Biblia i mas importante ira nga pakkiavu nga “ngatta”: Ngatta egga uniberso? Ngatta igigiya yaw na dorob ira? Ngatta egga ittam?

Kagian na Biblia meyannung ta davvun: “Arianna pinaratu [na Dios] yatun nga awan tu sesserbina, ngem finormana yatun tapenu paddianan.” (Isaias 45:18) Wan, egga gakkag na Dios para ta davvun, anna ipasingan na tumunug nga artikulo nga konektadu tu mapia yatun nga gakkag ta iddanama tam ta mappange.