“I IDDANAMA AY . . . IMPORTANTE TAPENU MAPEGGAN TU MAKASTA NGA RELASION TA DIOS,” kunna libru nga Hope in the Age of Anxiety. “Yaw i kapianan nga uru ta pangarubang ta pakkafi na nono, pagitetadday, anna assing.”

Mabibbig ta Biblia i pakawagattam ta iddanama anna i pagimmugug tam gapa ta falsu ira nga iddanama. “Ari ka nga mammakatalo ta mammaguray ira; maski sinni nga tolay ay ari makapaliag vuluvuga,” kunna Salmo 146:3. Imbes nga mattalo ta tolay para ta kapaliag, masirib nu mattalo ittam ta Namaratu nga makawayya nga manuppal ta promesana ira. Anni i nipromesana? Ikonsidera i tumunug.

MAPAWAN I KINARAKE; MANNANAYUN NGA IMAMMO PARA TA MATUNUNG: “Ari nga mabbayag, i marakay ira ay mapawan . . . Ngem i minappakalinno ay irensiad-da i davvun, anna mattolay ira ta imammo nga mannanayun,” kunna Salmo 37:10, 11. Kunna paga na bersikulo 29 nga “i matunung ira ay . . . maddian ira [ta davvun] tu mannanayun.”

MAGIMMANG I GERRA: “Pagimmangan [na Y_AFU] i gerra ira ta tanga-ravvunan; i pana anna pika ira ay en-na kata-kattuan, anna i kalatag ira ay en-na nga tuggian!”​—Salmo 46:8, 9.

MAWAWAN I TAKI, ZIGA-RIGA, ONU PATAY: “Makitappaddian ngana i Dios ta sina-sinolay! Funatan na ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki.”​—Nepakannammu 21:3, 4.

BASTANTE NGA MAKAN TA NGAMIN: “Aru . . . i magatab ta koman ira; matakkabban . . . i kavukiran ta mula-mula.”​—Salmo 72:16.

MATUNUNG NGA PAMMAGURAY NA TADDAY NGA GOBIERNU​—PAPPATULAN NI CRISTO: “Neddan [si Jesu-Cristo] tu pammaguray, dayaw, anna tadday nga pappatulan, tapenu passerbian yayya na totolay, nasa-nasion, anna nadduruma ira nga lengguahe. Mannanayun nga pammaguray i pammagurena nga ari noka mappasa, anna ari noka madaral i pappatulanna.”​—Daniel 7:14.

Kunnasi tam masiguradu danatun nga promesa? Ta kegga ni Jesus ta davvun, pinakurugna nga kualipikadu yayya nga Natunno nga Patul. Pinammapiana i mataki, pinakan i pobre, anna pinaginnolena i natay. I mas importante, makoffun i tuttudduna tapenu makkaravulu nga memammo anna mattaradday tu mannanayun i totolay. Kinagina paga i mappange ira nga mesimmu, nelagum i senial ira na pangurianan nga aggaggaw na mundo.

Kinagi ni Jesus nga ari tu imammo anna seguridad i senial na pangurianan ira nga aggaw. Nelagum i gerra, bisin, taki, anna masikan ira nga lunig ta senial na “panuppalan na mundo.” (Mateo 24:3, 7; Lucas 21:10, 11; Nepakannammu 6:3-8) Kunna paga ni Jesus: “Mallummin noka i aya na aru nga totolay ta ikattolay da megafu ta umaru nga umaru i marakay.”​—Mateo 24:12.

Masingi-singan yatun nga pallummin, nga espesipiko gapa nga niprofesiya na tadday paga nga nattura ta Biblia. Mabibbig tam ta 2 Timoteo 3:1-5 nga ta “pangurianan ira nga aggaw,” aru i sigga-nono laman ta baggida, kuartu, anna pappaga-pagayayya. Palagopog anna kitapporay ira. Awan tu aya ta familia, anna ari manguru-kurug i ána ta maganada. Aru i magappappe nga relihioso.

Pakurugan danatun nga magulu nga mesissimmu nga egga ngana ta pangurianan ira nga aggaw i mundo. Ebidensia gapa danatun nga aranni ngana i imammo nga irattal na Pappatulan. Nilagum ni Jesus yaw nga pamasiguradu ta profesiyana ta pangurianan nga aggaw: “Melayya-gayya noka ta tanga-ravvunan yaw nga Mapia nga Dumug na Pammaguray na Dios tapenu kannammuan na ngamin nga sinolay. Ta kabalin naw, duttal ngana i panuppalan.”​—Mateo 24:14.

Pamappalan yaw nga mapia nga dumug ta marake ira ngem iddanama gapa ta matunung ira, nga mamasiguradu nira nga matuppal i nepromesa ira nga bendision. Kayà mu kari mammuan i aru paga tatun ira nga bendision? Nu wan, innan i likug naw nga magazina.